പ്രവാചകം: സൂയെസ്കനാൽ തകർന്നുപോകും | പാസ്റ്റർ സണ്ണി പി സാമുവൽ

സമീപമാസങ്ങളിൽ, മദ്ധ്യപൂർവ്വേഷ്യയിലെ രാഷ്ട്രീയ സംഘർഷങ്ങൾ ആഗോള സമ്പദ്‌വ്യവസ്ഥയെ തകർച്ചയുടെ വക്കിലേക്കു തള്ളിയിട്ടതു ലോകം ഞെട്ടലോടെയാണു നോക്കിക്കണ്ടത്. ബാബ്-എൽ-മന്ദാബിന് ചുറ്റുമുള്ള സമുദ്രഗതാഗതത്തെ ഹൂതി സേന ഫലപ്രദമായി തടസ്സപ്പെടുത്തുകയും സൂയസ് കനാലിനു ഭീഷണി ഉയർത്തുകയും ചെയ്തതോടെ, ഗ്രഹത്തിലെ ഏറ്റവും പ്രധാനപ്പെട്ട വ്യാപാരപാതകളിലൊന്നു പെട്ടെന്നു അപകടത്തിലാവുകയാണ്. സൗദി അറേബ്യയിൽ നിന്നുള്ള എണ്ണ വിതരണവും ഏഷ്യയിൽ നിന്നുള്ള അവശ്യസാധനങ്ങളുടെ നീക്കവും തടയപ്പെടുകയും തടസ്സപ്പെടുകയും വഴിതിരിച്ചുവിടപ്പെടുകയും ചെയ്യുന്നു. ആധുനിക വിശകലനവിദഗ്ദ്ധർ ഇതിനെ ഒരു രാഷ്ട്രീയ, സൈനിക പ്രതിസന്ധിയായി മാത്രം കാണുമ്പോൾ, ബൈബിൾ പ്രവചനങ്ങൾ പഠിക്കുന്നവർ ഇതിനേക്കാൾ വളരെ ആഴത്തിലുള്ള എന്തോ ഒന്നു തിരിച്ചറിയുന്നു. ഈ ജലാശയം നിർവീര്യമാക്കപ്പെടുന്ന ഒരു ദിവസത്തെക്കുറിച്ചു ആയിരക്കണക്കിനു വർഷങ്ങൾക്കു മുമ്പു, യെശയ്യാവു മുൻകൂട്ടി പ്രവചിച്ചിരുന്നു. ഇന്നു നാം സാക്ഷ്യം വഹിക്കുന്നതു ഒരു പുരാതന പ്രവചനകല്പനയുടെ ആധുനികമായ വിന്യാസമാണ്.

മിസ്രയീംകടലിനെതിരെയുള്ള യഹോവയുടെ ഭാരം

ഒരു രാഷ്ട്രത്തിനെതിരെയുള്ള ദിവ്യമായ അരുളപ്പാടിനെയോ ന്യായവിധിയെയോ പലപ്പോഴും “ഭാരം” (ഹീബ്രുവിൽ മസ്സ -massa) എന്ന വാക്കുകൊണ്ടാണു ബൈബിൾഭാഷയിൽ വിവക്ഷക്കുന്നത് -ദൈവം വെളിപ്പെടുത്തിയ ഒരു വലിയ പ്രവചനഭാരം. അത്തരം ഒരു പ്രവചനഭാരമാണു പ്രവാചകനായ യിസ്രായേലിന്റെ ചരിത്രപരമായ അതിർത്തിയുടെ തെക്കുപടിഞ്ഞാറൻ ഭാഗത്തേക്കു കണ്ണോടിച്ചു വിളിച്ചുപറയുന്നത്. “യഹോവ മിസ്രയീംകടലിന്റെ നാവിന്നു ഉന്മൂലനാശം വരുത്തും; അവൻ ഉഷ്ണക്കാറ്റോടുകൂടെ നദിയുടെ മീതെ കൈ ഓങ്ങി അതിനെ അടിച്ചു ഏഴു കൈവഴികളാക്കി ചെരിപ്പു നനയാതെ കടക്കുമാറാക്കും (യെശയ്യാവ് 11:15)” ” And the LORD shall utterly destroy the tongue of the Egyptian sea; and with his mighty wind shall he shake his hand over the river, and shall smite it in the seven streams, and make men go over dry shod (Isaiah: 11:15).” The LORD will dry up the gulf of the Egyptian sea; with a scorching wind he will sweep his hand over the Euphrates River. He will break it up into seven streams so that anyone can cross over in sandals.” എന്നാണു NIV-യിൽ. “The Lord will divide the Gulf of Suez with a scorching wind he will sweep his hand over the Euphrates River. He will break it up into seven streams so that anyone can cross over in sandals.” എന്നാണു CSB-യിൽ കാണുന്നത്.

