ലേഖനം: ദൈവത്തിന്റെ കൈവെപ്പ്: മനുഷ്യജീവിതത്തിന്റെ അത്ഭുതരേഖ | റവ.ഡോ.ജിപ്സൺ ലോറൻസ്

യിരെമ്യാവു 29:11–13*
“നിങ്ങൾക്കു ശുഭമായ ഭാവി ലഭിക്കേണ്ടതിന്നായി ഞാൻ നിങ്ങളെക്കുറിച്ചു നിരൂപിക്കുന്ന നിരൂപണങ്ങളെ ഞാൻ അറിയുന്നു; അവ തിന്മയ്ക്കല്ല, നന്മയ്ക്കുള്ളവയാണ്; യഹോവയുടെ അരുളപ്പാട്. നിങ്ങൾ എന്നോടു പ്രാർത്ഥിക്കും, ഞാൻ നിങ്ങളെ കേൾക്കും. നിങ്ങൾ എന്നെ അന്വേഷിക്കും, പൂർണ്ണഹൃദയത്തോടെ അന്വേഷിക്കുമ്പോൾ എന്നെ കണ്ടെത്തും.”
*യാക്കോബ് 1:12*
“പരീക്ഷയെ സഹിക്കുന്ന മനുഷ്യൻ ഭാഗ്യവാൻ; അവൻ തെളിഞ്ഞു വന്നശേഷം, ദൈവം സ്നേഹിക്കുന്നവർക്ക് വാഗ്ദത്തം ചെയ്തിരിക്കുന്ന ജീവകിരീടം അവൻ പ്രാപിക്കും.”
*1. ദൈവത്തിന്റെ അനന്തബോധനത്തിലേക്ക് ഒരു യാത്ര*
മനുഷ്യജീവിതം എത്ര വലുതായ വിസ്മയമാണ്! ഓരോ ശ്വാസവും, ഓരോ ചിന്തയും, ഓരോ അനുഭവവും ദൈവത്തിന്റെ നിത്യപദ്ധതിയിൽ അളക്കപ്പെട്ടതും അടയാളപ്പെടുത്തിയതുമാണ്. നമ്മൾ പലപ്പോഴും വിചാരിക്കുന്നു  ജീവിതത്തിൽ സംഭവിക്കുന്ന എല്ലാം ഭാഗ്യത്തിന്റെ കളിയാണോ, അല്ലെങ്കിൽ അനിശ്ചിതത്വത്തിന്റെ കാറ്റാണോ എന്ന്. പക്ഷേ വേദം നമ്മോട് ഉറക്കെ പറയുന്നു:
*“നിങ്ങളെക്കുറിച്ചുള്ള ദൈവത്തിന്റെ നിരൂപണങ്ങൾ നന്മയ്ക്കുള്ളവയാണ്.”*
മനുഷ്യൻ പ്രത്യാശയില്ലാതാകുമ്പോൾ ദൈവത്തിന്റെ പദ്ധതി പ്രത്യാശയായി മാറുന്നു; വഴികൾ കാണാനില്ലെന്നു തോന്നുമ്പോൾ ദൈവം പുതിയ വഴി തുറക്കുന്നു. ദൈവത്തിന്റെ ആലോചനകൾ ഒരിക്കലും ആകസ്മികമല്ല  അവ *മനുഷ്യന്റെ ചരിത്രത്തിലൂടെയും, വ്യക്തിയുടെ ജീവിതത്തിലൂടെയും, ആത്മാവിന്റെ വളർച്ചയിലൂടെയും* ക്രമാതീതമായി സാക്ഷാത്കരിക്കപ്പെടുന്നവയാണ്.
*2. മൂന്നു വൃക്ഷങ്ങൾ: മനുഷ്യന്റെ ആത്മീയ ജീവിതത്തിന്റെ പ്രതീകങ്ങൾ*
ബൈബിളിൽ വൃക്ഷം മനുഷ്യനെ പ്രതിനിധീകരിക്കുന്നു. വേരുകൾ ദൈവത്തിൽ ആഴ്ന്നിരിക്കുമ്പോഴാണ് വൃക്ഷം ഫലം തരുന്നത്; അതുപോലെ ദൈവത്തിൽ വേരുറച്ച ജീവിതമാണ് സത്യമായ വിശ്വാസം.
