മണിപ്പൂർ കലാപം: ക്രൈസ്തവർക്കെതിരെ സംഘടിത ആക്രമണമെന്ന് മുഖ്യമന്ത്രി പിണറായി വിജയൻ
മണിപ്പൂര് വംശഹത്യ; സംഘപരിവാറിന്റെ വര്ഗീയ അജണ്ടകളെ തിരിച്ചറിഞ്ഞ് ഒറ്റപ്പെടുത്തണമെന്ന് മുഖ്യമന്ത്രി പിണറായി വിജയൻ
തിരുവനന്തപുരം: മണിപ്പൂരിലെ വംശഹത്യയില് സംഘപരിവാറിന്റെ വര്ഗീയ അജണ്ടകളെ തിരിച്ചറിഞ്ഞ് ഒറ്റപ്പെടുത്തണമെന്ന് മുഖ്യമന്ത്രി പിണറായി വിജയന്. രണ്ട് മാസത്തിലധികമായി തുടരുന്ന വംശീയ കലാപത്തെ ഭയാശങ്കകളോടെ മാത്രമേ നോക്കി കാണാനാവൂ. അത്യന്തം ഭയാനകമായ ദൃശ്യങ്ങളാണ് മനുഷ്യ മനഃസാക്ഷിയെ മുറിവേല്പ്പിച്ചുകൊണ്ട് തുടര്ച്ചയായി വന്നുകൊണ്ടിരിക്കുന്നത്. അങ്ങേയറ്റം നിന്ദ്യവും അതിക്രൂരവുമായ രീതിയിലാണ് കുക്കി വിഭാഗത്തിലെ സ്ത്രീകള് ആള്ക്കൂട്ട കലാപകാരികളാല് വേട്ടയാടപ്പെട്ടതെന്നും മുഖ്യമന്ത്രി പറഞ്ഞു.
മണിപ്പൂരിലെ പര്വത-താഴ്വര നിവാസികള് തമ്മിലുള്ള ചരിത്രപരമായ വൈരുദ്ധ്യങ്ങള്ക്കുമേല് എരിതീയില് എണ്ണയൊഴിച്ച് അതിനെ വര്ഗ്ഗീയമായി ആളിക്കത്തിക്കുകയാണ്. ആസൂത്രിതമായ ക്രൈസ്തവ വേട്ടയാണ് കലാപത്തിന്റെ മറവില് നടക്കുന്നതെന്ന് വ്യക്തമാണ്. ഗോത്രവിഭാഗങ്ങളുടെ ക്രൈസ്തവ ദേവാലയങ്ങള് സംഘടിതമായി ആക്രമിച്ചു തകര്ക്കപ്പെടുന്ന നിലയാണെന്നും മുഖ്യമന്ത്രി ആശങ്ക അറിയിച്ചു.
സമാധാനം പുനഃസ്ഥാപിക്കാന് ബാധ്യസ്ഥരായവര് തന്നെ കലാപം ആളിക്കത്തിക്കാന് ശ്രമിക്കുന്നതായാണ് വാര്ത്തകള് വരുന്നത്. മണിപ്പൂര് വിഷയത്തിലെ കേന്ദ്ര സര്ക്കാരിന്റെ കുറ്റകരമായ മൗനവും സംഘപരിവാര് അജണ്ടയും ശക്തമായി വിമര്ശിക്കപ്പെടുകയാണ്. വര്ഗ്ഗീയ ധ്രുവീകരണം ശക്തിപ്പെടുത്തുന്നതിനുള്ള ആസൂത്രിത ശ്രമങ്ങളെ ചെറുത്തു തോല്പ്പിക്കേണ്ടത് ജനാധിപത്യ വിശ്വാസികളുടെ കടമയാണ്. അധികാര രാഷ്ട്രീയ ലക്ഷ്യങ്ങള്ക്കായി വിദ്വേഷം വിതച്ചുകൊണ്ട് മണിപ്പൂരിനെ കലാപഭൂമിയാക്കുന്ന സംഘപരിവാര് അജണ്ടയെ രാജ്യത്തെ മതനിരപേക്ഷ സമൂഹം തിരിച്ചറിയണമെന്നും മുഖ്യമന്ത്രി പറഞ്ഞു.
- Advertisement -
Comments are closed.