ഇവിടെ പരാമർശിച്ചിരിക്കുന്ന “മിസ്രയീംകടൽ” ചെങ്കടലാണ്, അതിന്റെ “നാവ്” ആധുനിക സൂയസ് കനാലും. ഈ പ്രധാന ജലപാത പൂർണ്ണമായും നശിപ്പിക്കപ്പെടുമെന്നോ അല്ലെങ്കിൽ ദൈവിക ഇടപെടലിലൂടെ വറ്റിപ്പോകുമെന്നോ പ്രവചനം അവകാശപ്പെടുന്നു. അശ്ശൂർ എന്ന വാക്കു വന്നതിനാലാണു യൂഫ്രട്ടീസ് എന്ന വാക്കു രണ്ടു വിവർത്തനങ്ങളിലും ഉൾപ്പെടുത്തിയിരിക്കുന്നത്.

ലെഷോൻ എന്ന വാക്കിന്റെ അർത്ഥം

ഇവിടെ നാവു എന്നതിനു ഉപയോഗിച്ചിരിക്കുന്ന ‘ലെഷോൻ’ (Leshone) എന്ന എബ്രായപദത്തിനു മൂന്നു അർത്ഥങ്ങളാണുള്ളത്. നാവു, ഭാഷ എന്നും, ഭൂമിശാസ്ത്രപരമായ അർത്ഥത്തിൽ നാവിന്റെ ആകൃതിയിലുള്ള ഒരു ജലാശയം അഥവാ ഉൾക്കടൽ എന്നും അർത്ഥം (യോശുവ:25:3; 28:19 KJV-യിൽ നോക്കുക). ഭൂമിശാസ്ത്രപരമായി, സൂയസ് ഉൾക്കടൽ ഈജിപ്ഷ്യൻ മരുഭൂമിയിലേക്കും മെഡിറ്ററേനിയൻ കടലിസേക്കും നീളുന്ന നാക്കുപോലെ നീണ്ടുനിവർന്നുകിടക്കുന്നു. മിസ്രയീംകടലിന്റെ “നാവിനെ” അടിക്കുന്നതിലൂടെ, ദൈവം ആ പ്രദേശത്തിന്റെ ഭൗമരാഷ്ട്രീയ അഹങ്കാരത്തെയും സാമ്പത്തിക സ്വാധീനത്തെയും നിശബ്ദമാക്കും എന്നു പ്രവചനം. ആഗോള വ്യാപാരത്തിൽ ആധിപത്യത്തിന്റെ “നാവായ” ആധുനിക കപ്പൽപ്പാത നിശബ്ദമാക്കപ്പെടും/ശൂന്യമാക്കപ്പടും. “ഉന്മൂലനം വരുത്തും” എന്നുപറഞ്ഞാൽ ദൈവം നീക്കാൻ ഉദ്ദേശിക്കുന്നതിനെ പൂർണ്ണമായും നിർവീര്യമാക്കുക എന്നാണു അർത്ഥമാക്കേണ്ടത്.

കനാൽ നിർമ്മാണം

സൂയസ് കനാലിന്റെ ആകെ നീളം 193.30 കിലോമീറ്റർ (120.11 മൈൽ) ആണ്. ഇതു വടക്കു മെഡിറ്ററേനിയൻ കടലിലെ പോർട്ട് സെയ്ദ് മുതൽ തെക്കു ചെങ്കടലിലെ സൂയസ് തുറമുഖം വരെയുള്ള ദൂരമാണ്. കനാലിന്റെ ജലോപരിതലത്തിലെ ആകെ വീതി ഏകദേശം 313 മീറ്ററാണ്. എന്നാൽ കപ്പലുകൾക്കു സഞ്ചരിക്കാൻ അനുയോജ്യമായ നാവിഗേഷൻ ചാനലിന്റെ (Navigational channel) വീതി 200 മുതൽ 210 മീറ്റർ വരെയാണ്. പരമാവധി ആഴം 24 മീറ്റർ (79 അടി) ആണ്. ഇത് ലോകത്തിലെ ഏറ്റവും വലിയ ഭീമൻ ചരക്കുകപ്പലുകൾക്കു (Suezmax) വരെ സുരക്ഷിതമായി കടന്നുപോകാൻ പര്യാപ്തമാക്കുന്നു.

