കാലികം: തോട്ടം തോട്ടി തൊട്ടി… | റോഷൻ ഹരിപ്പാട്

സമീപകാലത്ത് സമൂഹമാധ്യമങ്ങളിൽ വളരെ രസകരമായ ഒരു വീഡിയോ വൈറലായിരുന്നു. ഒരു പെന്തകോസ്ത് സഭയുടെ കൺവെൻഷനിൽ, പാസ്റ്റർ അനീഷ് കാവാലം പ്രസംഗിക്കുമ്പോൾ സ്റ്റീവ് എന്ന യുവാവ് ബൈബിൾ വായിച്ചു സഹായിക്കുന്നതിനിടെ ചെറിയൊരു തെറ്റ് സംഭവിച്ചു. സാധാരണയായി ഇത്തരത്തിലുള്ള സാഹചര്യങ്ങളിൽ പലരും വിഷമിക്കുകയോ, ചിലപ്പോൾ ക്ഷുഭിതരാകുകയോ ചെയ്യാറുണ്ട്. എന്നാൽ സ്റ്റീവ് അതിനെ കൈകാര്യം ചെയ്ത വിധം പലർക്കും ഒരു വലിയ ആത്മീയ പാഠമായി മാറി. ഇളിഭ്യനായിട്ടും അദ്ദേഹം അതിനെ ഒരു പ്രശ്നമാക്കി കാണാതെ, വളരെ സമാധാനത്തോടും സന്തോഷത്തോടും കൂടി അത് സ്വീകരിച്ചു. ദൈവവചനത്തോടുള്ള ബഹുമാനവും, വേദിയിൽ ദൈവവചനം പ്രസംഗിച്ച ദൈവദാസനോടുള്ള ആദരവും അദ്ദേഹം പ്രകടിപ്പിച്ചു. നെഗറ്റീവ് പ്രതികരണം ഒന്നും കാണിക്കാതെ, വളരെ പോസിറ്റീവായി അദ്ദേഹം പെരുമാറിയത് ലോകം മുഴുവൻ ഇരുന്നു സോഷ്യൽ മീഡിയയിൽ കൂടി ആ വിഡിയോ കണ്ടവർക്ക് അത് വലിയ മാതൃകയായി.

ഇത് കണ്ടപ്പോൾ പണ്ടൊരിക്കൽ നടന്ന ഒരു സംഭവവും ഓർമ്മവന്നു. ഒരു സഭായോഗത്തിൽ ഒരു സഹോദരൻ സാക്ഷ്യം പറയാൻ എഴുന്നേറ്റപ്പോൾ അദ്ദേഹം ഒരു പാട്ട് പാടി. പക്ഷേ പാട്ടിന്റെ ട്യൂൺ അല്പം തെറ്റിപ്പോയി. അത് പലർക്കും മനസ്സിലായെങ്കിലും പ്രതികരിച്ചില്ല. എന്നാൽ സഭാഹാളിന്റെ പിന്നിലിരുന്ന രണ്ടു സഹോദരിമാർ തമ്മിൽ നോക്കി ചിരിച്ചു. വേറെയൊരു കാര്യം പറഞ്ഞാണ് അവർ ചിരിച്ചതെങ്കിലും, അത് പാട്ടുപാടിയ സഹോദരനെ കുറിച്ചാണെന്ന് തെറ്റിദ്ധരിച്ചു മറ്റൊരാൾ അദ്ദേഹത്തോട് പറഞ്ഞുകൊടുത്തു.

അത് അറിഞ്ഞപ്പോൾ ആ സഹോദരന് വലിയ വിഷമവും കോപവും ഉണ്ടായി. ചെറിയ ഒരു വിഷയം വലിയ വിവാദമായി മാറി. പിന്നീട് അത് സഭയിൽ വലിയ പ്രശ്നങ്ങൾക്കും കാരണമായി. ഒടുവിൽ, അദ്ദേഹവും കുടുംബവും അദ്ദേഹത്തെ അനുകൂലിച്ച ചിലരും സഭ വിട്ടുപോകേണ്ടി വന്ന സ്ഥിതിവരെ കാര്യങ്ങൾ എത്തി. ഒരു ചെറിയ സംഭവമെന്നോണം ആരംഭിച്ച കാര്യം, ആ സഭയുടെ ആത്മീയ അന്തരീക്ഷത്തെ തന്നെ ബാധിച്ചു.

