താലന്തുകൾ ദൈവമഹത്വത്തിനായി — ഐപിസി ടാബർനാക്കിൾ അജ്മാനിൽ പ്രതിഭകൾക്ക് ആദരം

അജ്മാൻ: ദൈവം ഓരോരുത്തർക്കും നൽകിയിരിക്കുന്ന താലന്തുകളെ തിരിച്ചറിഞ്ഞ് പരിപോഷിപ്പിക്കുകയും അവ കർത്താവിന്റെ മഹത്വത്തിനായി വിനിയോഗിക്കാൻ പുതുതലമുറയെ പ്രോത്സാഹിപ്പിക്കുകയും ചെയ്യുന്നതിന്റെ ഭാഗമായി, ഐപിസി ടാബർനാക്കിൾ അജ്മാൻ സഭയിൽ പ്രതിഭകളെ ആദരിച്ചു. ഐപിസി യു.എ.ഇ. റീജിയണൽ പി.വൈ.പി.എ.യുടെ നേതൃത്വത്തിൽ സംഘടിപ്പിച്ച റീജിയണൽ ടാലന്റ് ടെസ്റ്റിൽ വിവിധ വിഭാഗങ്ങളിൽ മികവ് തെളിയിച്ച സഭാംഗങ്ങളെയാണ് സഭായോഗാനന്തരം സഭാ പി.വൈ.പി.എ.യുടെ നേതൃത്വത്തിൽ ആദരിച്ചത്.

സഭയിലെ സജീവ പ്രവർത്തകനും അജ്മാൻ സഭയിലെയും ദുബായ് ഡി.ഐ.പി. ഔട്ട്‌സ്റ്റേഷനിലെയും ക്വയർ അംഗവുമായ ശ്രീ. അനിൽ കല്യാണിയെ സംഗീതരംഗത്തെ മികവിനാണ് ആദരിച്ചത്. കൊല്ലം കുണ്ടറ സ്വദേശിയായ അനിൽ കല്യാണി കഴിഞ്ഞ നാല് വർഷങ്ങളായി യു.എ.ഇ. റീജിയണൽ പി.വൈ.പി.എ. സംഘടിപ്പിച്ച ടാലന്റ് ടെസ്റ്റുകളിൽ എൽഡേഴ്സ് വിഭാഗത്തിലെ ക്ലാസിക്കൽ സോംഗ്, സോളോ സോംഗ് മത്സരങ്ങളിൽ പങ്കെടുത്ത് നിരവധി നേട്ടങ്ങൾ കൈവരിച്ചിട്ടുണ്ട്.

2026-ലെ റീജിയണൽ ടാലന്റ് ടെസ്റ്റിൽ ക്ലാസിക്കൽ സോംഗിലും സോളോ സോംഗിലും ഒന്നാം സ്ഥാനം നേടി ഇരട്ടവിജയം കരസ്ഥമാക്കിയതും ശ്രദ്ധേയമായി. ദൈവം നൽകിയ കഴിവുകൾ കർത്താവിന്റെ ശുശ്രൂഷയ്ക്കായി സമർപ്പിക്കുമ്പോൾ അവ വ്യക്തിപരമായ നേട്ടങ്ങൾക്കപ്പുറം ദൈവമഹത്വത്തിനുള്ള സാക്ഷ്യമായി മാറുന്നു എന്നതിന്റെ ഉദാഹരണമാണ് അനിൽ കല്യാണിയുടെ സംഗീതശുശ്രൂഷ.

ടാലന്റ് ടെസ്റ്റിൽ അനിൽ കല്യാണി ആലപിച്ച “കരയേണ്ടാ, കരുത്തിടും കർത്തൻ കരങ്ങളിൽ” എന്ന ഗാനം സഭയിലെ സജീവ പ്രവർത്തകനായ ശ്രീ. എം. ജെ. തോമസ് മണ്ണിൽ രചിച്ചതും സഭയിലെ കീബോർഡിസ്റ്റായ ശ്രീ. ടൈറ്റസ് ക്ലെമന്റ് സംഗീതം നൽകിയതുമാണ്. യൂട്യൂബ് ഉൾപ്പെടെയുള്ള മാധ്യമങ്ങളിലൂടെ ശ്രദ്ധ നേടിയ ഈ ഗാനത്തിന്റെ രചന, സംഗീതം, ആലാപനം എന്നിവയുടെ സമന്വയം സഭയോട് ചേർന്ന് പ്രവർത്തിക്കുന്നവരുടെ താലന്തുകൾ ദൈവമഹത്വത്തിനായി ഒരുമിച്ച് വിനിയോഗിക്കുന്നതിന്റെ മനോഹരമായ ഉദാഹരണമായി.

