അനുസ്മരണം: വിശ്വാസം അവസാനംവരെ മുറുകെപ്പിടിച്ച എന്റെ പ്രിയപ്പെട്ട പാസ്റ്റർ അപ്പച്ചൻ കെ. കെ. ചെറിയാൻ | റ്റിർസ വർഗ്ഗീസ് ജോൺ

ചില മനുഷ്യർ നമ്മുടെ ജീവിതത്തിലേക്ക് കടന്നുവരുന്നത് ഒരു പ്രത്യേക ദൗത്യവുമായാണ്. അവരുടെ സ്നേഹവും വാക്കുകളും പ്രാർത്ഥനകളും സാന്നിധ്യവും നമ്മുടെ ജീവിതത്തിൽ മായാത്ത അടയാളങ്ങൾ അവശേഷിപ്പിക്കും. എന്റെ ജീവിതത്തിൽ അത്തരമൊരു വ്യക്തിയായിരുന്നു എന്റെ പ്രിയപ്പെട്ട പാസ്റ്റർ അപ്പച്ചൻ കെ. കെ. ചെറിയാൻ.

എന്നെ ഇത്രയേറെ സ്നേഹിച്ച ഒരു പാസ്റ്റർ അപ്പച്ചനെ ലഭിച്ചത് എന്റെ ജീവിതത്തിലെ വലിയൊരു അനുഗ്രഹമായിരുന്നു. അപ്പച്ചൻ എനിക്ക് ഒരു പാസ്റ്റർ മാത്രമായിരുന്നില്ല; ഹൃദയത്തോട് ചേർത്തുവെച്ച, ഞാൻ ആഴമായി സ്നേഹിക്കുകയും അതേ സ്നേഹത്തോടെ എന്നെയും സ്നേഹിക്കുകയും ചെയ്ത വളരെ പ്രിയപ്പെട്ട ഒരാളായിരുന്നു. ആ ബന്ധത്തിന് വാക്കുകൾകൊണ്ട് പൂർണ്ണമായൊരു നിർവചനം നൽകാൻ കഴിയില്ല.

അപ്പച്ചനെ കാണാൻ വരുമ്പോഴൊക്കെയും അതിരുകളില്ലാത്ത സ്നേഹത്തോടെയും സന്തോഷത്തോടെയും ഞങ്ങളെ സ്വീകരിച്ചിരുന്ന ആ നിമിഷങ്ങൾ ഇനി എന്റെ ഓർമ്മകളിൽ കൂടുതൽ വിലപ്പെട്ടതാകും. ഞങ്ങളെ കാണുമ്പോൾ മുഖത്ത് തെളിഞ്ഞിരുന്ന ആ സന്തോഷവും, സ്നേഹത്തോടെ സംസാരിച്ചിരുന്ന രീതിയും, ഓരോരുത്തരെയും വ്യക്തിപരമായി കരുതിയിരുന്ന മനസ്സും ഒരിക്കലും മറക്കാനാവില്ല.

പ്രത്യേകിച്ച്, എന്നെ കാണുമ്പോൾ സ്നേഹത്തോടെ വിളിക്കുകയും വിശേഷങ്ങൾ ചോദിക്കുകയും ചെയ്തിരുന്ന ആ ശബ്ദം… ആ വിളിയിലെ വാത്സല്യം… ആ വാക്കുകളിലെ സ്നേഹം… ഇനി ഒരിക്കലും നേരിൽ കേൾക്കാനാകില്ലെന്ന സത്യം ഹൃദയത്തെ വേദനിപ്പിക്കുന്നു. എന്നാൽ അപ്പച്ചന്റെ ആ സ്നേഹനിറഞ്ഞ വിളി എന്റെ ഹൃദയത്തിൽ എന്നും മുഴങ്ങിക്കൊണ്ടിരിക്കും.

അപ്പച്ചനോടൊപ്പമുള്ള ഈ ചിത്രങ്ങൾ എനിക്ക് വെറും ചിത്രങ്ങളല്ല. അവ എന്റെ ജീവിതത്തിലെ ഏറ്റവും അമൂല്യമായ ഓർമ്മകളുടെ ഭാഗങ്ങളാണ്. ഓരോ ചിത്രവും ഓരോ നിമിഷത്തെയും, ഓരോ സംഭാഷണത്തെയും, ഓരോ പുഞ്ചിരിയെയും ഓർമ്മിപ്പിക്കുന്നു. അപ്പച്ചന്റെ സാന്നിധ്യവും സ്നേഹവും പ്രാർത്ഥനകളും ഉപദേശങ്ങളും വചനചിന്തകളും ഞാൻ എന്നും ഹൃദയത്തിൽ സൂക്ഷിക്കും.

