ലേഖനം: മോശം സൗഹൃദങ്ങള്‍ സദ്ശീലങ്ങളെ ദുഷിപ്പിക്കുന്നു | റോജി തോമസ് ചെറുപുഴ
കുടുംബം, വിദ്യാഭ്യാസം, വ്യക്തിപരമായ തിരഞ്ഞെടുപ്പുകള്‍, പ്രത്യേകിച്ച് ഒരാള്‍ സൂക്ഷിക്കുന്ന സൗഹൃദങ്ങളും സഹവാസങ്ങളും ഉള്‍പ്പെടെ വിവിധ സ്വാധീന ശക്തികളാണ് മനുഷ്യസ്വഭാവത്തെ രൂപപ്പെടുത്തുന്നത്. ‘മോശം സൗഹൃദം സദ്ശീലങ്ങളെ ദുഷിപ്പിക്കുന്നു’ എന്ന ചൊല്ല് ബൈബിളില്‍ നിന്ന് ഉത്ഭവിച്ചതാണ് (1 കൊരിന്ത്യര്‍ 15:33). ധാര്‍മ്മിക മൂല്യങ്ങളില്‍ സാമൂഹിക ഇടപെടലുകളുടെ അഗാധമായ സ്വാധീനം എന്തെന്ന് ഇത് വെളിവാക്കുന്നു. നല്ല ഉദ്ദേശ്യശുദ്ധിയുള്ള വ്യക്തികള്‍പോലും സ്വാധീനശക്തികളാല്‍ വഴിതെറ്റിക്കപ്പെടുന്നത് എന്തുകൊണ്ടാണെന്ന് മനസിലാക്കാന്‍; സാമൂഹിക അനുരൂപത, വൈജ്ഞാനിക വൈരുദ്ധ്യം, വൈകാരിക സമന്വയം എന്നിവയുള്‍പ്പെടെ ഈ പരിവര്‍ത്തനത്തിന് കാരണമാകുന്ന വസ്തുകള്‍ എന്തെന്ന് നാം വിവേചിക്കുകയും വേണം.
മനുഷ്യന്‍റെ പെരുമാറ്റത്തെ ബാധിക്കുന്ന പ്രതിഭാസങ്ങളിലൊന്നാണ് സാമൂഹിക അനുരൂപത അഥവാ സാമൂഹിക സ്വാധീനശക്തി. ആളുകള്‍ക്ക് അവരുടെ ചിന്തകള്‍, പെരുമാറ്റങ്ങള്‍, ധാര്‍മ്മിക മൂല്യങ്ങള്‍ എന്നിവ അവരുടെ സമപ്രായക്കാരുടെ അല്ലെങ്കില്‍ സഹവാസികളുടെ ചിന്തകളും ശൈലികളും സ്വഭാവരീതികളുമായി സമന്വയിപ്പിക്കാനുള്ള സ്വാഭാവിക പ്രവണതയുണ്ട്. തെറ്റായ പ്രവണതകളുമായി പൊരുത്തപ്പെടുന്നതിന് അവര്‍ ശ്രമിക്കും. മുല്ലപൂമ്പൊടി ഏറ്റുകിടക്കും കല്ലിനുമുണ്ടാം സുഗന്ധം എന്ന ചൊല്ല് അന്വര്‍ത്ഥമാക്കും പോലെ തന്നെ. സദ്ഗുണങ്ങള്‍ ശീലിക്കുവാന്‍ പരിശ്രമം കാണിക്കാതെ മാറിനിന്നാലും ദുര്‍ഗുണങ്ങള്‍ ഒരുവനെ വേഗം സ്വാധീനിച്ച് വലയിലാക്കും. അവന്‍ അതിന് നീക്കുപോക്കുകള്‍ ഉണ്ടാക്കി വശപ്പെടും.
