മനുഷ്യര്‍ നിരൂപിക്കുന്നു.. ദൈവം നിശ്ചയിക്കുന്നു | റോജി തോമസ് ചെറുപുഴ
“മനുഷ്യന്‍റെ ഹൃദയം തന്‍റെ വഴിയെ നിരൂപിക്കുന്നു; അവന്‍റെ കാലടികളെയോ യഹോവ ക്രമപ്പെടുത്തുന്നു.” (സദൃശവാക്യങ്ങള്‍ 16:9).
മനുഷ്യന്‍റെ ഉദ്ദേശ്യവും ദൈവിക പദ്ധതിയും തമ്മിലുള്ള ബന്ധത്തെ ഈ വാക്യം എടുത്തുകാണിക്കുന്നു. ആളുകള്‍ക്ക് അവരുടെ ആഗ്രഹങ്ങള്‍ക്കും യുക്തിക്കും അനുസൃതമായി പദ്ധതികള്‍ ആസൂത്രണം ചെയ്യുവാന്‍ കഴിയുമെങ്കിലും, ആത്യന്തികമായി അവരുടെ പാതകള്‍ ക്രമീകരിക്കുന്നതും നയിക്കുന്നതും അവരുടെ പ്രവര്‍ത്തനങ്ങളുടെ ഫലം നിര്‍ണ്ണയിക്കുന്നതും ദൈവമാണെന്ന് ഇത് സൂചിപ്പിക്കുന്നു. മനുഷ്യന്‍റെ പരിശ്രമങ്ങളും ഉദ്ദേശ്യങ്ങളും ദൈവത്തിന്‍റെ പരമാധികാരത്തിനും സംരക്ഷണത്തിനും വിധേയമാണ്. ഇത് ദൈവത്തിന്‍റെ ജ്ഞാനത്തിലും പദ്ധതിയിലും ആശ്രയിക്കേണ്ടതിന്‍റെ പ്രാധാന്യത്തെ കുറിച്ച് വിശ്വാസികളെ ഓര്‍മിപ്പിക്കുന്നു. നമ്മുടെ ഏറ്റവും മികച്ച ശ്രമങ്ങള്‍ക്കിടയിലും നാം ദൈവത്തിന്‍റെ പദ്ധതിയില്‍ ആശ്രയിക്കണമെന്നും നമ്മുടെ തീരുമാനങ്ങളില്‍ അവന്‍റെ ഇഷ്ടം തേടണമെന്നും പഠിപ്പിക്കുന്നു.
പ്രായോഗികമായി വ്യക്തികളെ ആസൂത്രണം ചെയ്യാനും ഉത്സാഹത്തോടെ പ്രവര്‍ത്തിക്കാനും പ്രചോദിപ്പിക്കുകയും അതേസമയം ദൈവത്തിന്‍റെ മാര്‍ഗനിര്‍ദേശങ്ങള്‍ക്കായി തുറന്നമനസ്സോടെ ആയിരിക്കുക എന്നും നിര്‍ദ്ദേശിക്കുന്നു. യഥാര്‍ത്ഥ വിജയവും നിവൃത്തിയും ലഭിക്കുന്നത് അവിടുത്തെ ഉദ്ദേശ്യങ്ങളുമായി ഒത്തുചേരുന്നതിലൂടെയാകുന്നു. ഇത് മനുഷ്യന്‍റെ ഉത്തരവാദിത്തവും ദൈവിക പരമാധികാരവും തമ്മിലുള്ള സന്തുലിതാവസ്ഥയെ വെളിവാക്കുന്നു. “ഉത്സാഹിയുടെ വിചാരങ്ങള്‍ സമൃദ്ധിഹേതുകങ്ങള്‍ ആകുന്നു; ബദ്ധപ്പാടുകാരൊക്കെയും ബുദ്ധിമുട്ടിലേക്കത്രേ ബദ്ധപ്പെടുന്നതു” (സദൃശവാക്യങ്ങള്‍ 21:5). ഇവിടെ വ്യക്തമായും നമ്മുടെ ഉത്സാഹത്തെയും ആസൂത്രണത്തെയും ദൈവം വിലമതിക്കുന്നതായി കാണാം.
