വാർത്തയും യാഥാർത്ഥ്യവും: മദ്യവും മയക്കുമരുന്നും യുവാക്കളെ കൊലപാതകരാക്കുന്നു | ഫിന്നി കാഞ്ഞങ്ങാട്

കഴിഞ്ഞ പ്രഭാതത്തിൽ കായംകുളം പട്ടണം ഉണർന്നെഴുന്നേറ്റത് അഭിഭാഷകനായ മകൻ മദ്യലഹരിയിൽ പിതാവിനെ വെട്ടിക്കൊല്ലുകയും മാതാവിന് ഗുരുതരമായ പരിക്കുകൾ ഏൽപ്പിക്കുകയും ചെയ്തുവെന്ന വേദനാജനകമായ വാർത്ത കേട്ടാണ്.

മദ്യവും മയക്കുമരുന്നും ഇന്നത്തെ തലമുറയെ ഏറ്റവും ഭീകരമായി കവർന്നെടുക്കുന്ന രണ്ട് മഹാവിപത്തുകളാണ്. ഒരിക്കൽ വിനോദത്തിന്റെയും കൂട്ടായ്മയുടെയും പേരിൽ ആരംഭിക്കുന്ന ശീലങ്ങൾ പിന്നീട് യുവാക്കളെ ശാരീരികമായി, മാനസികമായി, സാമൂഹികമായി തകർക്കുന്ന ഒരു വിഷവിത്തായി മാറുന്നു. ചരിത്രവും സമൂഹവും വ്യക്തമാക്കുന്ന ഒരേയൊരു സത്യം എന്തെന്നാൽ—മദ്യവും മയക്കുമരുന്നും ഒരാളുടെ ജീവിതം നശിപ്പിക്കുമ്പോൾ അവനോടൊപ്പം കുടുംബവും സമൂഹവും നശിക്കപ്പെടുന്നു.

ഇന്നത്തെ യുവാക്കളെ ഈ ദോഷങ്ങൾ കൂടുതൽ വലയുന്നതിന് പ്രധാന കാരണം കൗതുകം, കൂട്ടുകാരുടെ സമ്മർദ്ദം, മാധ്യമ സ്വാധീനം, കുടുംബബന്ധങ്ങളിലെ അകൽച്ച, മാനസിക സമ്മർദ്ദം എന്നിവയാണ്. “ഒന്ന് രസത്തിനായി തുടങ്ങാം” എന്ന തോന്നലിൽ ആരംഭിക്കുന്നത് പിന്നീട് അടിമത്തത്തിലേക്കും നിയന്ത്രണം നഷ്ടപ്പെടുന്നതിനും നയിക്കുന്നു.

മദ്യം, കഞ്ചാവ്, ബ്രൗൺ ഷുഗർ, എം.ഡി.എം.എ., എൽ.എസ്.ഡി., ഐസ്, വിവിധ അഡിക്ടീവ് ടാബ്‌ലെറ്റുകൾ തുടങ്ങി ലഭ്യമായ നിരവധി മയക്കുമരുന്നുകൾ യുവമനസ്സിനെ വിഷപ്തമാക്കി മാറ്റുന്നു.

മയക്കുമരുന്നിന്റെയും മദ്യത്തിന്റെയും തുടർച്ചയായ ഉപയോഗം മുൻകൂട്ടി ചിന്തിക്കാനുള്ള ശേഷി ഇല്ലാതാക്കുന്നു. നല്ലതും ചീത്തയും തിരിച്ചറിയാനുള്ള ബുദ്ധിശക്തി നഷ്ടപ്പെട്ടപ്പോൾ, പലപ്പോഴും അവർ അനിയന്ത്രിതമായ കോപത്തിലേക്കും അസഹിഷ്ണുതയിലേക്കും തള്ളപ്പെടുന്നു. നിരപരാധികളോടുള്ള ആക്രമണം, ചെറുതായ തർക്കങ്ങളിലും ക്രൂരത, പ്രതികാര മനോഭാവം, മനഃക്ലേശം എന്നിവ ചേർന്നപ്പോൾ, പല യുവാക്കളും കൊലപാതകങ്ങളടക്കമുള്ള ഗുരുതര കുറ്റകൃത്യങ്ങളിൽ ഏർപ്പെടുന്നു. രാജ്യത്ത് നടക്കുന്ന നിരവധി ക്രൂര സംഭവങ്ങളുടെ പിന്നിൽ ഏകദേശം 80 ശതമാനവും ഈ ലഹരി മരുന്നുകളുടെ സ്വാധീനം പ്രധാന കാരണമാണെന്ന് മനഃശാസ്ത്ര പഠനങ്ങൾ വ്യക്തമാക്കുന്നു.

