ഗ്രഹാം സ്റ്റെയിൻസ് വധക്കേസ്: ദാരാ സിങ്ങിന്റെ ശിക്ഷ ഇളവ് ഹർജി ഒഡിഷ സർക്കാർ തള്ളി

ന്യൂഡൽഹി: ഓസ്ട്രേലിയൻ ക്രിസ്ത്യൻ മിഷനറി ഗ്രഹാം സ്റ്റെയിൻസിനെയും രണ്ട് മക്കളെയും കൊലപ്പെടുത്തിയ കേസിൽ ജീവപര്യന്തം തടവ് അനുഭവിക്കുന്ന രവീന്ദ്രകുമാർ പാൽ എന്ന ദാരാ സിങ്ങിന്റെ ശിക്ഷാ ഇളവ് (റിമിഷൻ) അപേക്ഷ ഒഡിഷ സർക്കാർ തള്ളി. സെപ്റ്റംബർ 17-ന് സുപ്രീംകോടതിയിൽ കേസ് പരിഗണിക്കാനിരിക്കെയാണ് സർക്കാരിന്റെ തീരുമാനം.

1999 ജനുവരി 22-ന് ഒഡിഷയിലെ മനോഹർപൂരിൽ വാഹനത്തിനുള്ളിൽ ഉറങ്ങിക്കിടന്നിരുന്ന ഗ്രഹാം സ്റ്റെയിൻസിനെയും മക്കളായ ഫിലിപ്പ് (10), തിമോത്തി (6) എന്നിവരെയും തീകൊളുത്തി കൊലപ്പെടുത്തിയ കേസിലാണ് ദാരാ സിങ് ശിക്ഷിക്കപ്പെട്ടത്. 2003-ൽ സി.ബി.ഐ. കോടതി ദാരാ സിങ്ങിന് വധശിക്ഷ വിധിച്ചു. തുടർന്ന് ഒഡിഷ ഹൈക്കോടതി 2005-ൽ വധശിക്ഷ ജീവപര്യന്തമായി കുറച്ചു. സുപ്രീംകോടതിയും പിന്നീട് ശിക്ഷ ശരിവച്ചു.

26 വർഷത്തിലേറെയായി തടവിൽ കഴിയുന്ന ദാരാ സിങ് 2024-ൽ സുപ്രീംകോടതിയെ സമീപിച്ച് ശിക്ഷാ ഇളവ് പരിഗണിക്കണമെന്ന് ആവശ്യപ്പെട്ടിരുന്നു. ഒഡിഷ സർക്കാരിന്റെ 2022-ലെ റിമിഷൻ നയപ്രകാരം അദ്ദേഹത്തിന്റെ അപേക്ഷ പരിഗണിക്കാവുന്ന ഘട്ടത്തിലെത്തിയിരുന്നു.

അപേക്ഷയിൽ തീരുമാനം എടുക്കുന്നതിൽ സംസ്ഥാന സർക്കാർ തുടർച്ചയായി കാലതാമസം വരുത്തിയതിനെ സുപ്രീംകോടതി അടുത്തിടെ വിമർശിച്ചിരുന്നു. ജസ്റ്റിസുമാരായ മനോജ് മിശ്ര, വിജയ് ബിഷ്ണോയ് എന്നിവർ ഉൾപ്പെട്ട ബെഞ്ച്, തീരുമാനം അനിശ്ചിതമായി നീട്ടിക്കൊണ്ടുപോകാൻ കഴിയില്ലെന്നും ആവശ്യമായാൽ ഉദ്യോഗസ്ഥരെ വിളിച്ചുവരുത്തുമെന്നും വ്യക്തമാക്കിയിരുന്നു.

തുടർന്ന് ഒഡിഷയിലെ സ്റ്റേറ്റ് സെന്റൻസ് റിവ്യൂ ബോർഡ് ദാരാ സിങ്ങിന്റെ ശിക്ഷാ ഇളവ് ശുപാർശ ചെയ്യേണ്ടതില്ലെന്ന് തീരുമാനിച്ചു. നിലവിലെ സാഹചര്യങ്ങളും അദ്ദേഹത്തെ മോചിപ്പിക്കുന്നതിന്റെ സാമൂഹിക പ്രത്യാഘാതങ്ങളും പരിഗണിച്ചാണ് തീരുമാനം എന്നാണ് സർക്കാർ വൃത്തങ്ങൾ വ്യക്തമാക്കിയത്.

അതേസമയം, 2025 ഏപ്രിലിൽ കേസിലെ മറ്റൊരു പ്രതിയായ മഹേന്ദ്ര ഹെംബ്രം നല്ല പെരുമാറ്റത്തിന്റെ അടിസ്ഥാനത്തിൽ നേരത്തെ മോചിതനായിട്ടുണ്ട്. ഇതും ദാരാ സിങ്ങിന്റെ ഹർജിയുമായി ബന്ധപ്പെട്ട നടപടികളിൽ ചർച്ചയായിട്ടുണ്ട്. സർക്കാരിന്റെ പുതിയ തീരുമാനം സെപ്റ്റംബർ 17-ലെ സുപ്രീംകോടതി പരിഗണനയിൽ വരും. സർക്കാർ സ്വീകരിച്ച തീരുമാനം കോടതി പരിശോധിക്കുന്നതോടെ ദാരാ സിങ്ങിന്റെ ശിക്ഷാ ഇളവ് സംബന്ധിച്ച തുടർനടപടികൾ വ്യക്തമാകും.

- Advertisement -