മരണത്തിനും ജീവിതത്തിനുമിടയിലെ ദൈവത്തിന്റെ കരുതലിന് നന്ദി പറഞ്ഞ് പാസ്റ്റർ ജോമോനും ഭാര്യയും
കോട്ടയം: ജീവിതത്തിനും മരണത്തിനുമിടയിൽ ഒരു നിമിഷത്തിന്റെ മാത്രം അകലമുണ്ടെന്ന് പറയാറുണ്ട്. ആ വാക്കുകളുടെ അർഥം നേരിട്ടറിഞ്ഞ അനുഭവവുമായി കോട്ടയം അതിരംമ്പുഴ നാൽപ്പാത്തിമല ഐപിസി സഭയുടെ ശുശ്രൂഷകനായ പാസ്റ്റർ ജോമോൻ മാത്യുവും ഭാര്യ ബബിതയും. കോട്ടയം കുറവിലങ്ങാട് കാളികാവ് പമ്പിന് സമീപം ഉണ്ടായ അപകടസാഹചര്യത്തിൽനിന്ന് പരിക്കുകളൊന്നുമില്ലാതെ രക്ഷപ്പെട്ടതിനെ ദൈവത്തിന്റെ കരുതലായാണ് ഈ ദമ്പതികൾ കാണുന്നത്.
പാസ്റ്റർ ജോമോന്റെ കുറവിലങ്ങാട്ടുള്ള ഭവനത്തിൽ സന്ദർശനം നടത്തിയശേഷം കോട്ടയത്തേക്ക് മടങ്ങിവരികയായിരുന്നു ഇരുവരും. ഇരുചക്രവാഹനത്തിൽ യാത്ര ചെയ്യുന്നതിനിടെ, എതിർദിശയിൽനിന്ന് വന്ന ലോറിയെ മറികടക്കാൻ ശ്രമിച്ചുകൊണ്ട് റോങ് സൈഡിലൂടെ അമിതവേഗത്തിൽ എത്തിയ കാർ ഇവരുടെ നേർക്കു പാഞ്ഞടുക്കുകയായിരുന്നു.
ഒരു വശത്ത് ലോറിയും മറുവശത്ത് കാറും. രക്ഷപ്പെടാൻ വഴിയില്ലാത്ത ആ നിമിഷത്തിൽ തങ്ങൾ മരണത്തെ മുഖാമുഖം കണ്ടതായാണ് ദമ്പതികളുടെ അനുഭവം. എന്തു ചെയ്യണമെന്നറിയാതെ പകച്ചുപോയ ആ നിമിഷങ്ങൾ ജീവിതത്തിലെ ഏറ്റവും ഭയാനകമായ അനുഭവങ്ങളിലൊന്നായി മാറി.
ഇനി രക്ഷപ്പെടാനാകില്ലെന്നു കരുതിയ ആ നിമിഷത്തിൽ ബബിതയുടെ മനസ്സിലേക്ക് ഓടിയെത്തിയത് പത്താം ക്ലാസിൽ പഠിക്കുന്ന മകന്റെ മുഖമായിരുന്നു. തന്റെ കുഞ്ഞിനെ അവസാനമായി ഒരിക്കൽക്കൂടി കാണാൻ കഴിയണമേയെന്ന് അവർ ദൈവത്തോട് പ്രാർഥിച്ചു.
എന്നാൽ സംഭവിച്ചത് അവിശ്വസനീയമായിരുന്നു. വലിയൊരു ദുരന്തം സംഭവിക്കുമെന്ന് കരുതിയ ആ നിമിഷങ്ങൾക്കുശേഷം പാസ്റ്റർ ജോമോനും ഭാര്യ ബബിതയ്ക്കും ഒരു ചെറിയ പോറൽപോലും ഏൽക്കാതെ രക്ഷപ്പെടാനായി. ആരോ തങ്ങളെ അപകടത്തിൽനിന്ന് എടുത്തുമാറ്റിയതുപോലെയാണ് അനുഭവപ്പെട്ടതെന്ന് ബബിതയുടെ വാക്കുകൾ വ്യക്തമാക്കുന്നു.
മരണത്തിന്റെ നിഴൽ തൊട്ടടുത്തെത്തിയെന്നു തോന്നിയ നിമിഷത്തിൽനിന്ന് ജീവിതത്തിലേക്ക് സുരക്ഷിതമായി തിരിച്ചെത്തിയ ഈ അനുഭവം ഇരുവർക്കും ഒരിക്കലും മറക്കാനാവാത്തതാണ്.
മരണത്തിനും ജീവിതത്തിനുമിടയിലെ ആ നിർണായക നിമിഷത്തിൽനിന്ന് പരിക്കുകളൊന്നുമില്ലാതെ രക്ഷപ്പെട്ട പാസ്റ്റർ ജോമോൻ മാത്യുവിന്റെയും ഭാര്യ ബബിതയുടെയും അനുഭവം ദൈവത്തിന്റെ കരുതലിലുള്ള വിശ്വാസം പുതുക്കുന്നതോടൊപ്പം റോഡ് സുരക്ഷയുടെ പ്രാധാന്യവും എല്ലാവരെയും ഓർമിപ്പിക്കുന്നു.
- Advertisement -
Comments are closed.