നാം നമ്മുടെ ഗതി ആസൂത്രണം ചെയ്യുമ്പോള്‍, നമ്മുടെ ചുവടുകള്‍ സ്ഥാപിക്കുന്നത് കര്‍ത്താവാണ്. ഇതിനര്‍ത്ഥം, നമ്മുടെ ഏറ്റവും മികച്ച പദ്ധതികള്‍ ഉണ്ടായിരുന്നിട്ടും, ദൈവഹിതം ആത്യന്തികമായി വിജയിക്കുന്നു എന്നാണ്. യിരെമ്യാവ് 29:11 ദൈവത്തിന്‍റെ ഉദ്ദേശ്യങ്ങളെക്കുറിച്ച് നമുക്ക് ഉറപ്പുനല്‍കുന്നു; “നിങ്ങള്‍ പ്രത്യാശിക്കുന്ന ശുഭഭാവി വരുവാന്‍ തക്കവണ്ണം ഞാന്‍ നിങ്ങളെക്കുറിച്ചു നിരൂപിക്കുന്ന നിരൂപണങ്ങള്‍ ഇന്നവ എന്നു ഞാന്‍ അറിയുന്നു; അവ തിന്മെക്കല്ല നന്മെക്കത്രേയുള്ള നിരൂപണങ്ങള്‍…”
ബൈബിളില്‍ യോസേഫിന് തന്‍റെ മഹത്വത്തെക്കുറിച്ച് സ്വപ്നങ്ങളുണ്ടായിരുന്നു, എന്നാല്‍ ഈജിപ്തിലെ ശക്തനായ നേതാവാകുന്നതിന് മുമ്പ് അടിമത്തത്തിലേക്ക് വില്‍ക്കപ്പെടുകയും തടവിലാക്കപ്പെടുകയും ചെയ്ത നിയോഗങ്ങള്‍ അദ്ദേഹത്തിന്‍റെ ജീവിതയാത്രയില്‍ ഉള്‍പ്പെട്ട സംഭവങ്ങളും നിശ്ചയങ്ങളുമായിരുന്നു. അവന്‍റെ സഹോദരന്മാര്‍ ആകട്ടെ അവന് ദ്രോഹമാണ് ഉദ്ദേശിച്ചത്, എന്നാല്‍ അനേകം ജീവന്‍ രക്ഷിക്കാന്‍ ദൈവം ആ സംഭവങ്ങള്‍ ഉപയോഗിച്ചു. ക്രിസ്തു ശിഷ്യനായിത്തീര്‍ന്ന പൗലോസ് ആദ്യകാലഘട്ടങ്ങളില്‍ തീക്ഷ്ണതയാല്‍ ക്രിസ്ത്യാനികളെ പീഡിപ്പിക്കാന്‍ പദ്ധതിയിട്ട് ഇറങ്ങിത്തിരിച്ചു, എന്നാല്‍ ഡമാസ്കസിലേക്കുള്ള വഴിയില്‍ യേശുവിനെ കണ്ടുമുട്ടുകയും അനുഭവിക്കുകയും വഴി ഏറ്റവും സ്വാധീനമുള്ള അപ്പോസ്തലന്മാരില്‍ ഒരാളായിത്തീരുകയും ചെയ്തു.
