132-ാമത് മാരാമൺ കൺവൻഷൻ ഫെബ്രുവരി 14 മുതൽ 21 വരെ; ഒരുക്കങ്ങൾ ആരംഭിച്ചു

തിരുവല്ല: മാർത്തോമ്മാ സുവിശേഷപ്രസംഗസംഘത്തിന്റെ നേതൃത്വത്തിൽ നടക്കുന്ന 132-ാമത് മാരാമൺ കൺവൻഷന്റെ ഒരുക്കങ്ങൾ ആരംഭിച്ചു. 2027 ഫെബ്രുവരി 14 മുതൽ 21 വരെ പമ്പാനദിയുടെ തീരത്തുള്ള മാരാമൺ മണൽപ്പുറത്ത് കൺവൻഷൻ നടക്കും. ഒരാഴ്ച നീളുന്ന ആത്മീയസംഗമത്തിനായി വിശാലമായ പന്തലും അനുബന്ധ സൗകര്യങ്ങളും ഒരുക്കുന്നതിനുള്ള പ്രവർത്തനങ്ങൾക്കാണ് തുടക്കമായിരിക്കുന്നത്.

മാർത്തോമ്മാ സുവിശേഷപ്രസംഗസംഘം പ്രസിഡന്റ് ഡോ. ഐസക് മാർ ഫിലക്സിനോസ് എപ്പിസ്‌കോപ്പയുടെ അധ്യക്ഷതയിൽ ചേർന്ന മാനേജിംഗ് കമ്മിറ്റി യോഗത്തിലാണ് കൺവൻഷന്റെ മുന്നൊരുക്കങ്ങൾ ചർച്ച ചെയ്തത്. സമ്മേളനത്തിന്റെ വിവിധ പ്രവർത്തനങ്ങൾ ഏകോപിപ്പിക്കുന്നതിനായി പ്രത്യേക സബ് കമ്മിറ്റികൾ രൂപീകരിക്കുകയും അവയുടെ കൺവീനർമാരെ തിരഞ്ഞെടുക്കുകയും ചെയ്തു.

കൺവൻഷന്റെ പ്രധാന വേദിയായ പന്തലിന്റെ നിർമാണം, പാലങ്ങൾ, ബണ്ടുകൾ എന്നിവയുടെ ക്രമീകരണങ്ങൾക്കായി റവ. റ്റി. ബാബുവിനെയും ജിബു തോമസ് ജോണിനെയും കൺവീനർമാരായി തിരഞ്ഞെടുത്തു. പന്തലിന്റെ ഓലമേയൽ ജോലികൾക്ക് റവ. ഷാജി തോമസും പി.പി. അച്ചൻകുഞ്ഞും നേതൃത്വം നൽകും. പന്തലിലെ ഇരിപ്പിട ക്രമീകരണങ്ങളുടെ ചുമതല റവ. മാത്യു വർഗീസിനും ഇവാ. സൂസൻ സാമുവേലിനുമാണ്.

കൺവൻഷനിൽ പങ്കെടുക്കുന്നവർക്കുള്ള താമസവും മറ്റ് അതിഥിസൽക്കാര ക്രമീകരണങ്ങളും ഏകോപിപ്പിക്കുന്ന ഹോസ്പിറ്റാലിറ്റി കമ്മിറ്റിയുടെ കൺവീനർമാരായി റവ. ജോജി തോമസിനെയും ഇവാ. സുബി പള്ളിക്കലിനെയും തിരഞ്ഞെടുത്തു. ലൈറ്റ് ആൻഡ് സൗണ്ട് ക്രമീകരണങ്ങൾ ഇവാ. എം.സി. ജോർജ്കുട്ടിയും ഇടിക്കുള വർഗീസും ഏകോപിപ്പിക്കും. കൺവൻഷനോടനുബന്ധിച്ചുള്ള സ്റ്റാളുകളുടെ ക്രമീകരണങ്ങൾ ജോൺസൺ ഏബ്രഹാമിന്റെയും ഡോ. ഷാജി എ.എസ്.ന്റെയും നേതൃത്വത്തിൽ നടക്കും. പാട്ടുപുസ്തകത്തിന്റെ ചുമതല ഇവാ. മാത്യു ജോൺ എം., മിനി വർഗീസ് എന്നിവർക്കാണ്.

