ശ്വാസംമുട്ടി ഡൽഹി : ദില്ലി സര്ക്കാര് നിയന്ത്രണങ്ങള് ഏർപ്പെടുത്തി
Kraisthava Ezhuthupura News
ന്യൂഡൽഹി : ദില്ലിയില് വായു മലിനീകരണം അതിരൂക്ഷമായി തുടരുകയാണ്. ഇന്നലെ വായു നിലവാര സൂചിക 471 ന് മുകളിലാണ് രേഖപ്പെടുത്തിയത്.
മലിനീകരണം തടയാന് അടിയന്തിര നടപടി വേണമെന്ന സുപ്രീംകോടതി നിര്ദ്ദേശത്തിന് പിന്നാലെ ദില്ലി സര്ക്കാര് ഇന്നലെ നിയന്ത്രണങ്ങള് പ്രഖ്യാപിച്ചു.
സ്കൂളുകള് ഒരാഴ്ചത്തേക്ക് ഇന്നുമുതല് അടച്ചിടും. മുഴുവന് സര്ക്കാര് ഓഫീസുകളുടെയും പ്രവര്ത്തനം വര്ക് ഫ്രം ഹോമാക്കി. ലോക് ഡൗണ് പ്രഖ്യാപിക്കണോ എന്നത് കേന്ദ്ര സര്ക്കാരുമായി ആലോചിച്ച് തീരുമാനിക്കാനാണ് ദില്ലി സര്ക്കാരിന്റെ ആലോചന. ഇന്ന് അക്കാര്യത്തില്തീരുമാനം ഉണ്ടായേക്കും. വായു മലിനീകരണം തടയാന് ദില്ലിയില് രണ്ട് ദിവസത്തെ ലോക്ഡൗണ് പ്രഖ്യാപിക്കാവുന്നതാണെന്ന് സുപ്രീംകോടതി വ്യക്തമാക്കയിരുന്നു.
ഉടന് ഇക്കാര്യത്തില് തീരുമാനം എടുക്കണമെന്നും കോടതി അറിയിച്ചു. വീടിനുള്ളില് പോലും മാസ്ക് ധരിച്ചിരിക്കേണ്ട അവസ്ഥയാണെന്നും ചീഫ് ജസ്റ്റിസ് പറഞ്ഞിരുന്നു. സുപ്രീംകോടതി നിര്ദ്ദേശത്തിന് പിന്നാലെ ദില്ലി സര്ക്കാര് അടിയന്തിര യോഗം വിളിച്ചിരുന്നു. ദില്ലിയിലെ അന്തരീക്ഷ മലിനീകരണം അതിരൂക്ഷമായ സാഹചര്യത്തിലാണ് സുപ്രീംകോടതി ഇടപെടല്. അടിയന്തര സാഹചര്യമാണ് ദില്ലിയിലെന്നും ഇത് കേന്ദ്ര-സംസ്ഥാന സര്ക്കാര് തിരിച്ചറിയണമെന്നും ചീഫ് ജസ്റ്റിസ് എന് വി രമണ ആവശ്യപ്പെട്ടു.
വൈക്കോല് കത്തിക്കുന്നത് മാത്രമല്ല, മലിനീകരണത്തിന് കാരണം. വീടിനുള്ളില് പോലും മാസ്ക് ധരിച്ച് ഇരിക്കേണ്ടിവരുന്നു. ഈ അവസ്ഥയ്ക്ക് കേന്ദ്രത്തിനും സംസ്ഥാനത്തിനും ഒരുപോലെ ഉത്തവാദിത്തമുണ്ടെന്നാണ് സുപ്രീം കോടതി ചീഫ് ജസ്റ്റിസ് ചൂണ്ടിക്കാട്ടുന്നത്. മലിനീകരണം തടയാന് സര്ക്കാരുകള് ഒന്നും ചെയ്യുന്നില്ലെന്ന് കോടതി വിമര്ശിച്ചു. വായു നിലവാര സൂചിക 200ല് താഴെയെത്തിക്കാന് രണ്ട് ദിവസത്തിനുള്ളില് നടപടിയുണ്ടാകണം. അതിനായി ലോക്ഡൗണ് വരെ ആലോചിക്കണമെന്നുമായിരുന്നു കോടതി നിര്ദ്ദേശം.
- Advertisement -
Comments are closed.