ലേഖനം: കൂട്ടായ്മ – പിതാവിനോടും പുത്രനോടുമുള്ള ദിവ്യബന്ധം | റോജി തോമസ്
“ഞങ്ങള്‍ കണ്ടും കേട്ടുമുള്ളതു നിങ്ങള്‍ക്കു ഞങ്ങളോടു കൂട്ടായ്മ ഉണ്ടാകേണ്ടതിന്നു നിങ്ങളോടും അറിയിക്കുന്നു. ഞങ്ങളുടെ കൂട്ടായ്മയോ പിതാവിനോടും അവന്‍റെ പുത്രനായ യേശുക്രിസ്തുവിനോടും ആകുന്നു” (1 യോഹന്നാന്‍ 1:3).
‘കൂട്ടായ്മ’ എന്നതിന്‍റെ ഗ്രീക്ക് പദം ‘കൊയ്നോനിയ’ എന്നാണ്. പുതിയ നിയമത്തില്‍ കൂട്ടായ്മ, പങ്കാളിത്തം അല്ലെങ്കില്‍ പൊതുവായ പങ്കുവയ്ക്കല്‍ എന്ന ആശയത്തില്‍ ഈ പദം ഉപയോഗിക്കുന്നു. ഇത് കേവലം സാമൂഹിക ഇടപെടലുകള്‍ക്കപ്പുറം വിശ്വാസികള്‍ക്കിടയില്‍ ആഴത്തിലുള്ള പരസ്പരവും ദൈവികവുമായ ബന്ധത്തെ സൂചിപ്പിക്കുന്നു.
ദൈവശാസ്ത്രത്തില്‍, കൊയ്നോനിയയ്ക്ക് അഗാധമായ ആത്മീയ പ്രാധാന്യമുണ്ട്. പ്രത്യേകിച്ചും അപ്പൊസ്തലന്മാരുടെ പ്രവൃത്തികളുടെ പുസ്തകത്തില്‍ വിവരിച്ചിരിക്കുന്ന ആദ്യകാല ക്രിസ്ത്യന്‍ സമൂഹത്തിന്‍റെ പശ്ചാത്തലത്തില്‍. “അവര്‍ അപ്പൊസ്തലന്മാരുടെ ഉപദേശം കേട്ടും കൂട്ടായ്മ ആചരിച്ചും അപ്പം നുറക്കിയും പ്രാര്‍ത്ഥന കഴിച്ചും പോന്നു. എല്ലാവര്‍ക്കും ഭയമായി; അപ്പൊസ്തലന്മാരാല്‍ ഏറിയ അത്ഭുതങ്ങളും അടയാളങ്ങളും നടന്നു. വിശ്വസിച്ചവര്‍ എല്ലാവരും ഒരുമിച്ചിരുന്നു സകലവും പൊതുവക എന്നു എണ്ണുകയും ജന്മഭൂമികളും വസ്തുക്കളും വിറ്റു അവനവന്നു ആവശ്യം ഉള്ളതുപോലെ എല്ലാവര്‍ക്കും പങ്കിടുകയും, ഒരുമനപ്പെട്ടു ദിനംപ്രതി ദൈവാലയത്തില്‍ കൂടിവരികയും വീട്ടില്‍ അപ്പം നുറുക്കിക്കൊണ്ടു ഉല്ലാസവും ഹൃദയപരമാര്‍ത്ഥതയും പൂണ്ടു ഭക്ഷണം കഴിക്കയും ദൈവത്തെ സ്തുതിക്കയും സകല ജനത്തിന്‍റെയും കൃപ അനുഭവിക്കയും ചെയ്തു. കര്‍ത്താവു രക്ഷിക്കപ്പെടുന്നവരെ ദിനംപ്രതി സഭയോടു ചേര്‍ത്തുകൊണ്ടിരുന്നു” (അപ്പൊ. പ്രവൃത്തികള്‍ 2:42-47).
ഇവിടെ, കൊയ്നോനിയ എന്നത്; അവരുടെ ജീവിതവും വിഭവങ്ങളും വിശ്വാസവും പങ്കിട്ട ആഴത്തിലുള്ള ആത്മീയ ബന്ധത്തെ സൂചിപ്പിക്കുന്നു. പരസ്പര പിന്തുണയും ഔദാര്യവും ക്രിസ്തുവിനോടും അവന്‍റെ പഠിപ്പിക്കലുകളോടും വിശ്വാസത്താല്‍ ഉള്ള ഒരു കൂട്ടായ്മയായിരുന്നു അത്.