വില്യം ഷേക്സ്പിയറുടെ മാക്ബെത്തില്‍; തുടക്കത്തില്‍ വിശ്വസ്തനും മാന്യനുമായ ഒരു യോദ്ധാവായ മക്ബെത്ത് ഭാര്യ ലേഡി മക്ബെത്തിന്‍റെയും മന്ത്രവാദികളുടെയും സ്വാധീനം മൂലം സ്വേച്ഛാധിപതിയായി മാറുന്നു. നിഷേധാത്മകമായ സ്വാധീനങ്ങളാല്‍ പ്രചോദിതമാകുമ്പോള്‍, ഏറ്റവും ധീരരായ വ്യക്തികളെപ്പോലും ദുഷിപ്പിക്കാന്‍ അഭിലാഷത്തിന് എങ്ങനെ കഴിയുമെന്ന് അദ്ദേഹത്തിന്‍റെ ദാരുണമായ പതനം വ്യക്തമാക്കുന്നു. അതുപോലെ, ലോകചരിത്രത്തില്‍, അഡോള്‍ഫ് ഹിറ്റ്ലറെപ്പോലുള്ള വ്യക്തികളെ പ്രത്യയശാസ്ത്രങ്ങളും വിനാശകര പ്രവൃത്തികളെ ശക്തിപ്പെടുത്തിയ വ്യക്തികളും ഗണ്യമായി സ്വാധീനിച്ചിരുന്നു എന്ന് മനസിലാക്കാവുന്നതാണ്. ബഹുജന അതിക്രമങ്ങള്‍ക്ക് ഉത്തരവാദിയായ ഒരു സ്വേച്ഛാധിപതിയിലേക്കുള്ള അദ്ദേഹത്തിന്‍റെ പരിവര്‍ത്തനം; അനിയന്ത്രിതമായ അഭിലാഷവും അധാര്‍മ്മിക സൗഹാര്‍ദ്ദങ്ങളും എങ്ങനെ ധാര്‍മ്മിക അധഃപതനത്തിലേക്ക് നയിക്കുമെന്ന് കാണിക്കുന്നു. ബാഹ്യസ്വാധീനങ്ങള്‍ ശക്തമാണെങ്കിലും, വ്യക്തികള്‍ ആത്യന്തികമായി അവരുടെ തിരഞ്ഞെടുപ്പുകള്‍ക്ക് ഉത്തരവാദികളാണ്.
ശക്തമായ ധാര്‍മ്മിക അടിത്തറകള്‍ ഉണ്ടായിരുന്നിട്ടും, മോശം സ്വാധീനങ്ങളാല്‍ ചുറ്റപ്പെട്ടിരിക്കുമ്പോള്‍ വ്യക്തികള്‍ ക്രമേണ അധാര്‍മ്മിക പെരുമാറ്റങ്ങള്‍ സ്വീകരിക്കുന്നത് എന്തുകൊണ്ടാണെന്ന് ഇത് വിശദീകരിക്കുന്നു. സത്യസന്ധതയില്ലായ്മ, ക്രൂരത, ഉത്തരവാദിത്തമില്ലായ്മ എന്നിവ ഒരു സംഘത്തിനുള്ളില്‍ സാധാരണ നിലയില്‍ തുടര്‍ന്നുപോകുകയാണെങ്കില്‍, ഒരു വ്യക്തി പലപ്പോഴും ബോധപൂര്‍വ്വംതന്നെ അവന്‍റെ സ്വന്തം പെരുമാറ്റങ്ങളും ശീലങ്ങളും സദ്ഗുണങ്ങളും പുനഃക്രമീകരിക്കാന്‍ സാധ്യതയുണ്ട്. പരസ്പരവിരുദ്ധമായ വിശ്വാസങ്ങളും പ്രവര്‍ത്തനങ്ങളും കാരണം ഒരു വ്യക്തിക്ക് മാനസിക അസ്വസ്ഥത അനുഭവപ്പെടുമ്പോള്‍ ഈ അസ്വസ്ഥത പരിഹരിക്കുന്നതിന്, അവന്‍ തെറ്റ് സമ്മതിക്കുന്നതിനുപകരം അവന്‍റെ മനോഭാവം മാറ്റുകയോ തന്‍റെ പെരുമാറ്റത്തെ ന്യായീകരിക്കുകയോ ചെയ്യുന്നു.
