ലേഖനം: കഴുമരം പണിയുന്ന വാക്കുകൾ: സേരെശു നൽകുന്ന മുന്നറിയിപ്പ് | ജോൺ കെ. പോൾ

“ഓരോ വിജയിച്ച പുരുഷന്റെയും പിന്നിൽ ഒരു സ്ത്രീയുണ്ട്” എന്നൊരു പ്രസിദ്ധമായ ചൊല്ലുണ്ട്. അതിൽ വലിയൊരു സത്യമുണ്ട്. പല പുരുഷന്മാരുടെയും ജീവിതത്തിൽ ഭാര്യയുടെ പ്രാർത്ഥനയും പ്രോത്സാഹനവും ക്ഷമയും ജ്ഞാനമുള്ള ഉപദേശവും വലിയ വിജയങ്ങൾക്ക് അടിസ്ഥാനം ആയിട്ടുണ്ട്. എന്നാൽ ഈ ചൊല്ലിന്റെ മറുവശവും നാം മറക്കരുത്. വിജയത്തിന്റെ പിന്നിൽ ഉപദേശത്തിന്റെ ഒരു ശബ്ദമുണ്ടെങ്കിൽ, ചിലപ്പോൾ നാശത്തിന്റെ പിന്നിലും തെറ്റായ ഉപദേശത്തിന്റെ ഒരു ശബ്ദമുണ്ടാകും.

ഇത് സ്ത്രീകളെ മുഴുവൻ കുറ്റപ്പെടുത്താനുള്ള വാക്കല്ല. മറിച്ച്, ഭാര്യയായാലും ഭർത്താവായാലും സുഹൃത്തായാലും ബന്ധുവായാലും; ഒരാളുടെ തെറ്റായ കോപത്തെയും അഹങ്കാരത്തെയും പ്രതികാരത്തെയും വളർത്തുന്ന ഉപദേശം എത്ര അപകടകരമാണെന്ന് ചൂണ്ടിക്കാണിക്കുന്ന ഒരു മുന്നറിയിപ്പാണ്. എസ്ഥേറിന്റെ പുസ്തകത്തിൽ തന്നെ സേരെശിന്റെ തെറ്റായ ഉപദേശത്തോടൊപ്പം എസ്ഥേറിന്റെ സമയോചിതവും ജ്ഞാനമുള്ളതുമായ ഇടപെടലും നാം കാണുന്നു. സേരെശിന്റെ വാക്കുകൾ ഹാമാന്റെ അഹങ്കാരത്തെ വളർത്തി നാശത്തിലേക്കു നയിച്ചപ്പോൾ, എസ്ഥേറിന്റെ ധൈര്യവും വിവേകവും യഹൂദജനത്തെ മുഴുവൻ രക്ഷിക്കാൻ കാരണമായി. അതിനാൽ ഇവിടെ വിമർശിക്കപ്പെടുന്നത് സ്ത്രീയെന്ന ലിംഗമല്ല; അഹങ്കാരത്തെയും കോപത്തെയും പ്രതികാരത്തെയും പ്രോത്സാഹിപ്പിക്കുന്ന തെറ്റായ മനോഭാവമാണ്. അതുപോലെ പ്രശംസിക്കപ്പെടുന്നത് ദൈവഭയത്തോടും ജ്ഞാനത്തോടും ധൈര്യത്തോടും കൂടിയ സമയോചിതമായ ഇടപെടലാണ്.