(1) ഒളിവിന്റെ വൃക്ഷം  ആദാമിന്റെയും ഹവ്വയുടെയും വൃക്ഷം*
എദെനിലെ തോട്ടത്തിൽ ദൈവം മനുഷ്യനു എല്ലാ സ്വാതന്ത്ര്യവും നല്കിയിരുന്നു. പക്ഷേ, “നിഷിദ്ധ വൃക്ഷഫലം” മനുഷ്യൻ ദൈവത്തിനു മുകളിലായി സ്വന്തം ബുദ്ധിയാൽ ജീവിക്കാമെന്നൊരു ഭ്രമം നൽകി. അതാണ് പാപത്തിന്റെ ആരംഭം.
വൃക്ഷങ്ങളുടെ ഇടയിൽ ഒളിച്ച ആദാമിനെയും ഹവ്വയെയും പോലെ, ഇന്നും മനുഷ്യൻ തന്റെ പാപങ്ങളെ മറയ്ക്കുവാൻ ശ്രമിക്കുന്നു  ചിലപ്പോൾ മതാചാരങ്ങളിലൂടെ, ചിലപ്പോൾ സഭയുടെ പുറംമുഖത്തിലൂടെ, ചിലപ്പോൾ “ഞാൻ തെറ്റില്ല” എന്ന ആത്മാഭിമാനത്തിലൂടെ. എന്നാൽ ദൈവം ഇപ്പോഴും ചോദിക്കുന്നു: “ആദാമേ, നീ എവിടെയാണ്?” അത് വെറും ചോദ്യം അല്ല; അത് ഒരു വിളിയാണ്  തിരിച്ചുവരാനുള്ള ക്ഷണം.
(2) സംതൃപ്തിയുടെ വൃക്ഷം – നഥനയേലിന്റെ അത്തിവൃക്ഷം*
യോഹാൻ 1:48ൽ നാം കാണുന്നു, നഥനയേൽ അത്തിവൃക്ഷത്തിന്റെ കീഴിൽ ഇരിക്കുമ്പോൾ യേശു അവനെ കണ്ടു. അതിവൃക്ഷത്തിന്റെ നിഴലിൽ നഥനയേൽ സ്വയം മതി എന്നു കരുതിയിരിക്കുന്നു.
അത് ആത്മസംതൃപ്തിയുടെയും പരിധിയുടെയും പ്രതീകമാണ്. നമുക്ക് ആത്മീയ വളർച്ചയില്ലാത്ത സ്ഥിതിയിലേക്ക് അടങ്ങിയിരിക്കാനാകാം. എങ്കിലും യേശു അവനെ വിളിക്കുന്നു  “നിന്റെ ഉള്ളിൽ കപടമില്ല.” ദൈവം നമ്മെ വിളിക്കുന്നത് നമ്മുടെ പരിമിതികളിൽ നിന്ന് മുക്തരാക്കാനാണ്, കപടതയിൽ നിന്ന് സത്യത്തിലേക്കാണ്.
(3) ദർശനത്തിന്റെ വൃക്ഷം സക്കായിയുടെ ശീമവൃക്ഷം
ലൂക്കോസ് 19ൽ സക്കായി ശീമവൃക്ഷത്തിൽ കയറി യേശുവിനെ കാണാൻ ആഗ്രഹിച്ചു. അത് ദർശനത്തിന്റെയും ഉത്സാഹത്തിന്റെയും വൃക്ഷം. ദൈവത്തെ കാണാൻ ആഗ്രഹിക്കുന്നവന്‍ താഴേക്ക് ഇറങ്ങേണ്ടതുണ്ട്  വിളിക്കെ പ്രതികരിക്കേണ്ടതുണ്ട്. യേശു പറഞ്ഞു: “സക്കായിയേ, ഇറങ്ങിവാ; ഇന്നെൻറെ പാർപ്പിടം നിന്റെ വീട്ടിൽ തന്നെയായിരിക്കും.” അതാണ് സഭയുടെ യഥാർത്ഥ സ്വഭാവം  ദൈവം *മനുഷ്യനെ കാണാനും, മനുഷ്യൻ ദൈവത്തെ കാണാനും* ഒരു വേദി.