ദൈവവചനത്തിൽ ഉറച്ചുനിന്നും വിശ്വാസം അവസാനംവരെ മുറുകെപ്പിടിച്ചും ജീവിച്ച അപ്പച്ചന്റെ ജീവിതം ഞങ്ങൾക്ക് വലിയൊരു മാതൃകയാണ്. സാഹചര്യങ്ങൾ എന്തുതന്നെയായാലും ദൈവത്തിൽ വിശ്വാസം അചഞ്ചലമായി കാത്തുസൂക്ഷിക്കാമെന്ന് അപ്പച്ചന്റെ ജീവിതം ഞങ്ങളെ പഠിപ്പിച്ചു. ദൈവവചനത്തോടുള്ള അപ്പച്ചന്റെ സ്നേഹവും വിശ്വാസത്തോടുള്ള പ്രതിബദ്ധതയും അവസാന നിമിഷംവരെയും വ്യക്തമായിരുന്നു.

അപ്പച്ചൻ പറഞ്ഞ വാക്കുകളും ദൈവ വചനം വിശദീകരിച്ച രീതിയും ഞങ്ങളെ ചിന്തിപ്പിച്ച ആഴമുള്ള.ചിന്തകളും എന്റെ ജീവിതത്തിൽ എന്നും വിലപ്പെട്ട പാഠങ്ങളായിരിക്കും. വചനത്തെ വെറുതെ കേൾക്കുന്നതിലുപരി, അത് ജീവിതത്തിൽ പകർത്തേണ്ടതിന്റെ പ്രാധാന്യം അപ്പച്ചന്റെ ജീവിതത്തിലൂടെ ഞാൻ കണ്ടു.

എന്നെ സ്നേഹിച്ചതിനും, എനിക്കുവേണ്ടി പ്രാർത്ഥിച്ചതിനും, പ്രോത്സാഹിപ്പിച്ചതിനും, ജ്ഞാനവാക്കുകളിലൂടെ അനുഗ്രഹിച്ചതിനും ഹൃദയം നിറഞ്ഞ നന്ദി, അപ്പച്ചാ. ജീവിതത്തിലെ പല ഘട്ടങ്ങളിലും അപ്പച്ചന്റെ പ്രാർത്ഥനകളും വാക്കുകളും എനിക്ക് വലിയ ശക്തിയായിരുന്നു. നിങ്ങൾ സമ്മാനിച്ച ആത്മീയ പാഠങ്ങളും സ്നേഹവും ഞാൻ ഒരിക്കലും മറക്കുകയില്ല.

ഇന്ന് അപ്പച്ചൻ ഞങ്ങളോടൊപ്പം ഇല്ലെങ്കിലും, അപ്പച്ചൻ സമ്മാനിച്ച സ്നേഹവും ഓർമ്മകളും വചനത്തിലൂടെ നൽകിയ പ്രചോദനവും ഒരിക്കലും മായുകയില്ല. പ്രിയപ്പെട്ട ഒരാളെ നഷ്ടപ്പെടുന്നതിന്റെ വേദനയുണ്ട്; എന്നാൽ ക്രിസ്തുവിലുള്ള പ്രത്യാശ അതിനേക്കാൾ ശക്തമാണ്.

ഈ വേർപാട് അവസാനമല്ല. വീണ്ടും കാണുമെന്ന അനുഗ്രഹീത പ്രത്യാശയോടെ, ആ മനോഹരമായ തീരത്ത് നമുക്ക് വീണ്ടും കണ്ടുമുട്ടാം, പ്രിയപ്പെട്ട പാസ്റ്റർ അപ്പച്ചാ…

അപ്പച്ചന്റെ ഓർമ്മകൾ എന്നും ഹൃദയത്തിൽ ജീവിക്കും.

വിശ്വാസത്തിന്റെ ആ നല്ല പോരാട്ടം പൂർത്തിയാക്കിയ അപ്പച്ചന് സ്നേഹത്തോടെ വിട…

- Advertisement -