തേയിലത്തോട്ടത്തിൽ നിന്ന് വൈദിക ശുശ്രൂഷയിലേക്ക് രണ്ട് വനിതാ വൈദികർ

മൂന്നാർ: തേയിലത്തോട്ടം തൊഴിലാളി കുടുംബങ്ങളിൽ നിന്നുള്ള രണ്ട് വനിതകൾ വൈദികരായി ശുശ്രൂഷയിൽ പ്രവേശിച്ചതോടെ മൂന്നാറിലെ സഭാ ചരിത്രത്തിൽ പുതിയ അധ്യായം. ഇന്ദിര അയ്യപ്പനും വിജയാ കറുപ്പുസ്വാമിയുമാണ് സി.എസ്.ഐ. സഭയിൽ വൈദികരായി അഭിഷിക്തരായത്. സെപ്റ്റംബർ 2ന് മൂന്നാർ സി.എസ്.ഐ. ക്രൈസ്റ്റ് ചർച്ചിൽ നടന്ന ചടങ്ങിലായിരുന്നു ഇരുവരുടെയും വൈദികപട്ട സ്വീകരണം.

മൂന്നാറിലെ തേയിലത്തോട്ട മേഖലയിൽ നിന്നുള്ള സാധാരണ തൊഴിലാളി കുടുംബങ്ങളുടെ പശ്ചാത്തലത്തിൽ നിന്ന് വൈദിക ശുശ്രൂഷയിലേക്ക് എത്തിയതാണ് ഇരുവരുടെയും നേട്ടത്തെ ശ്രദ്ധേയമാക്കുന്നത്. കഴിഞ്ഞ രണ്ടര വർഷമായി മൂന്നാറിലെ വിവിധ സി.എസ്.ഐ. പള്ളികളിൽ ഡീക്കന്മാരായി സേവനം ചെയ്തുവരികയായിരുന്നു ഇരുവരും.

റവ. ഇന്ദിര അയ്യപ്പൻ (49), റവ. വിജയാ കറുപ്പുസ്വാമി (48) എന്നിവർ സെപ്റ്റംബർ 2ന് വിശുദ്ധ ശുശ്രൂഷയിലേക്ക് നിയോഗിക്കപ്പെട്ടതായി സി.എസ്.ഐ. കൊച്ചി രൂപതയും അറിയിച്ചിട്ടുണ്ട്.

മുന്നാക്ക വിഭാഗങ്ങളിലോ സമ്പന്ന കുടുംബങ്ങളിലോ നിന്നല്ലാതെ തേയിലത്തോട്ട തൊഴിലാളി സമൂഹത്തിൽ നിന്നുള്ള വനിതകൾ വൈദിക ശുശ്രൂഷയിലേക്ക് ഉയർന്നുവന്നത് സാമൂഹികമായും സഭാപരമായും ശ്രദ്ധേയമായ മാറ്റമായാണ് വിലയിരുത്തപ്പെടുന്നത്.

മൂന്നാറിലെ പ്ലാന്റേഷൻ സമൂഹത്തിലെ പുതിയ തലമുറയ്ക്ക് വിദ്യാഭ്യാസത്തിലൂടെയും ആത്മീയ ശുശ്രൂഷയിലൂടെയും മുന്നേറാനുള്ള പ്രചോദനമായും ഇവരുടെ ജീവിതം മാറുകയാണ്.

- Advertisement -