3. പരീക്ഷകളുടെയും സഹനത്തിന്റെയും വഴി

യാക്കോബ് 1:12 നമ്മെ ഓർമ്മിപ്പിക്കുന്നു  “പരീക്ഷയെ സഹിക്കുന്നവൻ ഭാഗ്യവാൻ.”ലോകം പരീക്ഷകളെ ഒഴിവാക്കാനാണ് ശ്രമിക്കുന്നത്, എന്നാൽ വിശ്വാസം നമ്മെ അതിൽ വഴിപരിചയപ്പെടുത്തുന്നു. ജീവിതത്തിലെ പ്രതിസന്ധികൾ, രോഗങ്ങൾ, നഷ്ടങ്ങൾ ഇവ എല്ലാം ദൈവപദ്ധതിയുടെ ഭാഗമാകാം. ഞാൻ ഒരിക്കൽ ഒരാളിൽ നിന്ന് കേട്ടതാണ്, “ദൈവം നമ്മെ ചികിത്സിക്കുന്നു, പക്ഷേ ചിലപ്പോൾ രോഗം തന്നെയാണ് ആ ചികിത്സയുടെ ഭാഗം. ”പരീക്ഷകൾ നമ്മെ തകർക്കാനല്ല, മിനുക്കാനാണ്. യോസഫിന്റെ ജീവിതം ഇതിന്റെ തെളിവാണ്. സഹോദരന്മാർ വിറ്റയാളായി, അടിമയായി, തടവുകാരനായി മാറിയെങ്കിലും, അവൻ ദൈവപദ്ധതിയിൽ നിന്ന് വഴിതിരിഞ്ഞില്ല. ഒടുവിൽ ദൈവം അവനെ മിസ്രയിമിലെ രണ്ടാമനാക്കി ഉയർത്തി.ദൈവം എല്ലായ്പ്പോഴും പറയുന്നു: “നിനക്കു വേണ്ടി ഞാൻ ചിന്തിക്കുന്നു; നീ ഇപ്പോൾ കാണാത്ത പദ്ധതികളാണ് ഞാൻ നടപ്പാക്കുന്നത്.

”4. ദൈവത്തിന്റെ പദ്ധതിയോട് അനുരൂപമായ ജീവിതങ്ങൾ

മോശ:- അടിമകളുടെ ദേശത്തിൽ നിന്ന് ദൈവജനത്തിന്റെ നേതാവായി. നദിയിലൊഴുക്കപ്പെട്ട ശിശുവിൽ നിന്നും മഹാനായ ദൈവസേവകനായി മാറിയത് ദൈവപദ്ധതിയുടെ അത്ഭുതമാണ്. മോശെ എത്രത്തോളം രാജകീയ സൗകര്യങ്ങൾ ഉപേക്ഷിച്ചാലും, അവൻ മനസ്സിലാക്കി  ദൈവം എനിക്കായി ഒരു വലിയ ഉദ്ദേശ്യമുണ്ട്.

മറിയം:- ദൈവഹിതത്തിന് വഴങ്ങിയവൾ. “ഇതാ, ഞാൻ കര്‍ത്താവിന്റെ ദാസി; നിന്റെ വാക്കുപോലെ എനിക്കു ഭവിക്കട്ടെ.”മറിയത്തിന്റെ ഈ വാക്കുകൾ മനുഷ്യചരിത്രത്തിലെ ഏറ്റവും ദൈവികമായ അനുസരണത്തിന്റെ ഉദാഹരണമാണ്. ദൈവത്തിന്റെ പദ്ധതിക്ക് വഴങ്ങുക അത്ര എളുപ്പമല്ല; എന്നാൽ അതാണ് രക്ഷയുടെ വഴി.

യോസഫ്:- വഞ്ചനയുടെ കിണറ്റിൽ നിന്ന് മഹത്വത്തിന്റെ സിംഹാസനത്തിലേക്ക്. യോസഫിന്റെ ജീവിതം നമ്മെ പഠിപ്പിക്കുന്നത്, ദൈവപദ്ധതിയുടെ വഴി ചിലപ്പോൾ ഇരുട്ടിലൂടെ കടന്നുപോകേണ്ടിവരും. അവൻ കിണറ്റിൽ വീണപ്പോൾ പ്രതീക്ഷയില്ലാതെയായിരുന്നു; എന്നാൽ ദൈവം അവിടെ നിന്നാണ് അവനെ ഉന്നതിയിലേക്കു നയിച്ചത്. “അവനോടുകൂടെ ദൈവം ഉണ്ടായിരുന്നു” എന്നതാണ് അവന്റെ വിജയത്തിന്റെ രഹസ്യം.

5.മനുഷ്യപദ്ധതികൾക്കെതിരെ ദൈവപദ്ധതിയുടെ വിജയഗാഥ.

