സുഡാൻ: സ്ഥിതി രൂക്ഷം; പലായനം തുടരുന്നു
ഖാർത്തും: ആഭ്യന്തരയുദ്ധത്തിൽനിന്നു രക്ഷപ്പെടാൻ വഴിതേടി സുഡാൻ ജനത. വിദേശ സർക്കാരുകൾ സുഡാനിൽ പ്രവർത്തിച്ചിരുന്ന നയതന്ത്രജ്ഞരെയും സ്വന്തം പൗരന്മാരെയും രക്ഷപ്പെടുത്തുകയാണ്.
ഒഴിപ്പിക്കൽ പൂർത്തിയായാൽ ഇരുപക്ഷവും തമ്മിൽ അധികാരത്തിനായി നടത്തുന്ന യുദ്ധം രൂക്ഷമാകുമെന്ന വിലയിരുത്തലുകളുടെ പശ്ചാത്തലത്തിലാണു സുഡാൻ ജനത തലസ്ഥാനമായ ഖാർത്തൂമിൽനിന്നു രക്ഷപ്പെടാൻ വഴി തേടുന്നത്.
യുദ്ധക്കെടുതി നേരിടാൻ കഴിയാതെ ജനങ്ങൾ രാജ്യത്തിന്‍റെ കിഴക്കൻ തീരത്തേക്കു നീങ്ങുകയാണ്. വെടിവയ്പ് ഭീഷണി നിലനിൽക്കെ മറ്റു വഴിയില്ലാതെയാണ് ജനതയുടെ പലായനം. യൂറോപ്പ്, പശ്ചിമേഷ്യ എന്നിവിടങ്ങളിൽനിന്നു ഹെലിക്കോപ്റ്ററുകൾ ഇവിടെ രക്ഷാപ്രവർത്തനം തുടരുന്നുണ്ട്. സുരക്ഷ ഉറപ്പുനൽകിയാൽ കൂടുതൽ വിമാനങ്ങൾ അയയ്ക്കാൻ തയാറാണെന്നു ഫ്രാൻസും ജർമനിയും അറിയിച്ചു.
ഒന്പതുദിവസമായി തുടരുന്ന യുദ്ധംഭയന്ന് ജനങ്ങൾ വീടുകളിലും ഭൂഗർഭ അറകളിലും കഴിയുകയാണ്. സ്ഫോടനങ്ങളും വെടിവയ്പും കൊള്ളയും കൊള്ളിവയ്പും തുടരുന്നതായാണു ഖാർത്തൂമിൽനിന്നുള്ള റിപ്പോർട്ടുകൾ. ഭക്ഷണക്ഷാമം രൂക്ഷമാണ്. ആശുപത്രികൾ തകർച്ചയുടെ വക്കിലും.
264 സാധാരണക്കാർ ഉൾപ്പെടെ 420 പേരാണ് ഇതുവരെ സുഡാനിലെ യുദ്ധത്തിൽ കൊല്ലപ്പെട്ടത്. 3,700 പേർക്കു പരിക്കേറ്റിട്ടുണ്ട്. സുഡാൻ സൈന്യവും ആർഎസ്എഫ് എന്ന ശക്തരായ അർധസൈനികവിഭാഗവും തമ്മിലാണ് ഏറ്റുമുട്ടൽ. ധാരാളം വിദേശികൾ താമസിക്കുന്ന ഖാർത്തൂം പ്രാന്തപ്രദേശങ്ങളിൽ ഷെല്ലിംഗും ഡ്രോണ്‍ ആക്രമണവും ശക്തമാണ്. ചിലയിടങ്ങളുടെ നിയന്ത്രണം ആർഎസ്എഫ് കൈക്കലാക്കിയിട്ടുമുണ്ട്.
സുഡാനിൽനിന്ന് ഇനി 4000 ബ്രിട്ടീഷ് പൗരന്മാരെ ഒഴിപ്പിക്കാനുണ്ട്. ഒഴിപ്പിക്കൽ സംബന്ധിച്ച് ബ്രിട്ടീഷ് സർക്കാർ കൃത്യമായ വിവരം നല്കുന്നില്ലെന്ന് ഇവർ പരാതിപ്പെട്ടു. 1200 ബ്രിട്ടൻകാരെയാണ് ഇതുവരെ സുഡാനിൽനിന്ന് ഒഴിപ്പിച്ചത്. ഹെലികോപ്റ്ററുകൾ ഉപയോഗിച്ച് 70 എംബസി ഉദ്യോഗസ്ഥരെ അമേരിക്ക ഒഴിപ്പിച്ചു.
28 രാജ്യങ്ങളിലെ 388 പൗരന്മാരെ ഫ്രാൻസ് ഒഴിപ്പിച്ചു. ഇതിൽ ഇന്ത്യക്കാരും ഉൾപ്പെടുന്നു. ജർമനി(311), ഇറ്റലി(200), സ്പെയിൻ(172) എന്നിങ്ങനെയാണു മറ്റു രാജ്യങ്ങൾ ഒഴിപ്പിച്ച പൗരന്മാരുടെ എണ്ണം.
-ADVERTISEMENT-