ലേഖനം: രൂത്ത് – കൃപയുടെയും വീണ്ടെടുപ്പിന്റെയും പുതിയനിയമ ദർശനം | സാജു മാത്യു പരുമല

ബൈബിളിലെ ഏറ്റവും ചെറിയ പുസ്തകങ്ങളിൽ ഒന്നാണെങ്കിലും, രക്ഷാകര ചരിത്രത്തിൽ രൂത്തിന്റെ പുസ്തകത്തിനുള്ള സ്ഥാനം വളരെ വലുതാണ്. പഴയനിയമ കാലഘട്ടത്തിൽ എഴുതപ്പെട്ടതാണെങ്കിലും, ഈ പുസ്തകത്തിലെ ഓരോ സംഭവങ്ങളും പുതിയ നിയമത്തിൽ വെളിപ്പെട്ട ക്രിസ്തുരഹസ്യങ്ങളിലേക്കും ദൈവകൃപയിലേക്കും വിരൽ ചൂണ്ടുന്നവയാണ്. ന്യായാധിപന്മാരുടെ കാലത്തെ അരാജകത്വത്തിനും ഇരുട്ടിനുമിടയിൽ പ്രകാശിക്കുന്ന ഒരു നക്ഷത്രം പോലെ രൂത്തിന്റെ ജീവിതം നിലകൊള്ളുന്നു. പുതിയ നിയമത്തിന്റെ അടിസ്ഥാനത്തിൽ രൂത്തിനെ വിശകലനം ചെയ്യുമ്പോൾ, അത് കേവലം ഒരു ചരിത്രമല്ല, മറിച്ച് ദൈവത്തിന്റെ സാർവത്രികമായ രക്ഷാസന്ദേശമാണെന്ന് നമുക്ക് മനസ്സിലാക്കാം.

പുതിയ നിയമത്തിന്റെ പ്രാരംഭത്തിൽ തന്നെ, മത്തായിയുടെ സുവിശേഷത്തിലെ യേശുക്രിസ്തുവിന്റെ വംശാവലിയിൽ രൂത്തിന്റെ പേര് നാം കാണുന്നു. യഹൂദ പാരമ്പര്യമനുസരിച്ച് വംശാവലികളിൽ പുരുഷന്മാരുടെ പേരുകൾ മാത്രമാണ് രേഖപ്പെടുത്താറുള്ളത്. എന്നാൽ മത്തായി ബോധപൂർവ്വം രൂത്തിനെ അവിടെ ഉൾപ്പെടുത്തി. മോവാബ്യ സ്ത്രീയായ രൂത്ത് മിശിഹായുടെ പൂർവ്വികയായത് വഴി, പുതിയ നിയമം വിഭാവനം ചെയ്യുന്ന ‘സാർവത്രിക സഭ’ എന്ന സങ്കല്പം അന്നേ വ്യക്തമാക്കപ്പെട്ടു. യഹൂദനെന്നോ ഗ്രീക്കാരനെന്നോ വ്യത്യാസമില്ലാതെ, വിശ്വസിക്കുന്ന എല്ലാവർക്കും ദൈവരാജ്യം അവകാശപ്പെട്ടതാണ് എന്ന സത്യം രൂത്തിലൂടെ പ്രഖ്യാപിക്കപ്പെടുന്നു. അബ്രാഹാമിന്റെ സന്തതികൾ എന്ന ശാരീരികമായ അവകാശവാദത്തേക്കാൾ, വിശ്വാസത്തിലൂടെ ദൈവമക്കളാകുക എന്ന പുതിയ നിയമ ദർശനത്തിന്റെ ആദ്യരൂപമായി രൂത്തിനെ കാണാം.

രൂത്തിന്റെ ജീവിതത്തിലെ ഏറ്റവും പ്രധാനപ്പെട്ട ഘടകം അവളുടെ വീണ്ടെടുപ്പുകാരനായ ബോവാസാണ്. പുതിയ നിയമത്തിലെ യേശുക്രിസ്തുവിന്റെ മുൻകുറിയാണ് ബോവാസ്. ദാരിദ്ര്യത്തിലും പ്രവാസത്തിലും അകപ്പെട്ട രൂത്തിനെ ബോവാസ് വീണ്ടെടുക്കുന്നത്, പാപത്തിന് അടിമപ്പെട്ട മനുഷ്യവർഗത്തെ ക്രിസ്തു തന്റെ രക്തത്താൽ വീണ്ടെടുക്കുന്നതിന് തുല്യമാണ്. ബോവാസ് രൂത്തിനെ സ്നേഹിച്ചത് അവൾക്ക് അർഹതയുള്ളതുകൊണ്ടല്ല, മറിച്ച് തന്റെ കൃപയാലാണ്. ഇതേ കൃപയാണ് പൗലോസ് അപ്പസ്തോലൻ തന്റെ ലേഖനങ്ങളിലൂടെ ഊന്നിപ്പറയുന്നത്. “കൃപയാലല്ലോ വിശ്വാസം മൂലം നിങ്ങൾ രക്ഷിക്കപ്പെട്ടിരിക്കുന്നത്; അത് ദൈവത്തിന്റെ ദാനമാകുന്നു” എന്ന വചനം രൂത്തിന്റെ ജീവിതത്തിൽ അന്വർത്ഥമാകുന്നു. നിയമത്തിന്റെ കർക്കശതയനുസരിച്ച് ഒരു വിജാതീയ സ്ത്രീക്ക് യിസ്രായേൽ സഭയിൽ വിലക്കുണ്ടായിരുന്നിട്ടും, കൃപ നീയമത്തെ മറികടക്കുന്നത് നാം ഇവിടെ കാണുന്നു.

