ഇന്നത്തെ ചിന്ത : നാശം, വീഴ്ച | ജെ. പി വെണ്ണിക്കുളം

സദൃശ്യവാക്യങ്ങൾ 16:18
നാശത്തിന്നു മുമ്പെ ഗർവ്വം; വീഴ്ചക്കു മുമ്പെ ഉന്നതഭാവം.

ഒരു മനുഷ്യന്റെ നാശത്തിനും വീഴ്ചയ്ക്കും കാരണമാകുന്ന വസ്തുതകളാണ് ശലോമോൻ ഇവിടെ പറയുന്നത്. ഗർവ്വവും ഉന്നതഭാവവും അത്രേ അതിനു കാരണം. ബൈബിൾ ചരിത്രത്തിൽ ആരെല്ലാം അഹങ്കാരികളായി തീർന്നുവോ അവർക്കെല്ലാം ഉണ്ടായ നഷ്ടം ചെറുതല്ല. സദൃ. 11:2 പറയുന്നു, “അഹങ്കാരം വരുമ്പോൾ ലജ്ജയും വരുന്നു; താഴ്മയുള്ളവരുടെ പക്കലോ ജ്ഞാനമുണ്ടു”. സദൃ. 17:19 പറയുന്നു, “കലഹപ്രിയൻ ലംഘനപ്രിയൻ ആകുന്നു; പടിവാതിൽ പൊക്കത്തിൽ പണിയുന്നവൻ ഇടിവു ഇച്ഛിക്കുന്നു”. സദൃ. 18:12 “നാശത്തിന്നു മുമ്പെ മനുഷ്യന്റെ ഹൃദയം നിഗളിക്കുന്നു; മാനത്തിന്നു മുമ്പെ താഴ്മ”. യിരേമ്യാവു 49:16 നോക്കൂ, “പാറപ്പിളർപ്പുകളിൽ പാർത്തു കുന്നുകളുടെ മുകൾ പിടിച്ചുകൊണ്ടിരിക്കുന്നവനേ, നിന്റെ ഭയങ്കരത്വം വിചാരിച്ചാൽ നിന്റെ ഹൃദയത്തിലെ അഹങ്കാരം നിന്നെ ചതിച്ചിരിക്കുന്നു; നീ കഴുകനെപ്പോലെ നിന്റെ കൂടു ഉയരത്തിൽ വെച്ചാലും അവിടെനിന്നു ഞാൻ നിന്നെ താഴെ ഇറങ്ങുമാറാക്കും എന്നു യഹോവയുടെ അരുളപ്പാടു”. പ്രിയരേ, അഹങ്കാരികളോട് ദൈവം എതിർത്തു നിൽക്കുമ്പോൾ താഴ്മയുള്ളവരെ അവിടുന്ന് കടാക്ഷിക്കുന്നു. ദൈവീക സ്വഭാവത്തിന് ഉടമകളാകാൻ നമുക്ക് ഇടയാകട്ടെ.

ജെ. പി വെണ്ണിക്കുളം

-ADVERTISEMENT-