ലേഖനം: ഡിജിറ്റല്‍ മീഡിയ; അമിതാശ്രയവും ആസക്തിയും! | റോജി തോമസ്
പരസ്പരബന്ധിതമായ ഇന്നത്തെ ലോകത്ത്, ഡിജിറ്റല്‍ സാങ്കേതികതയും ഡിജിറ്റല്‍ മീഡിയയും ഓണ്‍ലൈന്‍ ഇടപാടുകളും മാനുഷിക ജീവിതം തന്നെയും ഓണ്‍ലൈന്‍-നെറ്റ്-ഡിജിറ്റല്‍ സ്വാധീനം ഒഴിവാക്കാന്‍ പറ്റാത്തവിധം ബന്ധപ്പെട്ടിരിക്കുന്നു. നമ്മുടെ ജീവിതത്തിന്‍റെ മിക്കവാറും എല്ലാ മേഖലകളിലേക്കും ഈ സാങ്കേതിക വിദ്യകള്‍ വന്‍നേട്ടങ്ങള്‍ വാഗ്ദാനം ചെയ്യുന്നുണ്ടെങ്കിലും, അവ പുതിയ വെല്ലുവിളികളും കൊണ്ടുവരുന്നു. എന്നിരുന്നാലും നമ്മെ ബാധിക്കുന്ന പ്രധാന പ്രശ്നം ഡിജിറ്റല്‍ ആസക്തിയാണ്. ഡിജിറ്റല്‍ ഉപകരണങ്ങളുടെയും ഓണ്‍ലൈന്‍ പ്ലാറ്റ്ഫോമുകളുടെയും അമിതവും നിര്‍ബന്ധിതവുമായ ഉപയോഗത്തിന്‍റെയും ബാക്കിപത്രമായ ഡിജിറ്റല്‍ ആസക്തി വ്യക്തിഗത ക്ഷേമത്തിനും സാമൂഹിക ആരോഗ്യത്തിനും കാര്യമായ ഭീഷണി ഉയര്‍ത്തുന്നു. അച്ചടിച്ച അക്ഷരക്കൂട്ടുകളുടെ ചങ്ങാത്തത്തില്‍ നിന്നും ഡിജിറ്റല്‍ ലോകത്തേക്ക് ഒതുങ്ങിയ നമ്മുടെ വായനാശീലം നഷ്ടമാവുകയാണ് ചെയ്തത്. വിശാലവും ഗഹനവുമായ പുസ്തക വായനയില്‍നിന്ന് സ്പീഡ് റീഡിംഗിലേക്ക് നമ്മുടെ ശീലങ്ങള്‍ മാറി. റീലുകളിലും ഷോര്‍ട്ട് ഫിലിമുകളിലും ചെറുകഥകളിലും തലക്കെട്ട് വായനയിലും മാത്രമായി നമ്മുടെ വായനാ സാഹിത്യശീലങ്ങള്‍. സാങ്കേതിക തികവുകള്‍ നമ്മുടെ കൈയ്യിലൊതുങ്ങിയപ്പോള്‍, നമ്മുടെ ആവശ്യങ്ങളുടെ ഉപാദികളായി അവ മാറിയപ്പോള്‍ നമ്മുടെ ചിന്താശക്തിയും തീരുമാനങ്ങളും തിരഞ്ഞെടുപ്പും എല്ലാം നഷ്ടമായി. നാം മറ്റൊന്നിനാല്‍ നിയന്ത്രിതരായി.
