കുമ്പനാട്: ഇന്ത്യൻ പെന്തെക്കോസ്ത് സഭാ രംഗത്തും സുവിശേഷ പ്രവർത്തനങ്ങളിലും ബൈബിൾ വിദ്യാഭ്യാസ മേഖലയിലും ശ്രദ്ധേയമായ സംഭാവനകൾ നൽകിയ റവ. ഡോ. ടി. വത്സൻ എബ്രഹാം വിടവാങ്ങി. ഇന്ത്യ പെന്തെക്കോസ്ത് ദൈവസഭയുടെ ജനറൽ പ്രസിഡന്റ്, ഇന്ത്യ ബൈബിൾ കോളജ് ആൻഡ് സെമിനാരിയുടെ പ്രസിഡന്റ്, ഇന്ത്യ ഗോസ്പൽ ഔട്ട്റീച്ചിന്റെ സ്ഥാപക പ്രസിഡന്റ് എന്നീ നിലകളിൽ അദ്ദേഹം പ്രവർത്തിച്ചുവരികയായിരുന്നു.
ഇന്ത്യൻ പെന്തെക്കോസ്ത് പ്രസ്ഥാനത്തിന്റെ പ്രമുഖ നേതാവായ പാസ്റ്റർ കെ. ഇ. എബ്രഹാമിന്റെ കൊച്ചുമകനും പാസ്റ്റർ ടി. സ്റ്റീഫൻ എബ്രഹാമിന്റെ മകനുമാണ്. കുടുംബത്തിൽനിന്നു പകർന്നുകിട്ടിയ ആത്മീയ പാരമ്പര്യവും സുവിശേഷ ദർശനവുമാണ് അദ്ദേഹത്തിന്റെ ശുശ്രൂഷാ ജീവിതത്തിന് അടിത്തറയായത്.
ഒസ്മാനിയ സർവകലാശാലയിൽനിന്ന് ഉന്നതവിദ്യാഭ്യാസം നേടിയ അദ്ദേഹം അമേരിക്കയിലെ വെസ്റ്റ് ടെക്സാസ് എ ആൻഡ് എം സർവകലാശാലയിലും ഫുള്ളർ തിയോളജിക്കൽ സെമിനാരിയിലും ഉപരിപഠനം നടത്തി. ദൈവശാസ്ത്ര പഠനവും നേതൃത്വപരിശീലനവും മിഷൻ പ്രവർത്തനങ്ങളും സമന്വയിപ്പിച്ചായിരുന്നു ശുശ്രൂഷാരംഗത്തെ പ്രവർത്തനം.
1984-ൽ ഇന്ത്യ ഗോസ്പൽ ഔട്ട്റീച്ച് (IGO) സ്ഥാപിച്ച് അതിന്റെ നേതൃത്വമേറ്റെടുത്തു. ഇന്ത്യയിലെ വിവിധ സംസ്ഥാനങ്ങളിൽ സുവിശേഷ പ്രവർത്തനങ്ങൾ വ്യാപിപ്പിക്കുക, പ്രാദേശിക സുവിശേഷകരെ പരിശീലിപ്പിക്കുക, പുതിയ സഭകൾ സ്ഥാപിക്കുക തുടങ്ങിയ മേഖലകളിൽ സംഘടനയിലൂടെ ശ്രദ്ധേയമായ പ്രവർത്തനങ്ങൾക്ക് നേതൃത്വം നൽകി.
1930-ൽ പാസ്റ്റർ കെ. ഇ. എബ്രഹാം ആരംഭിച്ച ബൈബിൾ പരിശീലന പ്രവർത്തനങ്ങളുടെ തുടർച്ചയായി വളർന്ന ഇന്ത്യ ബൈബിൾ കോളജ് ആൻഡ് സെമിനാരിയുടെ പ്രസിഡന്റായും സേവനമനുഷ്ഠിച്ചു. പാസ്റ്റർമാർ, സുവിശേഷകർ, മിഷനറിമാർ, സഭാനേതാക്കൾ എന്നിവരെ പരിശീലിപ്പിക്കുന്നതിൽ സ്ഥാപനത്തിന്റെ പ്രവർത്തനങ്ങൾ വിപുലീകരിക്കുന്നതിന് നേതൃത്വം നൽകി.
ഐപിസിയുടെ ജനറൽ സെക്രട്ടറിയായി 2006 മുതൽ 2013 വരെ സേവനമനുഷ്ഠിച്ച അദ്ദേഹം 2019 മുതൽ ജനറൽ പ്രസിഡന്റ് പദവി വഹിച്ചു. ഇന്ത്യയിലും വിദേശരാജ്യങ്ങളിലുമായി വ്യാപിച്ചുകിടക്കുന്ന ഐപിസി സഭകളുടെ പ്രവർത്തനങ്ങൾക്കും സംഘടനയുടെ വളർച്ചയ്ക്കും നേതൃത്വം നൽകി. ബൈബിൾ സൊസൈറ്റി ഓഫ് ഇന്ത്യയുടെ കേരള സ്റ്റേറ്റ് വൈസ് പ്രസിഡന്റായും പ്രവർത്തിച്ചിട്ടുണ്ട്.
പ്രഭാഷണം, അധ്യാപനം, എഴുത്ത്, നേതൃത്വപരിശീലനം, മിഷൻ പ്രവർത്തനം തുടങ്ങിയ മേഖലകളിൽ നാലു പതിറ്റാണ്ടിലേറെയായി സജീവമായിരുന്നു. ‘ദി സിൻഡ്രെല്ല ചലഞ്ച്’ (The Cinderella Challenge) എന്ന പുസ്തകത്തിന്റെ രചയിതാവാണ്. ഭാര്യ ലാലി എബ്രഹാമും മക്കളുമടങ്ങുന്നതാണ് കുടുംബം.
സുവിശേഷ വ്യാപനത്തിനും സഭാവളർച്ചയ്ക്കും ബൈബിൾ വിദ്യാഭ്യാസത്തിനും നൽകിയ സംഭാവനകളിലൂടെ ഇന്ത്യൻ പെന്തെക്കോസ്ത് സമൂഹത്തിൽ ശ്രദ്ധേയമായ വ്യക്തിമുദ്ര പതിപ്പിച്ച നേതാവായിരുന്നു റവ. ഡോ. ടി. വത്സൻ എബ്രഹാം.
- Advertisement -
Comments are closed.