കൂട്ടായ്മ പലപ്പോഴും ആഴത്തിലുള്ള ആത്മീയ അര്‍ത്ഥം വഹിക്കുന്നു. വിശ്വാസികള്‍ക്കിടയിലുള്ള കൂട്ടായ്മയുടെയും ഐക്യത്തിന്‍റെയും വികാരത്തെ ഇത് സൂചിപ്പിക്കുന്നു. ഈ കൂട്ടായ്മ പലപ്പോഴും ആരാധന, പ്രാര്‍ത്ഥന, പഠനം, സേവനം എന്നിവയിലൂടെ പരിപോഷിപ്പിക്കപ്പെടുന്നു. ഒരാളുടെ വിശ്വാസത്തില്‍ പരസ്പര പിന്തുണയും ഉള്‍പ്പെടുന്നു.
കൂട്ടായ്മ കേവലം ഹൃദയങ്ങളുടെയും മനസ്സുകളുടെയും കൂടിച്ചേരലല്ല, മറിച്ച് പിതാവിനോടും അവന്‍റെ പുത്രനായ യേശുക്രിസ്തുവുമായുള്ള ഒരു വിശുദ്ധ കൂട്ടായ്മയാണ്. ഈ ദൈവിക ബന്ധത്തിലാണ് നാം നമ്മുടെ ശക്തിയും ലക്ഷ്യവും നമ്മുടെ ആഴത്തിലുള്ള വിശ്വാസവും കണ്ടെത്തുന്നത്. അവന്‍റെ സാന്നിധ്യത്തിന്‍റെ വെളിച്ചത്തില്‍ നടക്കുമ്പോള്‍, സ്നേഹത്തിന്‍റെയും കൃപയുടെയും ഉറവിടമായ ക്രിസ്തുവില്‍ അടുത്തുകൊണ്ട് തന്നെ കാലദേശങ്ങള്‍ക്ക് അതീതമായ ഒരു ബന്ധത്താല്‍ നാം ഐക്യപ്പെട്ടിരിക്കുന്നു. നമ്മുടെ സ്രഷ്ടാവും രക്ഷിതാവുമായ അവിടുത്തെ ഹൃദയത്തില്‍ നിന്ന് ഒഴുകുന്ന ശാശ്വത സ്നേഹത്താല്‍ സമ്പുഷ്ടമായതും തിരുരക്തത്താല്‍ മുദ്രിതവുമായ ഈ പവിത്ര കൂട്ടായ്മയില്‍ നാം സ്നേഹിക്കപ്പെടുകയും നയിക്കപ്പെടുകയും വിശ്വാസവര്‍ദ്ദനവു വരുത്തുകയും ചെയ്യുന്നു. ഈ കൂട്ടായ്മയുടെ വിശുദ്ധിക്കും നിലനില്‍പ്പിനും അടിസ്ഥാനം പിതാവിനോടും അവന്‍റെ പുത്രനായ യേശുക്രിസ്തുവിനോടും നമുക്കുള്ള കൂട്ടായ്മയാലുമത്രേ. ഇത് ആത്മാവിന്‍റെ കൂടിച്ചേരലാണ്, ദൈവികമായ ഇഴചേരല്‍. അപ്പോസ്തലനായ യോഹന്നാന്‍റെ വാക്കുകളില്‍, “ഞങ്ങളുടെ കൂട്ടായ്മയോ പിതാവിനോടും അവന്‍റെ പുത്രനായ യേശുക്രിസ്തുവിനോടും ആകുന്നു” (1 യോഹന്നാന്‍ 1:3). ഈ പ്രഖ്യാപനം നമ്മുടെ അസ്തിത്വത്തിന്‍റെ സത്തയെ വെളിവാക്കുന്നു.
പിതാവിനോടും പുത്രനോടുമുള്ള കൂട്ടായ്മ ജീവിതാനുഭവമാണ്. പ്രാര്‍ത്ഥനയുടെ ആഴങ്ങളിലാണ് നാം ദൈവിക സാന്നിധ്യം അനുഭവിക്കുന്നത്. പരിശുദ്ധാത്മാവിലൂടെ, വ്യക്തിപരവും ദൃഢവുമായ ഒരു ബന്ധത്തിലേക്ക് നാം കടന്നുചെല്ലുന്നു. നമ്മുടെ ജീവിതത്തെ രൂപാന്തരപ്പെടുത്തുകയും വിശ്വാസത്തെ ദൃഢപ്പെടുത്തുകയും ചെയ്യുന്ന ഒരു ബന്ധം. ഈ കൂട്ടായ്മയുടെ കേന്ദ്രം യേശുക്രിസ്തുവാണ്. ദൈവകൃപയുടെയും കാരുണ്യത്തിന്‍റെയും പൂര്‍ണത അവനില്‍ നാം കണ്ടെത്തുന്നു. അവിടുത്തെ ജീവിതം സഹനം മരണം പുനഃരുത്ഥാനം എന്നിവയിലൂടെ നമ്മെ പിതാവുമായുള്ള അനുരജ്ഞനത്തിന്‍റെ കൂട്ടായ്മയിലേക്ക് നയിക്കുന്നു.