സൂയസ് കനാൽ (Suez Canal) നിർമ്മാണത്തിനു ഏകദേശം 10 വർഷം വേണ്ടിവന്നു. 1859 ഏപ്രിൽ 25-നു നിർമ്മാണം ആരംഭിച്ചു, പൂർത്തിയായി ഉദ്ഘാടനം ചെയ്തതു 1869 നവംബർ 17-നു ആയിരുന്നു. ഫ്രഞ്ച് നയതന്ത്രജ്ഞനായ ഫെർഡിനാൻഡ് ഡി ലെസെപ്സിന്റെ (Ferdinand de Lesseps) നേതൃത്വത്തിലാണു ഈ കനാൽ നിർമ്മിക്കപ്പെട്ടതു. മെഡിറ്ററേനിയൻ കടലിനെയും ചെങ്കടലിനെയും തമ്മിൽ ബന്ധിപ്പിക്കുന്ന ഈ കൃത്രിമ ജലപാതനിലവിൽ വന്നതോടെ യൂറോപ്പിൽനിന്നു ഏഷ്യയിലേക്കുള്ള യാത്രാദൂരം 7,000 കിലോമീറ്റർ (4,300 മൈൽ) വരെ കുറയ്ക്കാൻ സാധിച്ചു.

മണ്ണിന്റെയും മറ്റും അളവു

1869-ൽ സൂയസ് കനാൽ ആദ്യമായി നിർമ്മിച്ചപ്പോൾ ഏകദേശം 74 ദശലക്ഷം മുതൽ 75 ദശലക്ഷം വരെ ക്യൂബിക് മീറ്റർ (74–75 million cubic meters) മണ്ണും മണലുമാണ് ഖനനം ചെയ്ത് മാറ്റേണ്ടി വന്നത്. ഉദ്ഘാടന സമയത്തു ഈ കനാലിനു വെറും 8 മീറ്റർ ആഴവും, അടിത്തട്ടിൽ 22 മീറ്റർ വീതിയും മാത്രമേ ഉണ്ടായിരുന്നുള്ളൂ. 2014-ൽ കനാൽ വീതികൂട്ടാനും സമാന്തര പാത നിർമ്മിക്കാനുമായി ഒരു വിപുലീകരണ പദ്ധതി ആരംഭിച്ചിരുന്നു. ഈ പുതിയ പദ്ധതിക്കുവേണ്ടി മാത്രം കേവലം ഒരു വർഷം കൊണ്ടു 500 ദശലക്ഷം ക്യൂബിക് മീറ്ററിലധികം മണ്ണാണു നീക്കം ചെയ്തത്. ആകെ മൊത്തം ഏകദേശം 575 ദശലക്ഷം ക്യൂബിക് മീറ്ററിലധികം (575+ million cubic meters) മണ്ണും മണലുമാണ് ഇതുവരെ നീക്കം ചെയ്തിട്ടുള്ളത്. കൂടാതെ, ചരിത്രത്തിലുടനീളം വലിയ കപ്പലുകൾക്കു സുഗമമായി സഞ്ചരിക്കാൻ പാകത്തിൽ കനാലിന്റെ ആഴവും വീതിയും കൂട്ടുന്നതിനായി പലതവണ ചെറിയ തോതിലുള്ള ഖനനങ്ങളും (Dredging) നടത്തിയിട്ടുണ്ട്.

മണ്ണും മണലും എന്തുചെയ്തു?

കനാൽ നിർമ്മിച്ച പാതയ്ക്കു തൊട്ടടുത്തുള്ള മരുഭൂമിയിലെ ശൂന്യമായ പ്രദേശങ്ങളിലാണു ഭൂരിഭാഗം മണ്ണും തള്ളിയത്. ഇതു കനാലിനു ഇരുവശത്തുമായി വലിയ മൺതിട്ടകളും കൃത്രിമമലകളും രൂപപ്പെടാൻ കാരണമായി. കനാൽ കടന്നുപോകുന്ന വഴിയിലുള്ള തിംസ തടാകം (Lake Timsah), ഗ്രേറ്റ് ബിറ്റർ തടാകം (Great Bitter Lake) തുടങ്ങിയ സ്വാഭാവിക തടാകങ്ങളുടെ തീരങ്ങൾ ബലപ്പെടുത്താനും ഈ മണ്ണു ഉപയോഗിച്ചു. കനാൽ നിർമ്മാണത്തോടോ അനുബന്ധിച്ചു രൂപംകൊണ്ട പോർട്ട് സെഡ് (Port Said), ഇസ്മാഈലിയ (Ismailia) തുടങ്ങിയ നഗരങ്ങളിലെ താഴ്ന്ന പ്രദേശങ്ങൾ നികത്താനും പുതിയ റോഡുകളും കെട്ടിടങ്ങളും നിർമ്മിക്കാനും ഈ മണ്ണു വലിയ തോതിൽ ഉപയോഗിച്ചു. 2015-ൽ വലിയ തോതിൽ മണ്ണു നീക്കം ചെയ്തപ്പോൾ, അതു കനാലിനു സമാന്തരമായി മറ്റൊരു പുതിയ മൺതിട്ട രൂപീകരിക്കാനും അവിടുത്തെ സൈനിക ആവശ്യങ്ങൾക്കായുള്ള സുരക്ഷാമതിലുകൾ (Embankments) നിർമ്മിക്കാനുമാണു പ്രധാനമായും ഉപയോഗിച്ചത്.