യൂദാവിന്റെ കഥ ഒരു മുന്നറിയിപ്പാണ്. മുപ്പതു വെള്ളിക്കാശിനായി യേശുവിനെ വിറ്റയാൾ, തന്റെ പദ്ധതി വിജയിച്ചു എന്നു കരുതിയെങ്കിലും, അത് അവന്റെ ആത്മീയ മരണത്തിലേക്കു നയിച്ചു. ദൈവപദ്ധതിയെ എതിർക്കുന്ന മനുഷ്യപദ്ധതി ഒരിക്കലും നിലനിൽക്കില്ല. “അക്കൽദാമ” രക്തനിലം  മനുഷ്യപദ്ധതിയുടെ ദാരുണഫലത്തിന്റെ പ്രതീകമായി ബൈബിൾ നമ്മെ ഓർമ്മിപ്പിക്കുന്നു.

6. ഇന്നത്തെ ലോകത്തിനുള്ള സന്ദേശം
ഇന്നത്തെ മനുഷ്യൻ സഹനം എന്ന പദം മറന്നിരിക്കുന്നു.
വേഗത, മത്സരം, വിജയം, പണം, ഇതാണ് ലോകത്തിന്റെ ലക്ഷ്യം.
എന്നാൽ ദൈവത്തിന്റെ പദ്ധതിയിൽ മന്ദഗതിയും സഹനവും പ്രാർത്ഥനയും പ്രഥമ സ്ഥാനമാണ്. നമ്മുടെ ഭാവിയെക്കുറിച്ച് നാം അനിശ്ചിതരായിരിക്കാം; പക്ഷേ ദൈവം ഉറപ്പായി പറയുന്നു: “ഞാൻ നിന്നെക്കുറിച്ചു ആലോചിക്കുന്നു, അത് നന്മയ്ക്കാണ്.”
ജീവിതത്തിലെ ഒരു വേദനയും ദൈവം വൃഥയാക്കുന്നില്ല. ഒരൊറ്റ കണ്ണുനീരിന്റെയും പിന്നിൽ അവന്റെ കൃപയുടെ ചിഹ്നമുണ്ട്.
അതിനാൽ, നമ്മെ തളർത്തുന്ന സാഹചര്യങ്ങൾ വന്നാലും, നമ്മെ ഉയർത്തുവാനുള്ള ദൈവപദ്ധതി അതിനുള്ളിലുണ്ടെന്ന് വിശ്വസിക്കണം.
7. ആത്മപരിശോധനയും നിഗമനം
നാം ഏത് വൃക്ഷത്തിന്റെ കീഴിലാണ് ഇപ്പോൾ നിൽക്കുന്നത്? ഒളിവിന്റെ വൃക്ഷത്തിലോ? സംതൃപ്തിയുടെ വൃക്ഷത്തിലോ? ദർശനത്തിന്റെ വൃക്ഷത്തിലോ? നമ്മുടെ ജീവിതം ദൈവത്തിന്റെ പദ്ധതിയോട് പൊരുത്തപ്പെടുന്നുവോ, നമ്മുടെ സ്വന്ത ആലോചനകളിലാണോ നാം കുടുങ്ങിക്കിടക്കുന്നത്?
ദൈവം നമ്മോട് ഇപ്പോഴും പറയുന്നു, “എന്റെ കൃപ നിനക്കു മതി. ”ജീവിതം പരീക്ഷകളാൽ നിറഞ്ഞിരിക്കട്ടെ, പക്ഷേ അവയിലൂടെ ദൈവത്തിന്റെ മഹത്വം വെളിവാകട്ടെ. പൗലോസിനെപ്പോലെ നാം ഒരുദിവസം ധൈര്യമായി പറയട്ടെ, ഞാൻ നല്ല പോരാട്ടം പൊരുതി, ഓട്ടം തീർത്തു, വിശ്വാസം കാത്തു.”ദൈവത്തിന്റെ പദ്ധതി മനുഷ്യനിൽ അവസാനിക്കുന്നതല്ല, അതു ദൈവത്തിന്റെ മഹത്വത്തിൽ അവസാനിക്കുന്നു. അതിനാൽ, നാം പ്രത്യാശിക്കട്ടെ, ദൈവപദ്ധതിയുടെ നടുവിൽ സംതൃപ്തിയും സമാധാനവും കണ്ടെത്തുന്ന വിശ്വാസമാർന്ന ജീവിതം നയിക്കുവാൻ ദൈവം നമുക്കു കരുണനൽകട്ടെ.

- Advertisement -