കാണികളായി എത്തുന്ന സന്ദർശകർക്കു 2 ദിവസത്തിനുള്ളിൽ വീസ: പോർട്ടൽ തുടങ്ങി ഖത്തർ

ദോഹ ∙സാംസ്‌കാരിക, വിനോദസഞ്ചാര പരിപാടികളിലും കായിക ടൂർണമെന്റുകളിലും കാണികളായി എത്തുന്ന സന്ദർശകർക്കായി ഖത്തർ പുതിയ ഇ-വീസ പോർട്ടൽ തുടങ്ങി. ആഭ്യന്തര മന്ത്രാലയത്തിലെ വീസ സപ്പോർട് സർവീസ് വകുപ്പാണ് പുതിയ പോർട്ടൽ തുടങ്ങിയത്.

കായികം, സാംസ്‌കാരികം, വിനോദ സഞ്ചാരം എന്നിവയുമായി ബന്ധപ്പെട്ട ഏത് പരിപാടികള്‍ക്കും കാണികളായി  രാജ്യത്തേക്ക് എത്താൻ ആഗ്രഹിക്കുന്നവർ http://www.qatarportal.gov.qa/ എന്ന വെബ്‌സൈറ്റിൽ വീസയ്ക്ക് അപേക്ഷിക്കണമെന്ന് വീസ സപ്പോർട് സർവീസ് വകുപ്പ് ഡയറക്ടർ മേജർ അബ്ദുല്ല ഖലീഫ അൽ മുഹന്നദി വാർത്താസമ്മേളനത്തിൽ വ്യക്തമാക്കി. രാജ്യത്ത് നടക്കുന്നതും നടക്കാനിരിക്കുന്നതുമായ മുഴുവൻ പരിപാടികളുടെയും വിശദാംശങ്ങളും പോർട്ടലിലുണ്ട്.