സോഷ്യല്‍ മീഡിയ, ഓണ്‍ലൈന്‍ ഗെയിമിംഗ്, സ്ട്രീമിംഗ് സേവനങ്ങള്‍, ഇന്‍റര്‍നെറ്റ് ബ്രൗസിംഗ് എന്നിവയുള്‍പ്പെടെ വിവിധ തലത്തില്‍ ഡിജിറ്റല്‍ അഡിക്ഷന്‍ ഉണ്ടാവുന്നു. സ്മാര്‍ട്ട് ഫോണുകളുടെ നിരന്തര ഉപയോഗം, മണിക്കൂറുകളോളം ഓണ്‍ലൈനില്‍ അമിതമായി ചെലവഴിക്കല്‍, യഥാര്‍ത്ഥ ജീവിതത്തിലെ ഉത്തരവാദിത്തങ്ങള്‍ അവഗണിക്കല്‍ തുടങ്ങിയ പെരുമാറ്റങ്ങളിലൂടെ ഇത് പ്രകടമാകുന്നു. മറ്റ് ആസക്തികള്‍ക്ക് സമാനമായി, ഡിജിറ്റല്‍ ആസക്തി തലച്ചോറിന്‍റെ റിവാര്‍ഡ് സിസ്റ്റത്തെ ഹൈജാക്ക് ചെയ്യുന്നു. മസ്തിഷ്കം വൈവിധ്യമാര്‍ന്ന ഉത്തേജകങ്ങളെ (പദാര്‍ത്ഥങ്ങള്‍, സാഹചര്യങ്ങള്‍, പ്രവര്‍ത്തനങ്ങള്‍) അഥവാ സെന്‍സേഷനെ അഭികാമ്യമായ ഫലവുമായി ബന്ധപ്പെടുത്തുന്നു. ഇത് ഒരു വ്യക്തിയുടെ പെരുമാറ്റത്തെയും പ്രവര്‍ത്തനങ്ങളെയും സഹായിക്കുന്നു; ഇതത്രേ റിവാര്‍ഡ് സിസ്റ്റം. ഡിജിറ്റല്‍ ഉപകരണങ്ങളുടെ കൈകാര്യം കൂടുമ്പോള്‍ ആസക്തിയിലേക്കും അന്തര്‍മുഖ സ്വഭാവത്തിലേക്കും ഒരു വ്യക്തിയെ നയിക്കുന്നു.
ഡിജിറ്റല്‍ മീഡിയയുടെ അമിതമായ ഉപയോഗം; ശ്രദ്ധ, ഓര്‍മ്മശക്തി, പ്രശ്നപരിഹാര കഴിവുകള്‍,സ്ഥലകാല ബോധം എന്നിവയുള്‍പ്പെടെയുള്ള ബൗദ്ധിക പ്രവര്‍ത്തനങ്ങളെ തകരാറിലാക്കും. മള്‍ട്ടി ടാസ്കിംഗും അമിതഭാരവും തലച്ചോറിനെ തളര്‍ത്തിയേക്കാം. ഇത് പ്രവര്‍ത്തനക്ഷമത കുറയുന്നതിനും ശ്രദ്ധ കേന്ദ്രീകരിക്കാന്‍ ബുദ്ധിമുട്ടുന്നതിനും ഇടയാക്കും.
ഡിജിറ്റല്‍ ആസക്തിയുടെ കാരണങ്ങള്‍; ഡിജിറ്റല്‍ മീഡിയയിലേക്ക് ആകര്‍ഷിക്കുന്നതിനായി നിരവധി ഉപാദികള്‍ സംയോജിപ്പിച്ചിരുക്കുന്നു. ഡിജിറ്റല്‍ പ്ലാറ്റ്ഫോമുകകള്‍ വളരെ ആകര്‍ഷകവും ആസക്തി ഉളവാക്കുന്നതരത്തിലും രൂപകല്‍പ്പന ചെയ്തിരിക്കുന്നു. അനന്തമായ സ്ക്രോളിംഗ്, വ്യക്തികളുടെ സെര്‍ച്ചിംഗ് മെന്‍റാലിറ്റിക്കനുസരിച്ച് കൂടുതല്‍ ലിങ്കുകള്‍ എന്നിങ്ങനെയുള്ള ഫീച്ചറുകള്‍ ഉപയോക്താക്കളെ ദീര്‍ഘനേരത്തേക്ക് തളച്ചിടുന്നു. ഏകാന്തത, ഉത്കണ്ഠ, ആത്മാഭിമാനം എന്നിവയുള്‍പ്പെടെയുള്ള മാനസിക ഘടകങ്ങളും, യാഥാര്‍ത്ഥ്യത്തില്‍ നിന്ന് രക്ഷപ്പെടാനും സാധൂകരണം തേടാനുമുള്ള മാര്‍ഗ്ഗവും തേടിക്കൊണ്ട് ഡിജിറ്റല്‍ ആസക്തിക്ക് ആക്കം കൂട്ടുന്നു.
