ഇടയ്ക്കാട് യു.സി.എഫ് ശുഭദിനസന്ദേശം തുടർച്ചയായ ആയിരം ദിവസം പിന്നിടുന്നു

ഇടയ്ക്കാട്: ഐക്യകൂട്ടായ്മകളുടെ അതുല്യ മാതൃകകൾ ഉള്ള ഗ്രാമമാണ് ഇടയ്ക്കാട്. ഇവിടെയുള്ള വേർപെട്ട ദൈവസഭകളുടെ ഐക്യ കൂട്ടായ്മയായ
യുണൈറ്റഡ് ക്രിസ്ത്യൻ ഫെലോഷിപ്പ് നടത്തിവരുന്ന വിപുലമായ പ്രവർത്തനങ്ങളിൽ ഐക്യകൺവൻഷൻ, സംയുക്ത വി.ബി.എസ്, പരസ്യയോഗങ്ങൾ, ജീവ കാരുണ്യ പ്രവർത്തനങ്ങൾ, സംഗീത പരിപാടികൾ, ശുഭദിന സന്ദേശം തുടങ്ങിയവ ഉൾപ്പെടുന്നു.

ശുഭദിന സന്ദേശം തുടർച്ചയായി ആയിരം ദിവസം പിന്നിടുകയാണ്. എല്ലാ ദിവസവും അർദ്ധരാത്രിയിൽ തന്നെ ശുഭദിന സന്ദേശം യു സി എഫ് ഫേസ്ബുക്ക് പേജിലും വാട്സാപ്പ് ഗ്രൂപ്പിലും അപ്ലോഡ് ചെയ്യും. ഇടയ്ക്കാട് നിന്നും ലോകമെങ്ങും പാർക്കുന്നവർ ശുഭദിനസന്ദേശം കേട്ടാണുണരുന്നത്. ഇടയ്ക്കാട് നിന്നും വിവിധയിടങ്ങളിൽ പാർക്കുന്ന ദൈവമക്കളാണ് ഓരോ ദിനവും സന്ദേശം നല്കുന്നത്. അഞ്ച് മിനിട്ട് ദൈർഘ്യമാണ് ഓരോ സന്ദേശത്തിനും.

ആയിരം ദിവസം പിന്നിടുന്ന ശനിയാഴ്ച വൈകിട്ട് 7 മുതൽ 9.30 വരെ സൂമിലൂടെ പ്രത്യേക പ്രോഗ്രാം ക്രമീകരിച്ചിട്ടുണ്ട്. അനുഭവങ്ങൾ പങ്കുവയ്ക്കൽ, കുടുംബ ഗീതം, സംഘഗാനം, ആശംസ സന്ദേശങ്ങൾ തുടങ്ങി വ്യത്യസ്തമായ പരിപാടികൾ നടക്കും. ക്രൈസ്തവ എഴുത്തുപുര മുൻനിര പ്രവർത്തകനും മികച്ച സംഘാടകനുമായ പാസ്റ്റർ ഫിന്നി കാഞ്ഞങ്ങാട് പ്രഭാഷണം നടത്തും. ഷാജൻ ജോൺ ഇടയ്ക്കാട് അദ്ധ്യക്ഷത വഹിക്കും. കുഞ്ഞുമോൻ പാപ്പച്ചൻ ആമുഖ പ്രസംഗം നടത്തും. ഇടയ്ക്കാട് നിന്നുള്ള യുവഗായകരുടെ നേതൃത്വത്തിൽ ഷാർജ ശാലേം എ.ജി. ഗായകസംഘം ഗാനശുശ്രുഷ നയിക്കും. യു.സി.എഫ് ഉപദേശകരായ പാസ്റ്റർമാർ, ലോകമെങ്ങുമുള്ള ഇടയ്ക്കാട് നിവാസികൾ, അഭ്യുദയകാംക്ഷികൾ, സ്നേഹിതർ തുടങ്ങിയവർ പങ്കെടുക്കും. യു.സി.എഫ് അഡ്മിൻ പാനൽ ക്രമീകരണങ്ങൾക്കു നേതൃത്വം നല്കും. വ്യത്യസ്തമായ ഈ പ്രോഗ്രാമിൽ പങ്കെടുക്കുവാൻ എല്ലാവരെയും സംഘാടകർ ക്ഷണിച്ചിട്ടുണ്ട്.
Zoom ID: 82074018808
Passcode: 29424

-ADVERTISEMENT-