കുടുംബമാണ് ആദ്യം നശിക്കുന്നത്. മയക്കുമരുന്ന് ഉപയോഗിക്കുന്നൊരു യുവാവ് വീടിന്റെയും മാതാപിതാക്കളുടെയും സമാധാന അന്തരീഷം തകർക്കും. പണം കണ്ടെത്താനായി അവൻ മോഷണങ്ങളിലും ക്രൂരകൃത്യങ്ങളിലും ഏർപ്പെടാൻ തുടങ്ങും. ഇതിലൂടെ കുടുംബബന്ധങ്ങൾ തകർന്നു സമൂഹത്തിൽ അവർ വെറുക്കപ്പെടുന്നു. സ്‌കൂൾ, കോളേജ്, തൊഴിൽ ഇടങ്ങളിൽ, എവിടെയെത്തിയാലും ജീവിതം തകരുന്നു. ഒടുവിൽ നല്ല ഭാവിയുണ്ടെന്ന് കരുതിയ അനേകം യുവാക്കൾ ജയിൽവാസത്തിന്റെയും മരണത്തിന്റെയും വക്കിൽ എത്തുന്നതിന് ലഹരിയാണ് ഇന്ന് കാരണമാകുന്നത്.

സർക്കാരും വിവിധ സംഘടനകളും ലഹരി വിരുദ്ധ പ്രചാരണങ്ങൾ സംഘടിപ്പിച്ചുകൊണ്ടിരിക്കുന്നു. എന്നാൽ യഥാർത്ഥ മാറ്റം കൊണ്ടുവരേണ്ടത് കുടുംബങ്ങളും സമൂഹവും ചേർന്നാണ്. കുട്ടികളെ ചെറുപ്പം മുതൽ മദ്യ–മയക്കുമരുന്നുകളുടെ നാശത്തെക്കുറിച്ച് ബോധവൽക്കരിക്കണം. രക്ഷിതാക്കൾ കുട്ടികളുമായി കൂടുതൽ സമയം ചെലവഴിക്കുകയും, അവരുടെ മാനസികാവസ്ഥയും സുഹൃത് സ്വാധീനങ്ങളുമെല്ലാം ശ്രദ്ധിക്കുകയും ചെയ്യണം. വിദ്യാഭ്യാസ സ്ഥാപനങ്ങൾ വിദ്യാർത്ഥികൾക്ക് ജീവിതമൂല്യങ്ങൾ പഠിപ്പിക്കുന്ന ക്ലാസുകൾ കൂടുതൽ ശക്തിപ്പെടുത്തണം.

സമൂഹവും സഭകളും ക്ലബ്ബുകളും സ്പോർട്സ് ഗ്രൂപ്പുകളും യുവാക്കൾക്കായി ആരോഗ്യകരമായ അവസരങ്ങളും കൂട്ടായ്മകളും സൃഷ്ടിക്കണം. പ്രത്യാശ നൽകുകയും ജീവിതത്തിന്റെ മൂല്യം ബോധ്യപ്പെടുത്തുകയും ചെയ്യുന്ന ഒരാളെ ലഹരി തൊടുകയില്ല. ലഹരിക്കടിമകളായവർക്ക് പുനരധിവാസ കേന്ദ്രങ്ങളിലൂടെ കാരുണ്യവും കൗൺസിലിംഗും നൽകേണ്ടതും അവർക്ക് തിരിച്ചുവരവിന്റെ വഴിതെളിക്കേണ്ടതും സമൂഹത്തിന്റെ ഉത്തരവാദിത്വമാണ്.

യുവാക്കൾ ഒരു രാഷ്ട്രത്തിന്റെ ഭാവിയാണ്. അവർ ലഹരിയുടെ ഇരകളാകുമ്പോൾ ഒരു തലമുറ തന്നെ നശിക്കുന്നു. അതിനാൽ മദ്യത്തിനും മയക്കുമരുന്നിനെതിരെയുമുള്ള പോരാട്ടം നാളെയല്ല—ഇന്നുതന്നെ ആരംഭിക്കേണ്ട യുദ്ധമാണ്.

ഫിന്നി കാഞ്ഞങ്ങാട്

- Advertisement -