ഡിജിറ്റല്‍ ആസക്തിയുടെ അനന്തരഫലങ്ങള്‍ ദൂരവ്യാപകമാണ്, വ്യക്തികളെയും ബന്ധങ്ങളെയും സമൂഹത്തെയും ആകമാനം ബാധിക്കുന്നു. ഉദാസീനമായ പെരുമാറ്റം, മസ്കുലോസ്കെലെറ്റല്‍ ഡിസോര്‍ഡേഴ്സ്, (പേശികള്‍, ഞരമ്പുകള്‍, സന്ധികള്‍, തരുണാസ്ഥി, സുഷുമ്നാ ഡിസ്കുകള്‍ എന്നിവയുടെ പരിക്കുകള്‍ അല്ലെങ്കില്‍ തകരാറുകള്‍), ഹൃദയ സംബന്ധമായ പ്രശ്നങ്ങള്‍ എന്നിവയുള്‍പ്പെടെ വിവിധ ശാരീരിക ആരോഗ്യ പ്രശ്നങ്ങള്‍ക്ക് കാരണമാകും. കൂടാതെ, സ്ക്രീനില്‍ ദീര്‍ഘനേരം വീക്ഷിക്കുന്നത് കണ്ണുകളുടെ ബുദ്ധിമുട്ട്, തലവേദന, മറ്റ് കാഴ്ച പ്രശ്നങ്ങള്‍ എന്നിവയ്ക്ക് കാരണമാകും. കണ്ണിന് ആയാസം, ഉറക്കമില്ലായ്മ, പൊണ്ണത്തടി, ഭക്ഷണം വെള്ളം എന്നിവയെ മറന്നുള്ള ഇടപെടല്‍, ഡിഹൈഡ്രേഷന്‍, എന്നിവയുള്‍പ്പെടെയുള്ള വിവിധ ശാരീരിക ആരോഗ്യപ്രശ്നങ്ങളുമായി അമിത ഡിജിറ്റല്‍ സ്ക്രീന്‍ ഉപയോഗം ബന്ധപ്പെട്ടിരിക്കുന്നു. കൂടാതെ, ഡിജിറ്റല്‍ ആസക്തി വൈജ്ഞാനിക പ്രവര്‍ത്തനത്തെ തടസ്സപ്പെടുത്തും. സാമൂഹികമായി യഥാര്‍ത്ഥ ജീവിത ബന്ധങ്ങളുടെ ശോഷണത്തിന് കാരണമാവാം. ഒറ്റപ്പെടലിന്‍റെയും ഏകാന്തതയുടെയും തലത്തിലേക്ക് വ്യക്തിയെ നയിക്കുന്നു. ചില സന്ദര്‍ഭങ്ങളില്‍ ഡിപ്രഷന്‍, ഉത്കണ്ഠ, അസന്തുലിത മാനസികാരോഗ്യ പ്രശ്നങ്ങള്‍ എന്നിവയിലേക്ക് ഡിജിറ്റല്‍ ആസക്തി നയിച്ചേക്കാം. ചുറ്റുപാടുകളെക്കുറിച്ച് ബോധവാനല്ലാതെ റോഡുകളിലൂടെ നടക്കുമ്പോള്‍ ട്രാഫിക് സിഗ്നല്‍ ശ്രദ്ധിക്കാതെ അപകടങ്ങള്‍ വിളിച്ചുവരുത്താം. സ്മാര്‍ട്ട്ഫോണ്‍ ഉപയോക്താക്കളെ സംരക്ഷിക്കാന്‍ ലക്ഷ്യമിടുന്ന ‘സ്മാര്‍ട്ട് ഫോണ്‍ സോംബി’ ട്രാഫിക് ലൈറ്റുകള്‍-സിഗ്നലുകള്‍ എന്നിവ സിഡ്നി, ഓസ്ട്രേലിയ, സിയോള്‍, ദക്ഷിണ കൊറിയ, ഓഗ്സ്ബര്‍ഗ്, ജര്‍മ്മനി, നെതര്‍ലാന്‍ഡിലെ ബോഡെഗ്രേവന്‍, ഇസ്രായേല്‍ തലസ്ഥാനം ടെല്‍ അവീവ്, സിംഗപ്പൂര്‍ എന്നിവിടങ്ങളില്‍ ട്രാഫിക്കില്‍ സ്ഥാപിച്ചിട്ടുണ്ട്.