കൺവൻഷന്റെ ആത്മീയ ഒരുക്കങ്ങൾക്കും പ്രാർഥനാപ്രവർത്തനങ്ങൾക്കും പ്രത്യേക പ്രാധാന്യം നൽകിയാണ് ക്രമീകരണങ്ങൾ മുന്നോട്ടുപോകുന്നത്. പ്രയർ ആൻഡ് പ്രിപ്പറേഷൻ കമ്മിറ്റിയുടെ കൺവീനർമാരായി റവ. ബ്ലൈസു വർഗീസിനെയും തോമസ്‌കുട്ടി ജോർജിനെയും തിരഞ്ഞെടുത്തു. വ്യക്തിഗത സുവിശേഷപ്രവർത്തനങ്ങളുടെ ഏകോപനച്ചുമതല റവ. ജേക്കബ് വി. ജോർജിനും റവ. സുനിൽ എ. ജോണിനുമാണ്. സമർപ്പണശുശ്രൂഷകളും തുടർപ്രവർത്തനങ്ങളും ഏകോപിപ്പിക്കുന്നതിനായി റവ. കെ.സി. വർഗീസിനെയും റവ. സുനിൽ എ. ജോണിനെയും ചുമതലപ്പെടുത്തി.

കൺവൻഷന്റെ ഭാഗമായി നടക്കുന്ന പ്രാദേശിക യോഗങ്ങളുടെ ക്രമീകരണങ്ങൾ റവ. ബ്ലൈസു വർഗീസും ഇവാ. മാത്യു ജോൺ എമ്മും ഏകോപിപ്പിക്കും. ഇവാഞ്ചലിസ്റ്റുകൾക്കായുള്ള ഷെഡിന്റെ ക്രമീകരണങ്ങൾക്ക് റവ. സുനിൽ എ. ജോണിനെയും ഇവാ. അനിൽ തോമസ് ആനക്കുളത്തെയും ചുമതലപ്പെടുത്തി.

യുവജനങ്ങളുടെ സജീവ പങ്കാളിത്തം ഉറപ്പാക്കുന്നതിനായി യുവവേദിയുടെ കൺവീനർമാരായി റവ. ബൈജു തോമസിനെയും റവ. സുനിൽ ജോയിയെയും തിരഞ്ഞെടുത്തു. കൺവൻഷന്റെ വാർത്തകളും വിവരങ്ങളും പൊതുജനങ്ങളിലേക്കെത്തിക്കുന്നതിനുള്ള പ്രസ് ആൻഡ് മീഡിയാ പ്രവർത്തനങ്ങൾ റവ. ബിജു സാമിന്റെയും എസ്. ബിനോജിന്റെയും നേതൃത്വത്തിൽ നടക്കും.

കൺവൻഷൻ വേദിയിലും പരിസരങ്ങളിലും സുരക്ഷയും ക്രമസമാധാനവും ഉറപ്പാക്കുന്നതിനുള്ള വിജിലൻസ് കമ്മിറ്റിയുടെ ചുമതല റവ. ഏബ്രഹാം സ്കറിയ പി., റവ. ജിജി തോമസ് എന്നിവർക്കാണ്. തിജു എം. ജോർജും അഡ്വ. മനോജ് മലയിലും ലൈവ് സ്ട്രീമിംഗ്, സി.സി.ടി.വി. സംവിധാനങ്ങളുടെ ഏകോപനം നിർവഹിക്കും. കൺവൻഷനുമായി ബന്ധപ്പെട്ട പ്രദർശനങ്ങളുടെ ചുമതല ഇവാ. ജെ.ഐ. സെൽവരാജിനും തോമസ്‌കുട്ടി ജോർജിനുമാണ്. പരിസ്ഥിതി സംരക്ഷണ പ്രവർത്തനങ്ങൾ റവ. ജോജി ജേക്കബും ഡി. കുഞ്ഞുമോനും ഏകോപിപ്പിക്കും. കൺവൻഷനുമായി ബന്ധപ്പെട്ട മന്ദിരത്തിന്റെ ചുമതല റവ. ബ്ലൈസു വർഗീസിനാണ്. കൺവൻഷനിൽ പങ്കെടുക്കുന്നവരെ സ്വീകരിക്കുന്നതിനുള്ള റിസപ്ഷൻ കമ്മിറ്റിയുടെ കൺവീനർമാരായി റവ. ബിജു സാമിനെയും അനി കോശി ചാക്കോയെയും തിരഞ്ഞെടുത്തു.