പിതാവുമായും പുത്രനുമായും ഉള്ള കൂട്ടായ്മയുടെ സവിശേഷതയാണ് സ്നേഹം. അതിരുകളില്ലാത്തതും എല്ലാ ധാരണകളെയും മറികടക്കുന്നതുമായ ദൈവിക സ്നേഹം. തകര്‍ന്നവര്‍ക്ക് ഉയര്‍ച്ചയും ക്ഷീണിതര്‍ക്ക് ആശ്വാസവും പ്രത്യാശയും നല്‍കുന്ന സ്നേഹമാണത്. അന്വേഷിച്ചണയുന്നതും വീണ്ടെടുക്കുന്നതും പുനഃസ്ഥാപിക്കുന്നതും ആയ ഇടയ സ്നേഹം. ഈ ദിവ്യസ്നേഹത്തിന്‍റെ ആലിംഗനത്തില്‍, നമ്മുടെ ദുഃഖങ്ങള്‍ക്ക് ആശ്വാസവും, പോരാട്ടങ്ങള്‍ക്ക് ശക്തിയും, യാത്രയില്‍ സന്തോഷവും ഉണ്ടാവുന്നു.
എന്നിരുന്നാലും, ഈ കൂട്ടായ്മ വെല്ലുവിളികളെയും അഭിമുഖീകരിക്കുന്നു. പാപവും തകര്‍ച്ചയും നിറഞ്ഞ ഒരു ലോകത്ത്, നീതിയുടെ പാതയില്‍ നിന്ന് വ്യതിചലിക്കാനും ദൈവത്തിന്‍റെ സാന്നിധ്യത്തിന്‍റെ വെളിച്ചത്തില്‍ നിന്ന് അകന്നുപോകാനും പലപ്പോഴും പ്രലോഭിപ്പിക്കപ്പെടുന്നു. എങ്കിലും, നമ്മുടെ ബലഹീനതയുടെ നിമിഷങ്ങളില്‍ പോലും, പിതാവിന്‍റെ സ്നേഹം അചഞ്ചലമായി നിലകൊള്ളുന്നു, ക്ഷമയുടെയും കൃപയുടെയും പരിലാളനയുമായി നമ്മിലേക്ക് എത്തിച്ചേരുന്നു. പിതാവിനോടും പുത്രനോടുമുള്ള കൂട്ടായ്മയാണ് നമ്മുടെ ആത്മീയ യാത്രയുടെ സത്ത. സ്നേഹം, കൃപ, വീണ്ടെടുപ്പ് എന്നിവയാല്‍ വഴിനയിക്കുന്ന ഒരു യാത്ര. ദൈവിക വിശുദ്ധിയോടും സമര്‍പ്പണത്തോടും കൂടിയുള്ള ജീവിതത്തിലേക്ക് നമ്മെ നടത്തുന്ന ഒരു സ്വര്‍ലോക യാത്ര. നാം ഈ പാതയിലൂടെ സഞ്ചരിക്കുമ്പോള്‍, കൂട്ടായ്മയുടെ പവിത്രതയെക്കുറിച്ച് നമുക്ക് എപ്പോഴും ചിന്തിക്കാം. അപ്പോസ്തലനായ യോഹന്നാനെപ്പോലെ നമുക്കും ആത്മവിശ്വാസത്തോടെ പ്രഖ്യാപിക്കാം; “സത്യമായും, നമ്മുടെ കൂട്ടായ്മ പിതാവിനോടും അവന്‍റെ പുത്രനായ യേശുക്രിസ്തുവിനോടും കൂടെയാണ്.” ക്രിസ്തീയ വിശ്വാസ കൂട്ടായ്മ പിതാവിനും പുത്രനും പരിശുദ്ധാത്മാവിനും ഒത്തുള്ള സഹവാസമാണ്. വിശ്വാസത്തോടും വിശ്വസ്തതയോടും വിശുദ്ധിയോടും കൂടി കൂട്ടായ്മ ആചരിക്കാം. കര്‍ത്താവ് നമ്മെ ബലംനല്‍കി അനുഗ്രഹിക്കട്ടെ.
-ADVERTISEMENT-