ഡിജിറ്റല്‍ ആസക്തിയെ നേരിടുന്നതിന് വ്യക്തികള്‍, കുടുംബങ്ങള്‍, അധ്യാപകര്‍, സൗഹൃദ സംഘങ്ങള്‍ എന്നിവര്‍ ഉള്‍പ്പെടുന്ന ഒരു ബഹുമുഖ വൃന്ദം ആവശ്യമാണ്. വ്യക്തിഗത തലത്തില്‍ സ്വയം അവബോധവും സ്വയം നിയന്ത്രണ കഴിവുകളും വികസിപ്പിക്കേണ്ടത് അത്യാവശ്യമാണ്. ഡിജിറ്റല്‍ സാങ്കേതികതയുടെ ഉപയോഗത്തിന് അതിരുകള്‍ നിശ്ചയിക്കുക, ഡിജിറ്റല്‍ ഡിറ്റോക്സുകള്‍ (സ്മാര്‍ട്ട്ഫോണുകളോ കമ്പ്യൂട്ടറുകളോ പോലുള്ള ഇലക്ട്രോണിക് ഉപകരണങ്ങള്‍ ഉപയോഗിക്കുന്നതില്‍ നിന്ന് ഒരു വ്യക്തി വിട്ടുനില്‍ക്കുന്ന ഒരു കാലഘട്ടം, സമ്മര്‍ദ്ദം കുറയ്ക്കുന്നതിനോ സാമൂഹിക ഇടപെടലുകളില്‍ ശ്രദ്ധ കേന്ദ്രീകരിക്കുന്നതിനോ ഉള്ള അവസരമായി കണക്കാക്കപ്പെടുന്ന സമയം) പരിശീലിക്കുക, മാനസികാരോഗ്യ വിദഗ്ദരുടെ പിന്തുണ തേടുക എന്നിവ ഇത്തരം ആസക്തി ലഘൂകരിക്കാന്‍ സഹായിക്കും. സുകുമാരകലകളില്‍ പ്രാവിണ്യം നേടുക, സംഗീതോപകരണങ്ങള്‍ പരിശീലിക്കുക, പൂന്തോട്ടം-പച്ചക്കറി-പഴത്തോട്ട പരിപാലനം, മത്സ-മൃഗപരിപാലനം തുടങ്ങി നിരവധിയായ നല്ലശീലങ്ങളിലൂടെ നമുക്ക് ഇത്തരം പ്രതിബന്ധങ്ങളെ പ്രതിരോധിക്കാം.
