എഫ്.സി.ആർ.എ വിഷയത്തിൽ അമിത് ഷായുമായി ക്രൈസ്തവസഭാ നേതാക്കളുടെ കൂടിക്കാഴ്ച നടന്നു

ന്യൂഡൽഹി: വിദേശ സംഭാവന നിയന്ത്രണ നിയമമായ എഫ്.സി.ആർ.എ (Foreign Contribution Regulation Act – FCRA) സംബന്ധിച്ച വിവിധ വിഷയങ്ങൾ കേന്ദ്ര സർക്കാരിന്റെ ശ്രദ്ധയിൽപ്പെടുത്തുന്നതിനായി ഇന്ത്യയിലെ വിവിധ ക്രൈസ്തവസഭകളുടെ നേതൃത്വത്തിൽ കേന്ദ്ര ആഭ്യന്തരവകുപ്പ് മന്ത്രി ബഹു. ശ്രീ. അമിത് ഷായുമായി കൂടിക്കാഴ്ച നടത്തി. വിവിധ ക്രൈസ്തവസഭകളുടെ പ്രതിനിധികൾ പങ്കെടുത്ത ഈ കൂടിക്കാഴ്ചയിൽ എഫ്.സി.ആർ.എ നിയമവുമായി ബന്ധപ്പെട്ട് സഭകളും ക്രൈസ്തവ സന്നദ്ധസംഘടനകളും നേരിടുന്ന പ്രായോഗിക ബുദ്ധിമുട്ടുകൾ, രജിസ്ട്രേഷൻ നടപടിക്രമങ്ങൾ, പുതുക്കൽ സംബന്ധമായ വിഷയങ്ങൾ, സേവന-കാരുണ്യ പ്രവർത്തനങ്ങൾക്ക് ആവശ്യമായ സൗകര്യങ്ങൾ എന്നിവ ചർച്ച ചെയ്തതായി അറിയുന്നു.

മലങ്കര ഓർത്തഡോക്സ് സുറിയാനി സഭയെ പ്രതിനിധീകരിച്ച് ഡൽഹി ഭദ്രാസനാധിപൻ അഭിവന്ദ്യ ഡോ. യൂഹാനോൻ മാർ ദിമെത്രയോസ് മെത്രാപ്പോലീത്ത കൂടിക്കാഴ്ചയിൽ പങ്കെടുത്തു. സഭയുടെ വിവിധ സേവന പ്രവർത്തനങ്ങൾ കൂടുതൽ ഫലപ്രദമായി മുന്നോട്ടുകൊണ്ടുപോകുന്നതിന് എഫ്.സി.ആർ.എ സംബന്ധമായ നടപടിക്രമങ്ങളിൽ ആവശ്യമായ വ്യക്തതയും അനുകൂല സമീപനവും ഉണ്ടാകണമെന്ന് അദ്ദേഹം ആവശ്യപ്പെട്ടതായി റിപ്പോർട്ടുകളുണ്ട്.

ക്രൈസ്തവ വിദ്യാഭ്യാസ, ആരോഗ്യ, സാമൂഹിക സേവന സ്ഥാപനങ്ങൾ രാജ്യത്തിന്റെ വിവിധ ഭാഗങ്ങളിൽ നിർവഹിച്ചുവരുന്ന സന്നദ്ധസേവനങ്ങളുടെ പ്രാധാന്യവും പ്രതിനിധികൾ മന്ത്രിയുടെ ശ്രദ്ധയിൽപ്പെടുത്തി. രാജ്യത്തിന്റെ വികസനത്തിനും സാമൂഹിക ക്ഷേമത്തിനും ക്രൈസ്തവ സംഘടനകൾ നൽകുന്ന സംഭാവനകൾ തുടർന്നും ശക്തിപ്പെടുത്താൻ ആവശ്യമായ ഭരണപരമായ പിന്തുണ ലഭിക്കുമെന്ന പ്രതീക്ഷയും അവർ പ്രകടിപ്പിച്ചു.

പ്രതിനിധിസംഘം സമർപ്പിച്ച നിർദേശങ്ങൾ അനുഭാവപൂർവം പരിഗണിക്കുമെന്ന് കേന്ദ്ര ആഭ്യന്തരവകുപ്പ് മന്ത്രി  അമിത് ഷാ ഉറപ്പുനൽകിയതായി ബന്ധപ്പെട്ട വൃത്തങ്ങൾ അറിയിച്ചു. കൂടിക്കാഴ്ച സൗഹാർദ്ദപരമായ അന്തരീക്ഷത്തിലായിരുന്നുവെന്നും വിവിധ വിഷയങ്ങളിൽ ക്രിയാത്മകമായ ചർച്ചകൾ നടന്നതായും അറിയിച്ചിട്ടുണ്ട്.

- Advertisement -