എസ്ഥേറിന്റെ പുസ്തകത്തിൽ ഹാമാന്റെ ജീവിതം ഇതിന് ശക്തമായ ഉദാഹരണമാണ്. ഹാമാൻ രാജാവിന്റെ മുമ്പിൽ ഉയർന്ന സ്ഥാനത്തുണ്ടായിരുന്നവനായിരുന്നു. സമ്പത്തും സ്ഥാനവും ബഹുമാനവും അവനുണ്ടായിരുന്നു. പക്ഷേ അവന്റെ ഉള്ളിൽ അഹങ്കാരം നിറഞ്ഞിരുന്നു. മൊർദെഖായി അവനെ വണങ്ങാത്തത് ഹാമാന്റെ ഹൃദയത്തിലെ വലിയ അഹങ്കാരത്തെ മുറിപ്പെടുത്തി. ആ മുറിവ് അവനെ ക്ഷമയിലേക്കോ, ആത്മപരിശോധനയിലേക്കോ കൊണ്ടുപോയില്ല; മറിച്ച് പ്രതികാരത്തിലേക്കാണ് നയിച്ചത്.
ഇവിടെ ശ്രദ്ധിക്കേണ്ട പ്രധാനപ്പെട്ട കഥാപാത്രമാണ് ഹാമാന്റെ ഭാര്യയായ സേരെസ്. എസ്ഥേർ 5:14 ൽ സേരെസും ഹാമാന്റെ സുഹൃത്തുക്കളും ചേർന്ന് മൊർദെഖായിയെ തൂക്കിക്കൊല്ലാൻ അമ്പത് മുഴം ഉയരമുള്ള കഴുമരം പണിയാൻ ഉപദേശം കൊടുത്തു; വചനത്തിൽ പറയുന്ന “അമ്പത് മുഴം” ഏകദേശം 75 അടി അഥവാ 23 മീറ്റർ ഉയരമാണെന്ന് ചില ഇംഗ്ലീഷ് പരിഭാഷകൾ വ്യക്തമാക്കുന്നു.
ഇവിടെയാണ് സേരെശിന്റെ മനോഭാവം തുറന്നു കാണിക്കുന്നത്. ഒരു ഭാര്യ എന്ന നിലയിൽ അവൾ ഭർത്താവിന്റെ കോപം ശമിപ്പിക്കേണ്ടവളായിരുന്നു. ഭർത്താവിന്റെ അഹങ്കാരത്തെ നിയന്ത്രിക്കാൻ ദൈവഭയമുള്ള ഒരു വാക്ക് പറയേണ്ടവളായിരുന്നു. ഇത് ശരിയല്ല; ഒരു മനുഷ്യനെ നശിപ്പിക്കാൻ നീ പോകരുത് എന്ന് പറയേണ്ട സമയത്ത്, അവൾ ചെയ്തത് അതിനു വിരുദ്ധമായിരുന്നു. അവൾ ഹാമാന്റെ കോപത്തിന് ഊർജ്ജം നൽകി; പ്രതികാരത്തിന് രൂപം നൽകി; അഹങ്കാരത്തിന് ആയുധം നൽകി.