ഇവിടെ സ്റ്റീവ് കാണിച്ച സമീപനം അതിനോട് തീർത്തും വ്യത്യസ്തമാണ്. ഒരുപക്ഷേ അദ്ദേഹം ആ സമയത്ത് ദേഷ്യപ്പെടുകയോ, നെഗറ്റീവായി പ്രതികരിക്കുകയോ, സ്റ്റേജിൽ നിന്ന് ഇറങ്ങി പോകുകയോ ചെയ്തിരുന്നെങ്കിൽ ആ സമ്മേളനത്തിന്റെ അന്തരീക്ഷം തന്നെ മാറിപ്പോകുമായിരുന്നു. മാത്രമല്ല, അദ്ദേഹത്തെ അനുകൂലിക്കുന്നവരും അനീഷ് പാസ്റ്ററെ വിമർശിക്കുന്നവരും എന്നിങ്ങനെ സമൂഹത്തിൽ രണ്ട് വിഭാഗങ്ങൾ രൂപപ്പെടുകയും ചെയ്യുമായിരുന്നു. അതൊക്കെ പിന്നീട് സമൂഹമാധ്യമങ്ങളിൽ വലിയ വിവാദമായി മാറി ദൈവസഭയ്ക്ക് തന്നെ അപമാനമാകാനുള്ള സാധ്യതയുമുണ്ടായിരുന്നു.

എന്നാൽ സ്റ്റീവ് അതെല്ലാം ഒഴിവാക്കി. ഒരു ചെറിയ തെറ്റിനെ വലിയ വിഷയമാക്കാതെ, വളരെ വിനയത്തോടും പക്വതയോടും കൂടി അദ്ദേഹം പ്രതികരിച്ചു.

ഈ രണ്ട് സംഭവങ്ങളും നമ്മെ പഠിപ്പിക്കുന്ന പാഠം, ക്രിസ്തീയ ജീവിതത്തിൽ ചിലപ്പോൾ സംഭവിക്കുന്ന ചെറിയ തെറ്റുകൾ നമ്മെ പരീക്ഷിക്കാനായിരിക്കും; പക്ഷേ ആ സാഹചര്യങ്ങളിൽ നമ്മൾ എങ്ങനെ പ്രതികരിക്കുന്നു എന്നതാണ് ഏറ്റവും പ്രധാനപ്പെട്ടത്.

ഇന്നത്തെ സമൂഹമാധ്യമങ്ങളുടെ കാലഘട്ടത്തിൽ, ചെറിയ സംഭവങ്ങൾ പോലും വലിയ വിവാദങ്ങളായി മാറാൻ അധിക സമയം വേണ്ടതില്ല. അത്തരം സാഹചര്യങ്ങളിൽ സമാധാനവും വിനയവും കൈവിടാതെ, കാര്യങ്ങളെ പോസിറ്റീവായി കാണുന്ന മനോഭാവം വളരെ ആവശ്യമാണ്.

അതുകൊണ്ടുതന്നെ സ്റ്റീവ് കാണിച്ച ഈ സമീപനം അഭിനന്ദനാർഹമാണ്. ഒരു ചെറിയ സംഭവത്തെ വലിയ പ്രശ്നമാക്കാതെ, ദൈവസഭയുടെ മാന്യതയും ആത്മീയ അന്തരീക്ഷവും കാത്തുസൂക്ഷിക്കുന്ന തരത്തിൽ അദ്ദേഹം പ്രതികരിച്ചു.

ചിലപ്പോൾ ഒരു ചെറിയ പിഴവ് പോലും നമ്മെ വിനയത്തിലും സഹനത്തിലും വളരാൻ സഹായിക്കുന്ന ദൈവത്തിന്റെ അവസരമായിരിക്കാം.

സ്റ്റീവ് കാണിച്ച ഈ പോസിറ്റീവ് സമീപനം നമ്മളെല്ലാവർക്കും അനുസരണീയമായ ഒരു മനോഹര മാതൃകയാകട്ടെ.

റോഷൻ ഹരിപ്പാട് 

- Advertisement -