ആഫ്രിക്കയും ഏഷ്യയും കൂട്ടിയിടിക്കുമോ?

ഈ പ്രവചനം നിവൃത്തിക്കപ്പെടേണമെങ്കിൽ ആഫ്രിക്കയും ഏഷ്യയും അവയുടെ വിഭജനത്തിനു മുമ്പുണ്ടായിരുന്ന അവസ്തയിലേക്കു മടങ്ങിവരണം. മാനുഷികമായി അതോ അസാദ്ധ്യമാണ്. എന്നാൽ ദൈവത്താൽ സാദ്ധ്യം. ഭൂമിശാസ്ത്രപരമായ വലിയൊരു മാറ്റത്തിലൂടെ ആഫ്രിക്കൻ വൻകര ഇന്നു രണ്ടായി പിളരുന്നു (East African Rift) കൊണ്ടിരിക്കുകയാണ്. ഇതു പ്രാവചനികമായി, ഭാവിയിൽ സൂയസ് കനാലിന്റെ നിലനില്പുതന്നെ ഇല്ലാതാക്കാൻ അല്ലെങ്കിൽ അതിന്റെ ആവശ്യകത ഇല്ലാതാക്കാൻ കാരണമായേക്കാം എന്നു ഞാൻ കരുതുന്നു, വിശ്വസിക്കുന്നു. ആഫ്രിക്കയുടെ കിഴക്കൻ ഭാഗം (സോമാലി പ്ലേറ്റ്) പ്രധാന ഭൂവിഭാഗത്തിൽ (നുബിയൻ പ്ലേറ്റ്) നിന്നു അകന്നു മാറിക്കൊണ്ടിരിക്കുകയാണ്. ഇതിന്റെ ഫലമായി പുതിയൊരു സമുദ്രം രൂപപ്പെടും. ഇങ്ങനെ ആഫ്രിക്ക പൂർണ്ണമായും പിളർന്ന് പുതിയൊരു വലിയ സമുദ്രപാത തുറക്കപ്പെടുമ്പോൾ, കപ്പലുകൾക്കു ഏഷ്യയിൽനിന്നു യൂറോപ്പിലേക്കു പോകാൻ ഇടുങ്ങിയതും മനുഷ്യനിർമ്മിതവുമായ സൂയസ് കനാലിനെ ആശ്രയിക്കേണ്ടി വരില്ല. വിശാലമായ ആ പുതിയ സമുദ്രത്തിലൂടെ കപ്പലുകൾക്കു എളുപ്പത്തിൽ സഞ്ചരിക്കാം. സൂയസ് കനാൽ സ്ഥിതി ചെയ്യുന്ന ‘ഗൾഫ് ഓഫ് സൂയസ്’ പ്രദേശം യഥാർത്ഥത്തിൽ ഒരു ഭൗമ വിള്ളൽ മേഖലയാണ് (Suez Rift). ശാസ്ത്രജ്ഞരുടെ പുതിയ പഠനങ്ങൾ പ്രകാരം ഈ ഭാഗം പ്രതിവർഷം 0.5 മില്ലിമീറ്റർ എന്ന തോതിൽ ഇപ്പോഴും അകന്നു മാറിക്കൊണ്ടിരിക്കുന്നുണ്ട്. ആഫ്രിക്ക പിളരുന്നതിന്റെ ഭാഗമായുണ്ടാകുന്ന ശക്തമായ ഭൂകമ്പങ്ങളും ഭൂഗർഭ ചലനങ്ങളും കനാലിന്റെ ഘടനയെ തകർക്കാനും, മണ്ണിടിച്ചിലിലൂടെ കനാൽപാത പൂർണ്ണമായി അടഞ്ഞുപോകാനും കാരണമായേക്കാം. സൂയസ് കനാലിൽ നിലവിൽ വലിയ അണക്കെട്ടുകളോ ലോക്കുകളോ (Locks) ഇല്ല. അതുകൊണ്ടുതന്നെ ഇരുവശങ്ങളിലെയും സമുദ്രനിരപ്പിൽ വലിയ വ്യത്യാസമുണ്ടായാൽ കനാലിലൂടെയുള്ള കപ്പൽ ഗതാഗതം അസാധ്യമായി മാറും. ചുരുക്കത്തിൽ, പ്രകൃതി തന്നെ ആഫ്രിക്കയെ പിളർത്തി വളരെ വലിയൊരു സ്വാഭാവിക ജലപാത നിർമ്മിക്കുമ്പോൾ, മനുഷ്യൻ നിർമ്മിച്ച ഇടുങ്ങിയ സൂയസ് കനാൽ എന്ന സംവിധാനം ചരിത്രത്തിന്റെ ഭാഗമായി മാറി ഉന്മൂലനം ചെയ്യപ്പെടും.

