അമ്മയുടെ മരണത്തെ തുടർന്ന് രണ്ടാഴ്ച മുമ്പ് നാട്ടിലെത്തിയ മകൻ വാഹനാപകടത്തിൽ മരിച്ചു

മാനന്തവാടി: അമ്മയുടെ മരണത്തെ തുടർന്ന് രണ്ടാഴ്ച മുമ്പ് വിദേശത്തുനിന്ന് നാട്ടിലെത്തിയ യുവാവ് വാഹനാപകടത്തിൽ മരിച്ചു. എടവക കരിന്തിരിക്കടവ് പാറച്ചാലിൽ ദീപു ജോൺ (33) ആണ് മരിച്ചത്.ശനിയാഴ്ച രാത്രി 7.45 ഓടെ മാനന്തവാടി ലിറ്റിൽ ഫ്ലവർ യു.പി. സ്കൂളിന് മുന്നിലായിരുന്നു അപകടം. ബസ് സ്റ്റാൻഡ് ഭാഗത്തുനിന്ന് എൽ.എഫ്. സ്കൂൾ കവലയിലേക്ക് വരികയായിരുന്ന ദീപു ഓടിച്ചിരുന്ന ബുള്ളറ്റ് മുന്നിലുണ്ടായിരുന്ന ഓട്ടോറിക്ഷയിൽ ഇടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണം നഷ്ടപ്പെട്ട ബുള്ളറ്റ് റോഡിലേക്ക് മറിഞ്ഞു.

വാഹനത്തിൽനിന്ന് തെറിച്ചുവീണ ദീപു എതിർദിശയിൽ വരികയായിരുന്ന റിക്കവറി വാഹനത്തിനടിയിൽപ്പെടുകയായിരുന്നു. ഗുരുതരമായി പരിക്കേറ്റ ദീപു സംഭവസ്ഥലത്തുവച്ചുതന്നെ മരിച്ചു.മൃതശരീരം ഉടൻ തന്നെ വയനാട് ഗവ. മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.

ദീപുവിന്റെ മാതാവ് മേരി സെപ്റ്റംബർ 11നാണ് മരിച്ചത്. അമ്മയുടെ മരണത്തെ തുടർന്ന് വിദേശത്തായിരുന്ന ദീപു രണ്ടാഴ്ച മുമ്പാണ് നാട്ടിലെത്തിയത്. അമ്മയുടെ വിയോഗത്തിൽ കുടുംബത്തോടൊപ്പം കഴിയുന്നതിനിടെയാണ് ദാരുണമായ അപകടമുണ്ടായത്.

കരിന്തിരിക്കടവ് പാറച്ചാലിൽ ഓനിച്ചന്റെയും പരേതയായ മേരിയുടെയും മകനാണ് ദീപു ജോൺ. ഭാര്യ ഡോ. എമിലി ദുബായിലാണ്. ദമ്പതികൾക്ക് ഒരു കുട്ടിയുണ്ട്. സഹോദരി ദിവ്യ ജോൺ.

അപ്രതീക്ഷിതമായ അപകടത്തിൽ ദീപുവിന്റെ മരണം കുടുംബത്തിലും ബന്ധുക്കൾക്കിടയിലും വലിയ ദുഃഖത്തിനിടയാക്കി. മൃതദേഹത്തിന്റെ പോസ്റ്റ്മോർട്ടം ഉൾപ്പെടെയുള്ള നടപടികൾ വയനാട് ഗവ. മെഡിക്കൽ കോളജിൽ പൂർത്തിയാക്കിയ ശേഷം സംസ്കാര ചടങ്ങുകൾ നടത്തും.

- Advertisement -