സദൃശവാക്യങ്ങൾ 14:1 പറയുന്നു: സ്ത്രീകളിൽ ജ്ഞാനമുള്ളവൾ തന്റെ വീടു പണിയുന്നു; ഭോഷത്വമുള്ളവളോ അതു സ്വന്തകൈകളാൽ പൊളിച്ചുകളയുന്നു.
ജ്ഞാനമുള്ള സ്ത്രീ തന്റെ വീട് പണിയുന്നു; ഭോഷയായവൾ സ്വന്തം കൈകൊണ്ട് അതിനെ തകർക്കുന്നു എന്ന ആശയം ഈ വചനത്തിൽ വ്യക്തമാണ്. സേരെസ് ഒരു വീട് പണിയുന്ന സ്ത്രീയായി മാറിയില്ല; മറിച്ച് ഭർത്താവിന്റെ വീഴ്ചയ്ക്ക് വഴിയൊരുക്കുന്ന മനോഭാവത്തിന്റെ പ്രതീകമായി അവൾ മാറി.
ഇതിലും അതിശയകരമായത് എസ്ഥേർ 6:13 ലാണ്. ഹാമാൻ മൊർദെഖായിയുടെ മുമ്പിൽ അപമാനിക്കപ്പെട്ടശേഷം വീട്ടിൽവന്ന് നടന്നതെല്ലാം ഭാര്യയായ സേരെശിനോടും സുഹൃത്തുക്കളോടും പറഞ്ഞു. അപ്പോൾ അതേ സേരെസും ജ്ഞാനികളും പറഞ്ഞു: “മൊർദെഖായി യഹൂദവംശക്കാരനാണെങ്കിൽ, നീ അവനെ ജയിക്കുകയില്ല; നീ അവന്റെ മുമ്പിൽ തീർച്ചയായും വീഴും.”
ഇവിടെ ഒരു വലിയ വിരോധാഭാസമുണ്ട്. ആദ്യം കഴുമരം പണിയാൻ ഉപദേശം നൽകിയവൾ, പിന്നീട് വീഴ്ച പ്രവചിക്കുന്നു. ആദ്യം പ്രതികാരത്തിന്റെ തീയിൽ എണ്ണ ഒഴിച്ചതും അവൾ തന്നെയായിരുന്നു; പിന്നീട് തീ പടർന്നപ്പോൾ അപകടം പറഞ്ഞതും അവൾ തന്നെയായിരുന്നു. എന്നാൽ വൈകി പറയുന്ന സത്യം പലപ്പോഴും രക്ഷയാകുന്നില്ല; അത് വിധിയുടെ പ്രഖ്യാപനമായി മാത്രം മാറുന്നു.

സേരെസ് പോലുള്ള മനോഭാവങ്ങൾ ഇന്നും സമൂഹത്തിൽ കാണാം. ചില വീടുകളിൽ, ജീവിത പങ്കാളിയുടെ തെറ്റുകൾ തിരുത്തുന്നതിനു പകരം, അത് ന്യായീകരിക്കപ്പെടുന്നു. നീ ചെയ്തത് ശരിയാണ്, അവനെ പാഠം പഠിപ്പിക്കണം, നിന്റെ അഭിമാനം വിട്ടുകൊടുക്കരുത് തോറ്റുപോകരുത് എന്നിങ്ങനെ പറയുന്ന വാക്കുകൾ ചിലപ്പോൾ പിന്തുണയായി തോന്നാം. പക്ഷേ അതിൽ ദൈവഭയമില്ലെങ്കിൽ, വിവേകമില്ലെങ്കിൽ, നീതിയില്ലെങ്കിൽ, ആ വാക്കുകൾ പിന്തുണയല്ല, നാശത്തിന്റെ തുടക്കമാണ്.

യാക്കോബ് 3:6 നാവിനെ തീയായിട്ടാണ് കാണിക്കുന്നത്; ചെറിയ തീ വലിയ കാട് കത്തിക്കാം എന്ന മുന്നറിയിപ്പ് ആ അധ്യായത്തിൽ ശക്തമായി കാണുന്നു. ഒരാളുടെ നാവ് കൊണ്ട് കുടുംബം പണിയാനും കഴിയും; അതേ നാവ് കൊണ്ട് കുടുംബം തകർക്കാനും കഴിയും. സേരെസിന്റെ വാക്കുകൾ ഹാമാന്റെ ജീവിതത്തിൽ ഒരു തീപ്പൊരി പോലെ പ്രവർത്തിച്ചു. ആ തീ മൊർദെഖായിയെ കത്തിച്ചില്ല; ഒടുവിൽ ഹാമാന്റെ സ്വന്തം ജീവിതത്തെയാണ് വിഴുങ്ങിയത്.

