ജീവിതമാണ് വെളിച്ചം : പാസ്റ്റർ ഷിബു തോമസ്സ്‌. കെ ഇ ഒമാൻ ചാപ്റ്റർ കൺവൻഷൻ ആരംഭിച്ചു
മസ്കറ്റ് : വാക്കിലും നടപ്പിലും നിർമലതയിലും എല്ലാ വിശ്വാസികളും മാതൃകയാകണമെന്ന് പാസ്റ്റർ ഷിബു തോമസ് ഒക്കലഹോമ. ജീവിതമാണ് വെളിച്ചം, ജീവിതമാണ് സാക്ഷ്യം. ക്രിസ്തുവിൽ ഭക്തിയോടെ ജീവിക്കുന്നവർക്ക് എന്നും ഉപദ്രവങ്ങൾ ഉണ്ടാകും. ജീവിതം കൊണ്ട് സാക്ഷ്യം തെളിയിക്കുകയും വചനം കൊണ്ട് ശുശ്രൂഷ ഉറപ്പിക്കുകയും ചെയ്തതിനാലാണ് യോഹന്നാൻ അപ്പോസ്തോലൻ പത്മോസ് ദ്വീപിൽ ആയത്. പാസ്റ്റർ ഷിബു തോമസ് ഓർമ്മപ്പെടുത്തി. ക്രൈസ്തവ എഴുത്തുപുര ഒമാൻ ചാപ്റ്റർ സംഘടിപ്പിച്ച ‘റിവൈവ് 2020’ എന്ന ഓൺലൈൻ കൺവൻഷനിൽ പങ്കെടുത്ത് സംസാരിക്കുകയായിരുന്നു അദ്ദേഹം.
ഡോ. സാബു പോളിന്റെ അധ്യക്ഷതയിൽ നടന്ന ആദ്യദിന കൺവെൻഷൻ ബിനോയ് തോമസ്സിന്റെ പ്രാർത്ഥനയോടെ ആരംഭിച്ചു. കെ ഇ ജനറൽ പ്രസിഡന്റ് പാസ്റ്റർ ജെ. പി. വെണ്ണിക്കുളം മീറ്റിംഗ് ഔപചാരികമായി ഉദ്ഘാടനം ചെയ്തു. കെ ഇ ഒമാൻ ചാപ്റ്റർ സെക്രട്ടറി സജി വർഗീസ് സ്വാഗതം അറിയിച്ചു. ക്രൈസ്തവ എഴുത്തുപുര ഒമാൻ പ്രവർത്തനങ്ങളെ ചാപ്റ്റർ പ്രസിഡന്റ് ഫെയ്ത്ത് എബ്രഹാം പരിചയപ്പെടുത്തി. അലക്സ് കെ ജോർജ്ജ് (OPA സെക്രട്ടറി), പാസ്റ്റർ കുഞ്ഞുമോൻ വർഗീസ്സ് (COG Oman) എന്നിവർ ആശംസകൾ അറിയിച്ചു. പാസ്റ്റർ വേണുദാസ് (ടാബർനാക്കിൾ അപ്പോസ്‌തോലിക് ചർച്ച്), പാസ്റ്റർ ഷിബു (സിനാവ്) എന്നിവർ പ്രാർത്ഥനാ ശുശ്രൂഷ നിർവഹിച്ചു. പാസ്റ്റർ ഷോജി കോശി (OPA പ്രസിഡന്റ്) സമാപന പ്രാർത്ഥന നടത്തി.
ക്രൈസ്തവ സംഗീതലോകത്തിന് പരിചിതനായ യുവഗായകൻ ഇവാ. എബിൻ അലക്സും, കെ ഇ ഒമാൻ ക്വയറും സംഗീതാരാധനയ്ക്ക് നേതൃത്വം നൽകി. ഒമാനിലെ വിവിധ സഭാ പ്രതിനിധികൾ, വിശ്വാസികൾ, ക്രൈസ്തവ എഴുത്തുപുര ചാപ്റ്റർ പ്രതിനിധികൾ തുടങ്ങി നിരവധി പേർ മീറ്റിംഗിൽ പങ്കെടുത്തു.
സൂം പ്ലാറ്റ്ഫോമിലൂടെ നടക്കുന്ന കൺവെൻഷന്റെ രണ്ടാം ദിനം ഇന്ന് വൈകിട്ട് 8 മുതൽ മീറ്റിംഗ് ആരംഭിക്കുമെന്ന് സംഘാടകർ അറിയിച്ചു.
മീറ്റിംഗ് ഐ ഡി : 867 1709 7116
-ADVERTISEMENT-