സംസ്ഥാനത്ത് വീണ്ടും മഴ ശക്തിപ്രാപിക്കുന്നു; രണ്ട് ജില്ലകളില്‍ റെഡ് അലര്‍ട്ട്
കോട്ടയം: സംസ്ഥാനത്ത് വീണ്ടും മഴ ശക്തിപ്രാപിക്കുന്നു. കോഴിക്കോട്, മലപ്പുറം, ആലപ്പുഴ, കോട്ടയം, ഇടുക്കി ജില്ലകളില്‍ ശക്തമായ മഴയാണ് പെയ്യുന്നത്. മണ്ണിടിച്ചിലുണ്ടായ മലപ്പുറം കവളപ്പാറയില്‍ വീണ്ടും മഴ പെയ്യുന്നത് തെരച്ചിലിനെ ബാധിക്കുമെന്ന ആശങ്കയുയര്‍ത്തിയിട്ടുണ്ട്.
കോഴിക്കോട് ജില്ലയുടെ മലയോര മേഖലകളിലും ശക്തമായ മഴ തുടരുകയാണ്. മലപ്പുറം, കോഴിക്കോട് ജില്ലകളില്‍ അതിതീവ്ര മഴയ്ക്കു സാധ്യതയുള്ളതിനാല്‍ ഇവിടങ്ങളില്‍ ഇന്ന് റെഡ് അലര്‍ട്ട് പ്രഖ്യാപിച്ചിട്ടുണ്ട്. ഇടുക്കി, തൃശൂര്‍, പാലക്കാട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ ഇന്ന് ഓറഞ്ച് അലര്‍ട്ടും എറണാകുളം ജില്ലയില്‍ യെലോ അലര്‍ട്ടും പ്രഖ്യാപിച്ചിട്ടുണ്ട്. കോട്ടയം ജില്ലയുടെ വിവിധ മേഖലകളില്‍ ചൊവ്വാഴ്ച രാത്രിയും ബുധനാഴ്ച പുലര്‍ച്ചെയും കനത്ത മഴയാണ് പെയ്യുന്നത്. മീനിച്ചിലാറ്റില്‍ നേരിയതോതില്‍ ജലനിരപ്പ് ഉയര്‍ന്നിട്ടുണ്ട്. ഇതേത്തുടര്‍ന്ന്, പാലാ- ഈരാറ്റുപേട്ട റോഡില്‍ വീണ്ടും വെള്ളം കയറി ഗതാഗതം ഭാഗികമായി തടസപ്പെട്ടു.
പത്തനംതിട്ട റാന്നിയില് പമ്പയാറും കൈവഴിയായ തോടും വീണ്ടും നിറഞ്ഞു. കഴിഞ്ഞ ദിവസം വൈകുന്നേരം തുടങ്ങിയ മഴയിലാണ് ജലനിരപ്പ് ഉയര്ന്നത്.
-ADVERTISEMENT-