വിദ്യാര്‍ത്ഥികള്‍ക്കിടയില്‍ ഡിജിറ്റല്‍ സാക്ഷരതയും ഉത്തരവാദിത്തമുള്ള സാങ്കേതിക ഉപയോഗവും വളര്‍ത്തിയെടുക്കുന്നതില്‍ അധ്യാപകര്‍ നിര്‍ണായക പങ്ക് വഹിക്കുന്നു. ഇത് വിമര്‍ശനാത്മക ചിന്താശേഷി പഠിപ്പിക്കുന്നതിനും ഡിജിറ്റല്‍ യുഗത്തില്‍ സുരക്ഷിതമായും ഉത്തരവാദിത്തത്തോടെയും ഇടപഴകുവാന്‍ യുവജനങ്ങളെ പ്രാപ്തരാക്കുന്നതിനും സഹായകമാണ്. ഡിജിറ്റല്‍ ഉപകരണങ്ങള്‍ ഉപയോഗിക്കുന്നതിനുള്ള നിയുക്ത സമയങ്ങളും അവ അനുവദനീയമായ പ്രത്യേക മേഖലകളും ഉള്‍പ്പെടെ വ്യക്തമായ അതിരുകള്‍ സ്ഥാപിക്കുക. ആരോഗ്യകരമായ ഉറക്കശീലത്തിനും മാനസിക വളര്‍ച്ചയ്ക്കും ഉന്മേഷത്തിനും ഈ പരിമിതിപ്പെടുത്തല്‍ സഹായകമാവും.
ഡിജിറ്റല്‍ ആസക്തി വൈകാരിക ക്ഷേമത്തില്‍ അഗാധമായ സ്വാധീനം ചെലുത്തും. സമ്മര്‍ദ്ദം, ഉത്കണ്ഠ, വിഷാദം എന്നിവയ്ക്ക് ഇത് കാരണമാകുന്നു. ഡിജിറ്റല്‍ സാങ്കേതികവിദ്യയുടെ അമിതമായ ഉപയോഗം സാമൂഹികമായ ഒറ്റപ്പെടലിലേക്ക് നയിച്ചേക്കാം. യഥാര്‍ത്ഥ സുഹൃത്തുക്കളുമായും കുടുംബാംഗങ്ങളുമായും ഉള്ളതിനേക്കാള്‍ കൂടുതല്‍ സമയം ഇതില്‍ ചെലവഴിക്കുന്നത് സാമൂഹിക ബന്ധങ്ങളെ ദുര്‍ബലപ്പെടുത്തുകയും ഏകാന്തതയുടെയുംഅന്തര്‍മുഖതയുടെയും കാരണമാവുകയും ചെയ്യും. ഡിജിറ്റല്‍ ആസക്തി പലപ്പോഴും വ്യക്തികളെ ജോലി, വ്യക്തിബന്ധങ്ങള്‍, പഠനമേഖലകള്‍ എന്നിങ്ങനെയുള്ള ഉത്തരവാദിത്തങ്ങളെ അവഗണിക്കുന്നതിലേക്ക് നയിക്കുന്നു.
സ്ക്രീനുകള്‍ പുറപ്പെടുവിക്കുന്ന നീല വെളിച്ചം മെലറ്റോണിന്‍റെ ഉല്‍പാദനത്തെ അടിച്ചമര്‍ത്തുന്നു. നിങ്ങളുടെ മസ്തിഷ്കം ഇരുട്ടിനോട് പ്രതികരിക്കുന്ന ഒരു ഹോര്‍മോണാണ് മെലറ്റോണിന്‍. ഡിജിറ്റല്‍ ആസക്തി നിങ്ങളുടെ സര്‍ക്കാഡിയന്‍ (24 മണിക്കൂര്‍ ആന്തരിക ക്ലോക്ക്) താളത്തിന്‍റെ സമയത്തെയും ഉറക്കത്തെയും ബാധിക്കുന്നു. രാത്രിയില്‍ വെളിച്ചം കാണുന്നത് മെലറ്റോണിന്‍ ഉല്‍പാദനത്തെ തടയും. ഉറക്കം, ഉണര്‍വ് എന്നിവയെ നിയന്ത്രിക്കുന്ന ഹോര്‍മോണാണ് ഇത്.