രൂത്തിന്റെ പരിവർത്തനവും സമർപ്പണവും പുതിയ നിയമത്തിലെ ‘ശിഷ്യത്വ’ത്തിന്റെ (Discipleship) ഉത്തമ ഉദാഹരണമാണ്. തന്റെ ജനത്തെയും ദേവന്മാരെയും പഴയ ജീവിതത്തെയും പൂർണ്ണമായി ഉപേക്ഷിച്ചുകൊണ്ടാണ് അവൾ നവോമിയോടൊപ്പം ബെത്‌ലഹേമിലേക്ക് വരുന്നത്. “നവോമി പോകുന്നിടത്ത് ഞാനും വരും, നവോമിയുടെ ദൈവം എന്റെ ദൈവം” എന്ന അവളുടെ വാക്കുകൾ ക്രിസ്തുവിനെ അനുഗമിക്കാൻ എല്ലാം ഉപേക്ഷിക്കുന്ന ഒരു വിശ്വാസിയുടെ സമർപ്പണത്തിന് തുല്യമാണ്. പഴയ മനുഷ്യനെ ഉരിഞ്ഞുമാറ്റി പുതിയ മനുഷ്യനെ ധരിക്കുക എന്ന പൗലോസിന്റെ ആഹ്വാനം രൂത്ത് തന്റെ ജീവിതത്തിലൂടെ പ്രായോഗികമാക്കി എന്നു പറയാം. അവൾ മോവാബിൽ നിന്ന് ബെത്‌ലഹേമിലേക്ക് നടത്തിയ യാത്ര, ഇരുട്ടിൽ നിന്ന് വെളിച്ചത്തിലേക്കും മരണത്തിൽ നിന്ന് ജീവനിലേക്കുമുള്ള ഒരു വിശ്വാസിയുടെ പ്രയാണത്തെ സൂചിപ്പിക്കുന്നു.

കൂടാതെ, സഭയും ക്രിസ്തുവും തമ്മിലുള്ള ബന്ധത്തെയും രൂത്തും ബോവാസും തമ്മിലുള്ള ബന്ധം ചിത്രീകരിക്കുന്നുണ്ട്. ബോവാസിന്റെ പാദത്തിങ്കൽ അഭയം തേടിവന്ന രൂത്ത്, ക്രിസ്തുവിന്റെ സന്നിധിയിൽ സമർപ്പിക്കപ്പെടുന്ന സഭയുടെ പ്രതീകമാണ്. താൻ തിരസ്കരിക്കപ്പെടാൻ സാധ്യതയുള്ള സാഹചര്യത്തിലും അവൾ അവനിൽ പ്രത്യാശ വെച്ചു. പുതിയ നിയമം പഠിപ്പിക്കുന്ന ‘പ്രത്യാശ’ എന്നത് ലജ്ജിച്ചുപോകാത്ത ഒന്നാണെന്ന് രൂത്തിന്റെ ജീവിതം തെളിയിക്കുന്നു. അവസാനം, അവൾ ഒരു അന്യദേശക്കാരി എന്ന നിലയിൽ നിന്ന് മാറി ഒരു കുടുംബത്തിന്റെ നാഥയായും മിശിഹായുടെ വംശാവലിയിലെ കണ്ണിയായും ഉയർത്തപ്പെട്ടു.

ചുരുക്കി പറഞ്ഞാൽ, രൂത്തിന്റെ ചരിത്രം പുതിയ നിയമത്തിന്റെ അന്തസ്സത്ത ഉൾക്കൊള്ളുന്ന ഒന്നാണ്. അത് ജാതിമത ഭേദമന്യേയുള്ള ദൈവത്തിന്റെ സ്നേഹത്തെയും, പാപാവസ്ഥയിൽ നിന്നുള്ള വീണ്ടെടുപ്പിനെയും, വിശ്വാസത്തിലൂടെ ലഭിക്കുന്ന നീതീകരണത്തെയും മനോഹരമായി ആവിഷ്കരിക്കുന്നു. നിയമത്തിന് നൽകാൻ കഴിയാത്തത് കൃപയിലൂടെ ദൈവം നൽകുന്നു എന്ന വലിയ സുവിശേഷം രൂത്തിന്റെ ജീവിതത്തിലൂടെ ഇന്നും ലോകത്തോട് സംസാരിച്ചുകൊണ്ടിരിക്കുന്നു.

സാജു മാത്യു പരുമല

- Advertisement -