കവിതാരചനയിലെ മികവിന് ശ്രീ. എബി എബ്രഹാമിനെയും ചടങ്ങിൽ ആദരിച്ചു. ഐപിസി ടാബർനാക്കിൾ അജ്മാൻ സഭയിലും ദുബായ് ഡി.ഐ.പി. ഔട്ട്‌സ്റ്റേഷനിലും കീബോർഡിസ്റ്റായും ക്വയർ അംഗമായും സേവനം ചെയ്യുന്ന എബി എബ്രഹാം സംഗീത-സാഹിത്യ രംഗങ്ങളിലെ കഴിവുകളിലൂടെ സഭാശുശ്രൂഷകളിൽ സജീവമായി പങ്കാളിയാകുന്നു.

ദൈവം ഏൽപ്പിച്ചിരിക്കുന്ന കഴിവുകൾ കണ്ടെത്തി പരിപോഷിപ്പിക്കുകയും അവ ദൈവരാജ്യത്തിന്റെ നന്മയ്ക്കായി വിനിയോഗിക്കുകയും ചെയ്യേണ്ടതിന്റെ പ്രാധാന്യം പാസ്റ്റർ കെ. എസ്. എബ്രഹാം ചൂണ്ടിക്കാട്ടി. ടാലന്റ് ടെസ്റ്റിൽ പങ്കെടുത്ത മുഴുവൻ മത്സരാർത്ഥികളെയും സഭ അഭിനന്ദിക്കുകയും, ലഭിച്ചിരിക്കുന്ന കഴിവുകൾ കൂടുതൽ വളർത്തി ദൈവമഹത്വത്തിനും സമൂഹത്തിന്റെ നന്മയ്ക്കുമായി വിനിയോഗിക്കുവാൻ ആശംസിക്കുകയും ചെയ്തു.

ഐപിസി യു.എ.ഇ. റീജിയണൽ പി.വൈ.പി.എ. പ്രസിഡന്റ് പാസ്റ്റർ ഷിബു മുണ്ടപ്ലാക്കലിന്റെ നേതൃത്വത്തിൽ ടാലന്റ് ടെസ്റ്റ് വിജയകരമായി സംഘടിപ്പിച്ച സംഘാടകർക്കും സഭാ പി.വൈ.പി.എ. നന്ദി അറിയിച്ചു. യുവജനങ്ങളുടെ കഴിവുകൾ കണ്ടെത്തി പ്രോത്സാഹിപ്പിക്കുന്ന റീജിയണൽ പി.വൈ.പി.എ.യുടെ പ്രവർത്തനങ്ങളെയും സഭ പി.വൈ.പി.എ. അഭിനന്ദിച്ചു.

“നല്ലവനും വിശ്വസ്തനുമായ ദാസനേ, നീ അല്പത്തിൽ വിശ്വസ്തനായിരുന്നു; ഞാൻ നിന്നെ അധികത്തിന്മേൽ വിചാരിക്കും” (മത്തായി 25:21) എന്ന കർത്താവിന്റെ വചനത്തെ മുൻനിർത്തി, ദൈവം ഏൽപ്പിച്ചിരിക്കുന്ന താലന്തുകളിൽ വിശ്വസ്തരായി അവയെ കർത്താവിന്റെ മഹത്വത്തിനായി സമർപ്പിച്ച് മുന്നേറുവാൻ എല്ലാവർക്കും കഴിയട്ടെയെന്ന് സഭാ പി.വൈ.പി.എ. സെക്രട്ടറി ആശംസിച്ചു.

ദൈവം നൽകിയ ഓരോ താലന്തും ശുശ്രൂഷയ്ക്കുള്ള അവസരമായി മാറുകയും, അതിലൂടെ കൈവരിക്കുന്ന ഓരോ നേട്ടവും ദൈവമഹത്വത്തിനുള്ള സാക്ഷ്യമായി തീരുകയും ചെയ്യട്ടെയെന്ന സന്ദേശത്തോടെയാണ് ചടങ്ങ് അനുഗ്രഹീതമായി സമാപിച്ചത്.

- Advertisement -