നമ്മുടെ ജീവിതവും ജോലിയും ശുശ്രൂഷകളും ആസൂത്രണം ചെയ്യുമ്പോള്‍, നാം പ്രാര്‍ത്ഥനാപൂര്‍വ്വം, തുറന്ന ഹൃദയത്തോടെ, ദൈവം നിര്‍ദ്ദേശിക്കുന്നതുപോലെ ക്രമീകരിക്കാന്‍ തയ്യാറായിരിക്കണം. “പൂര്‍ണ്ണഹൃദയത്തോടെ യഹോവയില്‍ ആശ്രയിക്ക; സ്വന്ത വിവേകത്തില്‍ ഊന്നരുതു. നിന്‍റെ എല്ലാവഴികളിലും അവനെ നിനെച്ചുകൊള്‍ക; അവന് നിന്‍റെ പാതകളെ നേരെയാക്കും” (സദൃശവാക്യങ്ങള്‍ 3:5-6). ദൈവത്തിന്‍റെ സമയക്രമത്തില്‍ വിശ്വസിക്കുക; ചിലപ്പോള്‍ നമ്മുടെ പദ്ധതികളിലെ കാലതാമസമോ മാറ്റങ്ങളോ മെച്ചപ്പെട്ട കാര്യത്തിനായി നമ്മെ ഒരുക്കുന്നതിനുള്ള ദൈവത്തിന്‍റെ മാര്‍ഗമാണ്. ദൈവത്തിന്‍റെ നിശ്ചയത്തിനും സമയത്തിലും ആശ്രയിക്കുക എന്നത് വളരെ ത്യാഗവും പ്രാര്‍ത്ഥനയും കാത്തിരിപ്പും ആവശ്യമുള്ളതാണ് എങ്കിലും നമ്മുടെ വിശ്വാസ യാത്രയ്ക്ക് അത് നിര്‍ണായകമാണ്.
നമ്മുടെ ജീവിതത്തില്‍ മുന്നേറുമ്പോള്‍, നമ്മുടെ പദ്ധതികള്‍ പ്രാധാന്യമര്‍ഹിക്കുന്നവയാണ്, എന്നാല്‍ ദൈവത്തിന്‍റെ മാര്‍ഗനിര്‍ദേശം അനുസരിക്കാന്‍ മനസ്സൊരുക്കമുള്ള ഹൃദയത്തോടെ പ്രാര്‍ത്ഥനാനിര്‍ഭരം ക്രമീകൃതരായി വിശ്വസ്തരായി കാത്തിരിക്കേണം. നമ്മുടെ ആത്യന്തിക നന്മയ്ക്കും അവന്‍റെ മഹത്വത്തിനും വേണ്ടി അവിടുന്ന് നമ്മുടെ കാലടികള്‍ സ്ഥാപിക്കുന്നു എന്ന് വിശ്വസിച്ചുകൊണ്ട്, നമ്മുടെ പ്രയത്നങ്ങളിലും വിശ്വാസജീവിതത്തിലും ക്രിസ്തുവിനോടുള്ള സ്നേഹത്തിലും ഉത്സാഹമുള്ളവരായിരിക്കുകയും ദൈവത്തിലുള്ള നമ്മുടെ ആശ്രയത്തില്‍ താഴ്മയുള്ളവരായിരിക്കുകയും ചെയ്യാം.
നമ്മുടെ എല്ലാ പ്രയത്നങ്ങളിലും ആശകളിലും വിശ്വാസ ജീവിതത്തിലും അവിടുത്തെ ഇഷ്ടം അന്വേഷിക്കുവാനും നമ്മുടെ ചുവടുകള്‍ അവിടുന്ന് സ്ഥാപിക്കുന്നുവെന്ന് വിശ്വസിക്കുവാനും ദൈവം നമ്മെ സഹായിക്കട്ടെ. അവിടുത്തെ പൂര്‍ണ്ണമായ പദ്ധതിയിലുള്ള അചഞ്ചല വിശ്വാസത്തോടൊപ്പം നമ്മുടെ പരിശ്രമങ്ങളെ സന്തുലിതമാക്കാനുള്ള ജ്ഞാനം അവിടുന്ന് നമുക്ക് പകരട്ടെ.
-ADVERTISEMENT-