സത്യസന്ധതയില്‍ വിശ്വസിക്കുകയും എന്നാല്‍ നുണ പറയുന്ന ഒരു കൂട്ടുകെട്ടില്‍ നിലനില്‍ക്കുന്ന ഒരു വ്യക്തി ചെറിയ നുണകളെ ‘കുഴപ്പമില്ലാത്തത്’ അല്ലെങ്കില്‍ ‘നിരുപദ്രവകരമായത്’ എന്ന് ന്യായീകരിക്കാന്‍ തുടങ്ങിയേക്കാം. കാലക്രമേണ, ഈ യുക്തിസഹമാക്കല്‍ സത്യസന്ധതയോടുള്ള അവന്‍റെ പ്രതിബദ്ധതയെ ഇല്ലാതാക്കുകയും അധാര്‍മിക പെരുമാറ്റങ്ങള്‍ സ്വീകരിക്കാന്‍ അവനെ പ്രചോദിപ്പിക്കുകയും ചെയ്യുന്നു. മോശം ഒരു കൂട്ടുകെട്ടിന് വ്യക്തിയുടെ ധാര്‍മ്മിക ദിശയെ ക്രമേണ എങ്ങനെ പുനഃര്‍നിര്‍മ്മിക്കാന്‍ കഴിയുമെന്ന് ഈ പ്രക്രിയ എടുത്തുകാണിക്കുന്നു. ഇത് അവരുടെ യഥാര്‍ത്ഥ മൂല്യങ്ങളില്‍ നിന്നുള്ള വ്യതിയാനങ്ങളെ ന്യായീകരിക്കുവാനും വഴങ്ങുവാനും ഇടയാക്കുന്നു. അവര്‍ സമാനമായ സ്വഭാവസവിശേഷതകള്‍ പ്രകടിപ്പിക്കാന്‍ തുടങ്ങുന്നു. അത്തരം പെരുമാറ്റങ്ങളോട് അവര്‍ ബോധപൂര്‍വ്വം വിയോജിക്കുകയാണെങ്കില്‍പ്പോലും, അവരുടെ ഉപബോധമനസ്സ് അവരുടെ പരിസ്ഥിതിയുടെ പ്രബലമായ മനോഭാവങ്ങളെ ആഗിരണം ചെയ്യുകയും പ്രതിഫലിപ്പിക്കുകയും ചെയ്യുന്നു. വിഷലിപ്തമായ സഹവാസത്തില്‍ ദീര്‍ഘകാലം ചെലവഴിക്കുന്നത് ഒരാളുടെ സ്വഭാവത്തെയും വൈകാരികാവസ്ഥയെയും ഒരു മാറ്റത്തിലേക്ക് നയിക്കുന്നു. കാലക്രമേണ, അവരുടെ മൂല്യങ്ങള്‍ക്ക് വിരുദ്ധമായി പ്രവര്‍ത്തിക്കാനുള്ള പുതിയ പെരുമാറ്റം അവരുടെ സ്വത്വത്തിന്‍റെ ഭാഗമായി മാറുകയും ചെയ്യുന്നു.
സമപ്രായക്കാരുടെ സമ്മര്‍ദ്ദം പലപ്പോഴും കൗമാരവുമായി ബന്ധപ്പെട്ടിരിക്കുന്നുവെങ്കിലും അത് ജീവിതത്തിലുടനീളം ശക്തമായ ഒരു പ്രചോദന ഘടകമായി തുടരുന്നു. സാമൂഹിക സ്വീകാര്യതയ്ക്കുള്ള ആഗ്രഹം വ്യക്തികളെ അവരുടെ ധാര്‍മ്മിക തത്ത്വങ്ങള്‍ ഉപേക്ഷിച്ച് സാമൂഹിക പ്രതിഭാസങ്ങള്‍ക്ക് അനുകൂലരാക്കാന്‍ ഇടയാക്കും. ലഹരിവസ്തുക്കളുടെ ദുരുപയോഗം, ഭീഷണിപ്പെടുത്തല്‍, സത്യസന്ധതയില്ലായ്മ, കുറ്റകൃത്യങ്ങള്‍, സഹജീവി സ്നേഹമില്ലായ്മ, കുടുംബ ബന്ധങ്ങളിലെ തകര്‍ച്ച, നീതിരാഹിത്യം തുടങ്ങി ഇന്ന് സമൂഹത്തില്‍ നാം കേട്ടുകൊണ്ടിരിക്കുന്ന, കാണുന്ന പ്രവണതകള്‍ എല്ലാം ഇതിന്‍റെ അനന്തര ഫലങ്ങള്‍ തന്നെയാണ്. വ്യക്തികളെ അഴിമതി, അധാര്‍മികമായ ബിസിനസ്സ് രീതികള്‍ അല്ലെങ്കില്‍ സാമൂഹികമോ തൊഴില്‍പരമോ അധികാരത്തിനോ സാമ്പത്തികമായ നേട്ടത്തിനായോ വ്യക്തിപരമായ മൂല്യങ്ങളില്‍ വിട്ടുവീഴ്ച ചെയ്യുന്നതിലേക്കും അനുരഞ്ജനം ചെയ്യുന്നതിലേക്കും തള്ളിവിടും. ഒഴിവാക്കപ്പെടും അല്ലെങ്കില്‍ പാര്‍ശ്വവത്കരിക്കപ്പെടും എന്നുള്ള ഭയമാണ് അത്തരം വിധേയത്വത്തിന്‍റെ പ്രധാനശക്തി. പല വ്യക്തികളും ഇത്തരം കുറവുകളുമായി, സ്വാധീനങ്ങളുമായി പൊരുത്തപ്പെടാന്‍ ഇഷ്ടപ്പെടുന്നു.