ഓണ്‍ലൈന്‍ പ്ലാറ്റ്ഫോമുകളുമായുള്ള അമിതമായ ഇടപഴകല്‍ ഓണ്‍ലൈന്‍ ചതികളിലും സൈബര്‍ ഭീഷണികളിലും പെടുവാനുള്ള സാധ്യത വര്‍ദ്ധിപ്പിക്കുന്നു. കുട്ടികളും കൗമാരക്കാരും പോലുള്ള ദുര്‍ബലരായ വ്യക്തികള്‍ ഡിജിറ്റല്‍ പരിതസ്ഥിതികളില്‍ ചൂഷണത്തിന് വിധേയരായേക്കാം. സോഷ്യല്‍ മീഡിയയുടെ അമിതമായ ഉപയോഗം ഓണ്‍ലൈന്‍ വ്യക്തിത്വങ്ങള്‍ക്കും യഥാര്‍ത്ഥ വ്യക്തിത്വങ്ങള്‍ക്കും ഇടയിലുള്ള സുതാര്യത ഇല്ലാതാക്കാം. ഒരു ഓണ്‍ലൈന്‍ ഇമേജ് നിലനിര്‍ത്താനുള്ള സമ്മര്‍ദ്ദം ആത്മാഭിമാനത്തെയും വ്യക്തിത്വത്തെയും ഇല്ലാതാക്കുകയും ഇരട്ടവ്യക്തിത്വം സൂക്ഷിക്കുവാന്‍ പ്രേരിപ്പിക്കുകയും അത് ശീലമാവുകയും ചെയ്യും
ഡിജിറ്റല്‍ ശീലങ്ങളെക്കുറിച്ചും നിങ്ങളുടെ ക്ഷേമത്തില്‍ അവ ചെലുത്തുന്ന സ്വാധീനത്തെക്കുറിച്ചും കൂടുതല്‍ ബോധവാന്മാരാകാന്‍ നിങ്ങളുടെ ദിനചര്യ സ്വയം പരിശോധിക്കുന്നതിനും നിങ്ങളുടെ ഡിജിറ്റല്‍ ഇടപഴകലിന്‍റെ നിലവാരം വിലയിരുത്തുന്നതിനും പരിശീലിക്കുക; ദിവസവും സ്വസ്ഥമായ ഇടവേളകള്‍ എടുക്കുക. വെളിയില്‍ സമയം ചെലവഴിക്കുക, പ്രകൃതിയുമായി ഇടപഴകുന്ന ഹോബികളും കളികളും താല്‍പ്പര്യങ്ങളും പിന്തുടരുക, സുഹൃത്തുക്കളുമായും കുടുംബാംഗങ്ങളുമായും വ്യക്തിപരമായി സമയം ചെലവഴിക്കുക. ക്രമമായ വ്യായാമം, പോഷകസമൃദ്ധമായ ഭക്ഷണം, മതിയായ ഉറക്കം എന്നിങ്ങനെ ക്ഷേമത്തെ പിന്തുണയ്ക്കുന്ന ആരോഗ്യകരമായ ശീലങ്ങള്‍ വളര്‍ത്തുക. ശാരീരിക പ്രവര്‍ത്തനങ്ങള്‍, പ്രത്യേകിച്ച്, ഡിജിറ്റല്‍ ആസക്തിയുടെ ഉദാസീനമായ സ്വഭാവത്തെ ചെറുക്കാനും മാനസികാവസ്ഥയും വൈജ്ഞാനിക പ്രവര്‍ത്തനവും മെച്ചപ്പെടുത്താനും സഹായിക്കും.
