കാനഡയിലെ സീനിയർ ശുശ്രൂഷകൻ റവ. ഡോ. ജോർജ് തോമസിന്റെ സംസ്കാരം ഒക്ടോബർ 10 ശനിയാഴ്ച

ടൊറന്റോ: കാനഡയിലെ മലയാളി ക്രൈസ്തവ സമൂഹത്തിലെ സീനിയർ ശുശ്രൂഷകനും ആദരണീയനായ ആത്മീയ നേതാവുമായ റവ. ഡോ. ജോർജ് തോമസിന്റെ സംസ്കാര ശുശ്രൂഷകൾ ഒക്ടോബർ 9 വെള്ളിയാഴ്ച വൈകിട്ട് 5 മണിക്ക് നടത്തപ്പെടുന്ന വ്യൂയിങ് ശുശ്രൂഷയോടെ ആരംഭിക്കും.

ഒക്ടോബർ 10 ശനിയാഴ്ച രാവിലെ 9 മണിക്ക് സംസ്കാര ശുശ്രൂഷ നടക്കും. കാനഡയിലെ മാർത്തോമ്മാ സഭയുടെ വിറ്റ്ചർച്ച്-സ്റ്റഫ്വിൽ ദേവാലയത്തിലാണ് ശുശ്രൂഷകൾ നടക്കുന്നത്. തുടർന്ന് റിച്ച്മണ്ട് ഹില്ലിലെ എൽജിൻ മിൽസ് സെമിത്തേരിയിൽ സംസ്കാരം നടത്തും.

കാനഡയിലെ മലയാളി ക്രൈസ്തവ സമൂഹത്തിന്റെ ആത്മീയ വളർച്ചയിലും കൂട്ടായ്മയുടെ രൂപീകരണത്തിലും നിർണായക പങ്കുവഹിച്ച വ്യക്തിയായിരുന്നു റവ. ഡോ. ജോർജ് തോമസ്. 1965-ൽ കാനഡയിലെത്തിയ അദ്ദേഹം ടൊറന്റോ കേന്ദ്രീകരിച്ചുള്ള ആദ്യകാല മലയാളി ക്രൈസ്തവ കൂട്ടായ്മകൾക്ക് നേതൃത്വം നൽകുകയും വിശ്വാസികളെ ഒരുമിപ്പിക്കുന്നതിലും ആത്മീയ കൂട്ടായ്മകൾ വളർത്തിയെടുക്കുന്നതിലും ശ്രദ്ധേയമായ പങ്കുവഹിക്കുകയും ചെയ്തു.

ദീർഘകാല ശുശ്രൂഷയിലൂടെ നിരവധി സഭകൾക്കും വിശ്വാസികൾക്കും അദ്ദേഹം ആത്മീയ മാർഗനിർദേശവും പ്രോത്സാഹനവും നൽകി. നിരവധി ശുശ്രൂഷകർക്ക് ആത്മീയ ഉപദേശകനും വഴികാട്ടിയുമായിരുന്ന അദ്ദേഹം, യുവതലമുറയിലെ ശുശ്രൂഷകരെ പ്രോത്സാഹിപ്പിക്കുന്നതിലും അവരുടെ ആത്മീയ വളർച്ചയ്ക്ക് പിന്തുണ നൽകുന്നതിലും പ്രത്യേക ശ്രദ്ധ പുലർത്തിയിരുന്നു.

കാനഡയിലെ മലയാളി ക്രൈസ്തവ സമൂഹത്തിന്റെ വളർച്ചയുടെ വിവിധ ഘട്ടങ്ങളിൽ സജീവ സാന്നിധ്യമായിരുന്ന അദ്ദേഹത്തിന്റെ ശുശ്രൂഷയും ജീവിതസാക്ഷ്യവും തലമുറകൾക്ക് അനുഗ്രഹമായിരുന്നു.

കാനഡയിലെ മലയാളി ക്രൈസ്തവ സമൂഹത്തിന്റെ ആദ്യകാല ചരിത്രവുമായി അടുത്ത ബന്ധമുള്ള റവ. ഡോ. ജോർജ് തോമസിന്റെ നിര്യാണം സഭകൾക്കും വിശ്വാസികൾക്കും വലിയ നഷ്ടമാണ്. ആത്മീയ പിതാവായും ഉപദേശകനായും ശുശ്രൂഷകനായും അദ്ദേഹം നൽകിയ സംഭാവനകൾ സമൂഹം നന്ദിയോടെ സ്മരിക്കും.

ഭാര്യ :അന്നമ്മ തോമസ്. മക്കൾ സാൻഡി, ഷാരോൺ, റേച്ചൽ, ജെഫ്രി. മരുമക്കൾ സൈമൺ, പാസ്റ്റർ മനു ചെറിയാൻ, പാസ്റ്റർ ജോസ്, റെനി. കൊച്ചുമക്കൾ ആബേൽ, എലീഷ, ഷെക്കിന, ജോഷ്വ, ജസ്റ്റിൻ, റീമ, സെലാ.

- Advertisement -