യഥാർത്ഥ സ്നേഹം തെറ്റിനൊപ്പം നിൽക്കുന്നില്ല. യഥാർത്ഥ സ്നേഹം തെറ്റിൽ നിന്ന് തിരിച്ചു കൊണ്ടുവരുന്നു. സദൃശവാക്യങ്ങൾ 27:6 പറയുന്നു: “സ്നേഹിതൻ വരുത്തുന്ന മുറിവുകൾ വിശ്വസ്തതയുടെ ഫലം; ശത്രുവിന്റെ ചുംബനങ്ങളോ കണക്കിലധികം”.
സ്നേഹിതന്റെ മുറിവുകൾ വിശ്വസ്തമാണെങ്കിലും ശത്രുവിന്റെ ചുംബനങ്ങൾ വഞ്ചനയാകുന്നു എന്ന ആശയം അവിടെ കാണുന്നു. ചിലപ്പോൾ സ്നേഹമുള്ള ഉപദേശം മുറിവേൽപ്പിക്കുന്നതുപോലെ തോന്നാം, പക്ഷേ അത് രക്ഷയ്ക്കായിരിക്കും. എന്നാൽ എല്ലാ കാര്യത്തിലും കൈയ്യടി നൽകുന്ന ഉപദേശം സ്നേഹമല്ല; അത് പലപ്പോഴും മറഞ്ഞിരിക്കുന്ന വഞ്ചനയാണ്.

ഒരു നല്ല ഭാര്യ ഭർത്താവിന്റെ കോപത്തിന് ആയുധം നൽകുകയില്ല. ഒരു നല്ല ഭർത്താവ് ഭാര്യയുടെ തെറ്റായ തീരുമാനങ്ങളെ പ്രോത്സാഹിപ്പിക്കുകയില്ല. ഒരു നല്ല സുഹൃത്ത് പ്രതികാരത്തെ ധൈര്യമെന്നു വിളിക്കുകയില്ല. യഥാർത്ഥ കൂട്ടാളി വീഴ്ചയ്ക്കുമുമ്പ് മുന്നറിയിപ്പ് നൽകും; വീഴ്ച വന്നശേഷം പ്രവചിക്കുകയല്ല ചെയ്യുക.
സദൃശവാക്യങ്ങൾ 21:19 ൽ “ശണ്ഠയും ദുശ്ശീലവുമുള്ള സ്ത്രീയോടുകൂടെ പാർക്കുന്നതിലും നിർജ്ജനപ്രദേശത്തു പോയി പാർക്കുന്നതു നല്ലതു”.
കലഹപ്രിയയും കോപമുള്ളവളുമായ സ്ത്രീയോടൊപ്പം കഴിയുന്നതിനെക്കാൾ മരുഭൂമിയിൽ താമസിക്കുന്നത് നല്ലതാണെന്ന ശക്തമായ മുന്നറിയിപ്പ് ഇവിടെ കാണാം. ഈ വചനം സ്ത്രീയെ അപമാനിക്കാൻ ഉള്ളതല്ല; മറിച്ച് കലഹം, കോപം, വാക്കിന്റെ വിഷം, ആത്മീയ വിവേകമില്ലാത്ത കുടുംബാന്തരീക്ഷം എന്നിവ ഒരു വീടിനെ എത്രയധികം തകർക്കുമെന്നു കാണിക്കുന്നതാണ്.
ഒരു വീടിന്റെ തകർച്ച പുറത്തുനിന്ന് മാത്രം ആരംഭിക്കുന്നില്ല. പലപ്പോഴും അത് വീട്ടിനുള്ളിൽ പറയപ്പെടുന്ന തെറ്റായ വാക്കുകളിൽ നിന്നാണ് തുടങ്ങുന്നത്. ഒരു ഉപദേശം ഒരു മനുഷ്യനെ രക്ഷിക്കാം; ഒരു ഉപദേശം അവനെ നശിപ്പിക്കാം. ഒരു വാക്ക് മനുഷ്യനെ വിനയത്തിലേക്കു കൊണ്ടുപോകാം; മറ്റൊരു വാക്ക് അവനെ അഹങ്കാരത്തിന്റെ കൊടുമുടിയിലേക്ക് കയറ്റി അവിടെനിന്ന് താഴേക്ക് തള്ളിയിടാം.