നിങ്ങളുമായും മറ്റുള്ളവരുമായും ബന്ധം സ്ഥാപിക്കുവാനും നിലനിര്‍ത്തുവാനും അര്‍ത്ഥവത്തായ പ്രവര്‍ത്തനങ്ങളില്‍ ഏര്‍പ്പെടാനും ജീവിതത്തിന്‍റെ സന്തോഷങ്ങള്‍ കണ്ടെത്തുവാനും ഈ സമയം ഉപയോഗിക്കുക. ഡിജിറ്റല്‍ സാങ്കേതിക വിദ്യ ബുദ്ധിശൂന്യമായി ഉപയോഗിക്കുന്നതിനുപകരം ശ്രദ്ധാപൂര്‍വം ഉപയോഗിക്കുക. ഡിജിറ്റല്‍ ഉപകരണങ്ങളെ ആശ്രയിക്കാതെ സമ്മര്‍ദ്ദം, ഉത്കണ്ഠ, മറ്റ് വികാരങ്ങള്‍ എന്നിവ കൈകാര്യം ചെയ്യുന്നതിനുള്ള ആരോഗ്യകരമായ ഉപാദികള്‍ തിരിച്ചറിയുക.
വ്യക്തിഗത ക്ഷേമത്തിനും സാമൂഹിക ആരോഗ്യത്തിനും കാര്യമായ പ്രത്യാഘാതങ്ങളുള്ള ഇന്നത്തെ ഹൈപ്പര്‍കണക്റ്റഡ് ലോകത്ത് ഡിജിറ്റല്‍ ആസക്തി ഉപേക്ഷവിചാരിക്കാന്‍ പറ്റാത്തൊരു പ്രശ്നമാണ്. ഡിജിറ്റല്‍ സാങ്കേതികതയില്‍ കുതിക്കുമ്പോഴും ബൗദ്ധിക ഉപയോഗം കുറയ്ക്കാതെ സൂക്ഷിക്കുക. അല്ലെങ്കില്‍ നമ്മുടെ പല കഴിവുകളും ശീലങ്ങളും നന്മകളും ഉപയോഗിക്കാതെ ക്ഷയിച്ചുപോകുന്നതിനു കാരണമാവാം. ഇന്ന് പലതും നമുക്ക് ഓര്‍ത്ത് വയ്ക്കേണ്ട ആവശ്യമില്ല. ഏതറിവും പഠിച്ച് ഹൃദിസ്ഥമാക്കണമെന്നും ഇല്ല. ആവശ്യം വരുമ്പോള്‍ നിര്‍ലോഭം ലഭ്യമാക്കാന്‍ സാങ്കേതികത്വം നമുക്കുണ്ട്. ഇനി ഭാവിയില്‍ തലചൂടാക്കുകയും വേണ്ടിവരില്ല; തലയില്‍ ഘടിപ്പിക്കുന്ന ചിപ്പ് കാര്യങ്ങള്‍ നടത്തിയേക്കാം. ഡിജിറ്റല്‍ ആസക്തിയുടെ കാരണങ്ങളും അനന്തരഫലങ്ങളും മനസിലാക്കുന്നതിലൂടെയും ലക്ഷ്യംവച്ചവ നടപ്പിലാക്കുന്നതിലൂടെയും, നമുക്ക് അതിന്‍റെ ആഘാതം ലഘൂകരിക്കാനും സാങ്കേതികവിദ്യയുമായി ആരോഗ്യകരമായ ബന്ധം വളര്‍ത്തിയെടുക്കാനും കഴിയും. കൂടുതല്‍ സന്തുലിതവും സുസ്ഥിരവുമായ ഗുണകരവുമായ ഡിജിറ്റല്‍ ഭാവി സൃഷ്ടിക്കുന്നതിന് വ്യക്തികള്‍, കുടുംബങ്ങള്‍, കമ്മ്യൂണിറ്റികള്‍, സമൂഹങ്ങള്‍ എന്ന നിലയില്‍ ഒരുമിച്ച് പ്രവര്‍ത്തിക്കേണ്ടത് അത്യന്താപേക്ഷിതമാണ്.
-ADVERTISEMENT-