ശക്തമായ വ്യക്തിമൂല്യങ്ങള്‍ ഇത്തരം സ്വാധിനങ്ങള്‍ക്കെതിരായുള്ള പ്രതിരോധമായി പ്രവര്‍ത്തിക്കുന്നു. വ്യക്തമായ ധാര്‍മ്മിക അതിര്‍ത്തികളുള്ള, അടിത്തറയുള്ള ആളുകള്‍ മോശം സഹവാസത്താല്‍ സ്വാധീനിക്കപ്പെടാനുള്ള സാധ്യത കുറവാണ്. ‘ഈ സാഹചര്യത്തില്‍ പ്രവൃത്തികളില്‍ ഞാന്‍ അഭിമാനിക്കുമോ?’ എന്ന് സ്വയം ചിന്തിക്കുന്നത് അധാര്‍മികമായ സമ്മര്‍ദ്ദങ്ങളെ ചെറുക്കാന്‍ സഹായിക്കും. മോശം സഹവാസം ദുഷിപ്പിക്കുന്നതുപോലെ, നല്ല സൗഹൃദം സദ്സ്വഭാവത്തെ ശക്തിപ്പെടുത്തുന്നു. പിന്തുണയ്ക്കുന്ന, ധാര്‍മ്മികവും പ്രചോദനാത്മകവുമായ വ്യക്തികളെ തേടുന്നതും നേടുന്നതും നല്ല പെരുമാറ്റങ്ങളെ ശക്തിപ്പെടുത്തുന്നു. നിശ്ചയദാര്‍ഢ്യ പരിശീലനവും ദുര്‍സ്വാധിനങ്ങളെ വേണ്ട എന്ന് പറയാന്‍ പഠിക്കുന്നതും വ്യക്തികളെ അവരുടെ നല്ല നിലപാടില്‍ ഉറച്ചുനില്‍ക്കാന്‍ സഹായിക്കും. വൈകാരിക പ്രതിരോധശേഷി വളര്‍ത്തുക വഴി വ്യക്തികളെ അവരുടെ മനോഭാവത്തെ ബാധിക്കുന്ന വിഷ സ്വാധീനങ്ങളില്‍ നിന്ന് അകന്നുനില്‍ക്കാന്‍ അനുവദിക്കും. മോശം സഹവാസം ക്രമേണ ഒരാളുടെ ധാര്‍മ്മിക മൂല്യങ്ങളെ നശിപ്പിക്കുമെങ്കിലും, ഈ മനഃശാസ്ത്രപരമായ പ്രക്രിയകള്‍ മനസ്സിലാക്കുന്നത് വ്യക്തികളെ അവരുടെ സമഗ്രത സംരക്ഷിക്കാന്‍ പ്രാപ്തരാക്കുന്നു.
യുക്തിഭദ്രമല്ലാത്ത പ്രവൃത്തികളും പഠിപ്പുകളും, അധാര്‍മ്മിക ചെയ്തികളും, കുറ്റകൃത്യങ്ങളും, അനാവശ്യ ശൈലികളും പ്രതിഭാസങ്ങളും ഇന്ന് നമുക്ക് മുന്നില്‍ നിറഞ്ഞാടുന്നതിന് കാരണം; പരസ്പര ബഹുമാനമില്ലാത്ത, നീതിരഹിത താന്‍പോരിമയുടെ ചിന്തഗതികളും, കൂട്ടുചേരലുകളുമാണ്. ഒരുവനെ പഠിക്കുവാന്‍ വിലയിരുത്തുവാന്‍ അവന്‍റെ കൂട്ടുകെട്ടുകളെ വീക്ഷിച്ചാല്‍ മതി എന്ന് പറയാറുണ്ടല്ലോ? സ്വയാവബോധം, ശക്തമായ മൂല്യങ്ങള്‍, നല്ല ബന്ധങ്ങള്‍ എന്നിവ വളര്‍ത്തുന്നതിലൂടെ വ്യക്തികള്‍ക്ക് നിഷേധാത്മക സ്വാധീനങ്ങളെ പ്രതിരോധിക്കാനും ധാര്‍മ്മികമികവിന്‍റെ ജീവിതം പുലര്‍ത്തുവാനും കഴിയും. ബാഹ്യസമ്മര്‍ദ്ദങ്ങള്‍ നിരന്തരമായ ഒരു ലോകത്ത്, നല്ല സൗഹൃദവും സഹവാസവും നീതിബോധവും തിരഞ്ഞെടുക്കാനുള്ള കഴിവ് ഒരു നേട്ടം മാത്രമല്ല; വ്യക്തിപരമായ വളര്‍ച്ചയ്ക്കും സ്വഭാവ വികസനത്തിനും നല്ല ഒരു കുടുംബത്തിന്‍റെ, സമൂഹത്തിന്‍റെ, നാടിന്‍റെ, രാജ്യത്തിന്‍റെ നിര്‍മ്മിതിക്കും അത് അത്യാവശ്യമാണ്. വ്യക്തി നന്നായാല്‍ കുടുംബവും കൂട്ടായ്മയും നാടും നഗരവും ദേശവും നന്നാവും. നല്ല വ്യവസ്ഥിതികളും ഉണ്ടാവും
-ADVERTISEMENT-
Comments are closed, but trackbacks and pingbacks are open.