ഹാമാന്റെ ജീവിതത്തിൽ സേരെസ് കൊടുത്ത ഉപദേശം അതായിരുന്നു. അവൾ ഭർത്താവിനെ രക്ഷിച്ചില്ല. അവൾ അവന്റെ അഹങ്കാരത്തെ തടഞ്ഞില്ല. അവൾ അവന്റെ പ്രതികാരത്തെ ചോദ്യം ചെയ്തില്ല. ആദ്യം അവൾ കഴുമരം പണിയാൻ പറഞ്ഞു; പിന്നീട് ആ കഴുമരം ഭർത്താവിന്റെ തന്നെ നാശത്തിന്റെ അടയാളമായി മാറി.
അതുകൊണ്ട് ഓരോ വീടും ഹൃദയപൂർവ്വം ചോദിക്കണം: നമ്മുടെ വീട്ടിൽ ഉയരുന്ന വാക്കുകൾ ഒരാളെ നീതിയിലേക്കും വിജയത്തിലേക്കും നയിക്കുന്നതാണോ, അതോ അഹങ്കാരത്തെയും കോപത്തെയും പ്രതികാരത്തെയും വളർത്തി നാശത്തിന്റെ കഴുമരം പണിയുന്നതാണോ?
നമ്മുടെ ഉപദേശങ്ങൾ കുടുംബത്തെ ഉയർത്തുന്ന പാലമാണോ? അല്ലെങ്കിൽ ആരുടെയെങ്കിലും വീഴ്ചയ്ക്കായി നാം അറിയാതെ പണിയുന്ന കഴുമരമാണോ?
സേരെസ് ഒരു വ്യക്തിയുടെ പേര് മാത്രമല്ല; അത് ഒരു മനോഭാവത്തിന്റെ പ്രതീകമാണ്.
തെറ്റായ കോപത്തെ പ്രോത്സാഹിപ്പിക്കുന്ന മനോഭാവം.
പ്രതികാരത്തെ വിജയം എന്നു കരുതുന്ന മനോഭാവം.
അഹങ്കാരത്തെ അഭിമാനം എന്നു തെറ്റിദ്ധരിപ്പിക്കുന്ന മനോഭാവം.
നാശം അടുത്തെത്തുമ്പോൾ മാത്രം സത്യം പറയുന്ന മനോഭാവം.
ഇത്തരം മനോഭാവങ്ങൾ ശക്തമായി വിമർശിക്കപ്പെടണം. കാരണം കുടുംബത്തെ തകർക്കുന്നത് എല്ലായ്പ്പോഴും ശത്രുക്കൾ മാത്രമല്ല. ചിലപ്പോൾ വീട്ടിനുള്ളിൽ നിന്നുള്ള തെറ്റായ ഉപദേശങ്ങളാണ് ഏറ്റവും വലിയ ശത്രു.
ഹാമാനെ മൊർദെഖായി നശിപ്പിച്ചില്ല; ഹാമാന്റെ സ്വന്തം അഹങ്കാരവും അതിനെ പ്രോത്സാഹിപ്പിച്ച ഉപദേശങ്ങളുമാണ് അവനെ നശിപ്പിച്ചത്.

അവസാനമായി, സേരെസിന്റെ കഥ ഓരോ കുടുംബത്തോടും പറയുന്നത് ഇതാണ്: വീട്ടിലെ വാക്കുകൾ സൂക്ഷിക്കുക. ഉപദേശം ദൈവഭയത്തിൽ നിന്നാകണം. സ്നേഹം സത്യത്തോടുകൂടിയതാകണം. പിന്തുണ നീതിയോടുകൂടിയതാകണം. അല്ലെങ്കിൽ നാം മറ്റൊരാൾക്കായി പണിയുന്ന കഴുമരം, ഒരുദിവസം നമ്മുടെ സ്വന്തം വീടിന്റെ നാശത്തിന്റെ അടയാളമായി മാറാം.

ജോൺ കെ. പോൾ

- Advertisement -