കേരളത്തിലെ ക്രൈസ്തവ സമൂഹത്തിന്റെ പ്രധാന ആത്മീയ സംഗമങ്ങളിലൊന്നായ മാരാമൺ കൺവൻഷൻ വിവിധ സഭാവിഭാഗങ്ങളിൽപ്പെട്ട വിശ്വാസികൾക്ക് ഒരുമിച്ചുകൂടി പ്രാർഥിക്കാനും വചനശുശ്രൂഷകളിൽ പങ്കുചേരാനും അവസരമൊരുക്കുന്ന വേദിയാണ്. വർഷംതോറും ആയിരക്കണക്കിന് ആളുകളാണ് കൺവൻഷനിൽ പങ്കെടുക്കുന്നത്. വചനപ്രഘോഷണം, ആരാധന, പ്രാർഥന, സുവിശേഷസന്ദേശം എന്നിവയ്ക്ക് പ്രാധാന്യം നൽകുന്ന കൺവൻഷൻ കേരളത്തിന്റെ ആത്മീയ-സാമൂഹിക ജീവിതത്തിൽ ശ്രദ്ധേയമായ സ്ഥാനം വഹിക്കുന്നു. പമ്പാനദിയുടെ തീരത്തെ മണൽപ്പുറത്ത് ഒരുക്കുന്ന വിശാലമായ പന്തലും കൂട്ടായ ആരാധനയും മാരാമൺ കൺവൻഷന്റെ സവിശേഷതകളാണ്.

2027-ലെ കൺവൻഷനുമായി ബന്ധപ്പെട്ട് വിവിധ സബ് കമ്മിറ്റികൾക്ക് ചുമതലകൾ കൈമാറിയതോടെ ഒരുക്കങ്ങൾ കൂടുതൽ സജീവമാകും. സമ്മേളനത്തിന്റെ സുഗമമായ നടത്തിപ്പിനായി പന്തൽ നിർമാണം മുതൽ സുരക്ഷ, ശബ്ദസംവിധാനം, മാധ്യമപ്രവർത്തനം, പരിസ്ഥിതി സംരക്ഷണം വരെയുള്ള മേഖലകളിൽ ഏകോപിതമായ പ്രവർത്തനങ്ങളാണ് ലക്ഷ്യമിടുന്നത്.

മാർത്തോമ്മാ സുവിശേഷപ്രസംഗസംഘം ജനറൽ സെക്രട്ടറി റവ. ഈപ്പൻ ഏബ്രഹാം, ലേഖക സെക്രട്ടറി സാം ചെമ്പകത്തിൽ, സഞ്ചാര സെക്രട്ടറി റവ. റ്റി. ബാബു, ട്രഷറാർ ജിബു തോമസ് ജോൺ എന്നിവർ മാനേജിംഗ് കമ്മിറ്റി യോഗത്തിൽ പ്രസംഗിച്ചു.

2027 ഫെബ്രുവരി 14-ന് ആരംഭിച്ച് ഫെബ്രുവരി 21-ന് സമാപിക്കുന്ന 132-ാമത് മാരാമൺ കൺവൻഷനായി വിശ്വാസസമൂഹം പ്രതീക്ഷയോടെ കാത്തിരിക്കുകയാണ്.

- Advertisement -