വരുന്നൂ വിശുദ്ധപെരുവഴി

ദൈവം എന്തിനാണ് ഒരു കടൽ നശിപ്പിക്കുകയോ വറ്റിക്കുകയോ ചെയ്യുന്നത്? ഇതിനുള്ള ഉത്തരം പ്രവചനത്തിൽത്തന്നെയുണ്ട് -ഒരു ദൈവിക പെരുവഴി (Highway) നിർമ്മിക്കുക. “മിസ്രയീമിൽനിന്നു പുറപ്പെട്ട നാളിൽ യിസ്രായേലിന്നുണ്ടായിരുന്നതുപോലെ, അശ്ശൂരിൽനിന്നു അവന്റെ ജനത്തിൽ ശേഷിക്കുന്ന ശേഷിപ്പിന്നു ഒരു പെരുവഴിയുണ്ടാകും (യെശ:11:16).” ഇതു ഭാവികാലപ്രവചനമാണ്. ഉൾക്കടലിലെ വെള്ളം വറ്റുകയോ ഉൾക്കടൽ ഇല്ലാതാവുകയോ ചെയ്യുമ്പോൾ, തടസ്സം അപ്രത്യക്ഷമാകുന്നു; തീരങ്ങൾ ഫലപ്രദമായി കൂട്ടിമുട്ടുകയും വഴി രൂപാന്തരപ്പെടുകയും ചെയ്യുന്നു.

പുറപ്പാടിന്റെ സമയത്തു തൻ്റെ ജനത്തെ ഫറവോനിൽ നിന്ന് രക്ഷിക്കാൻ ദൈവം ചെങ്കടൽ പിളർത്തതുപോലെ; ദൈവം ഒരു പുതിയ പുറപ്പാടു വാഗ്ദാനം ചെയ്യുന്നു. മനുഷ്യന്റെ തടസ്സങ്ങൾക്കോ യുദ്ധക്കപ്പലുകൾക്കോ ഹൂതികളെപ്പോലുള്ള ഭീകര ഭീഷണികൾക്കോ ദൈവം കല്പിച്ചതിനെ തടയാനാവില്ല. നിലവിൽ ആഗോളഗതാഗതത്തിനു കാരണമായ ജലാശയം അസന്നിഗ്ദ്ധമായി നീക്കം ചെയ്യപ്പെട്ടിരിക്കും. അതു അവന്റെ ജനത്തിൽ അവശേഷിക്കുന്നവർക്കു നാട്ടിലേക്കു മടങ്ങാൻ നേരുള്ള സുരക്ഷിതവും അത്ഭുതകരവുമായ ഒരു പെരുവഴി ഉണ്ടാക്കുന്നതിനു വേണ്ടിയാണ്.

സൂയസ് സമുദ്രപാത അഭൂതപൂർവ്വമായ അപകടത്തെ അഭിമുഖീകരിക്കുമ്പോൾ, മനുഷ്യവ്യാപാരത്തിന്റെ തകർച്ച പലപ്പോഴും പ്രവചനങ്ങളുടെ പൂർത്തീകരണത്തിനുള്ള ഉൽപ്രേരകമാണെന്നു യെശയ്യാവിന്റെ വാക്കുകൾ നമ്മെ ഓർമ്മിപ്പിക്കുന്നു.

പാസ്റ്റർ സണ്ണി പി സാമുവൽ