നെതർലൻസിൽ മലയാളത്തിൽ ആരാധനയ്ക്ക് ആരംഭം കുറിച്ചു

ആംസ്റ്റർഡാം : ആൻ ഫ്രാങ്കിന്റെയും കോറി ടെൻ ബൂമിന്റെയും നാടായ നെതർലൻഡ്‌സിൽ ആദ്യമായി പെന്തകോസ്ത് മലയാളം ആരാധന ആരംഭിച്ചു. നെതർലൻഡ്‌സിലെ വിവിധ നഗരങ്ങളിൽ ജോലിയിലും പഠനത്തിലും ഏർപ്പെട്ടിരിക്കുന്ന ക്രിസ്തീയ വിശ്വാസികളുടെ ആത്മീയ കൂട്ടായ്മയും ഉന്നമനവും ലക്ഷ്യമിട്ടുകൊണ്ട് 2024 ജനുവരിയിൽ പാസ്റ്റർ ഷിനോജ് ജോസഫ് ആണ് ലൈഫ് അക്സസ് ഇംഗ്ലീഷ് മലയാളം ഫെലോഷിപ്പ് (LA EMC) എന്ന് നാമകരണം ചെയ്തിരിക്കുന്ന സഭ നെതർലൻഡ്‌സിലെ ഏറ്റവും വലിയ നഗരമായ ആംസ്റ്റർഡാമിൽ ആരംഭിച്ചത്.

നെതർലൻഡ്‌സിലെ പ്രവാസി സമൂഹത്തിന് അവരുടെ മാതൃഭാഷയിലും അവർ വളർന്നുവന്ന സംസ്‍കാരത്തിലും ദൈവത്തെ ആരാധിക്കാൻ ഈ സഭ സൗകര്യമൊരുക്കുന്നു. നെതർലൻഡ്‌സിലെ ആദ്യത്തെ മലയാളി പെന്തകോസ്ത് കൂട്ടായ്മയാണ് ലൈഫ് അക്സസ് ഇംഗ്ലീഷ് മലയാളം ഫെലോഷിപ്പ് (LA EMC).

പാസ്റ്റർ ഷിനോജ് ജോസഫ് 2003 മുതൽ സഭാ ശുശ്രൂഷയിൽ കേരളത്തിൽ സജീവമാണ്. പാസ്റ്റർ ഷിനോജിനൊപ്പം ഭാര്യ എഞ്ചലിൻ ഷാരോൺ ഡാനിയേലും ശുശ്രൂഷയിലുണ്ട്. അറിയപ്പെടുന്ന സംഗീത സംഗീതജ്ഞ കൂടിയാണ് ഏഞ്ചലിൻ. അവർക്കു രണ്ടു മക്കൾ ; പ്രഷ്യസ്, അബ്നർ.

കേരളത്തിൽ ശുശ്രൂഷകനായി പ്രവർത്തിച്ചുകൊണ്ടിരിക്കെ പാസ്റ്റർ.ഷിനോജ് ജോസഫിന്
നെതർലൻഡ്സിലേക്ക് ദൈവവിളി ഉണ്ടാകുകയും അത് ഉറപ്പാകുകയും ചെയ്തപ്പോഴാണ് പ്രമുഖ അക്കൗണ്ടിങ് സ്ഥാപനമായ ഏണസ്റ്റ് ആൻഡ് യങ്ങിന്റെ നെതർലൻഡ്‌സ് ആസ്ഥാനത്തുനിന്ന് ഏഞ്ചലിന് ജോലി വാഗ്ദാനം ലഭിക്കുന്നതും അത് സ്വീകരിക്കുന്നതും.
ആദ്യം ഈ സ്ഥാപനത്തിൽ നിന്നും ജോലി വാഗ്ദാനം ലഭിച്ചു എങ്കിലും അത് വേണ്ട എന്ന് തീരുമാനിച്ചിരുന്നു. പിന്നീട് ദൈവം നെതർലൻഡ്സിലേക്ക് കുടുംബമായി വിളിച്ചിരിക്കുന്നു എന്ന ഉത്തമബോധ്യം ലഭിച്ചപ്പോഴാണ് ജോലി വാഗ്ദാനം സ്വീകരിക്കുകയും അവിടേക്ക് പോകുന്നതിന് ദൈവം അവസരം ഒരുങ്ങിയതും. അത്‌ ദൈവത്തിന്റെ വിളിയും നടത്തിപ്പുമാണെന്ന് തിരിച്ചറിഞ്ഞ പാസ്റ്റർ ഷിനോജ് ജോസഫും കുടുംബവും 2023-ന്റെ തുടക്കത്തിൽ നെതർലൻഡ്‌സിലേക്ക് പോകുവാൻ തയ്യാറായി. അവിടെ അവർ ഡച്ച് പാസ്റ്റർ ബെൻ വെർബൂമിനെയും അദ്ദേഹത്തിന്റെ ഭാര്യ ദോറിയൻ വെർബൂമിനെയും പരിചയപ്പെട്ടു. ഊർജ്ജസ്വലതയും ആത്മനിറവുമുള്ള വെർബൂം സുവിശേഷ കുടുംബം ലൈഫ് അക്സസ് ചർച്ച് എന്ന ഡച്ച് സഭയിൽ ശുശ്രൂഷകരായിരുന്നു. ഈ സൗഹൃദം പാസ്റ്റർ ഷിനോജിനും, ഭാര്യ ആഞ്ജലിനും ഡച്ച് സഭയിൽ ശുശ്രൂഷകൾക്ക് അവസരം തുറന്നുകൊടുത്തു. അതിനിടയിൽ പാസ്റ്റർ ഷിനോജ് തന്റെ ഭവനത്തിൽ മാസത്തിൽ ഒരിക്കൽ കൂടുന്ന ഒരു ചെറിയ കൂട്ടായ്മ ആരംഭിച്ചു. ഇത് ക്രമേണ വളരാൻ തുടങ്ങി. ആത്മീയ കൂട്ടായ്മയും ആത്മീയ പോഷണവും ആഗ്രഹിച്ച ഇന്ത്യയിൽ നിന്നുള്ള വിശ്വാസികളെ ഈ ചെറിയ കൂടിവരവ് ആകർഷിച്ചു. നിരന്തരമായ പ്രാർത്ഥനയുടെയും ഉപവാസത്തിന്റെയും ഫലമായി 2023 ഒക്ടോബറിൽ ഒരു ഇംഗ്ലീഷ് – മലയാളം കൂടിവരവ് ആരംഭിക്കാൻ പാസ്റ്റർ ഷിനോജിന് ദൈവത്തിൽ നിന്നു ലഭിച്ച വ്യക്തമായ പ്രേരണ പ്രകാരം സെൻട്രൽ ആംസ്റ്റർഡാമിൽ ലൈഫ് അക്സസ് ഇംഗ്ലീഷ് മലയാളം ഫെലോഷിപ്പ് (LA EMC) സ്ഥാപിക്കുന്നതിന് ദൈവം കൃപ ചെയ്തു.

വിവിധ സഭാ പശ്ചാത്തലമുള്ള വ്യക്തികളും കുടുംബങ്ങളും സത്യത്തിലും ആത്മാവിലും ആരാധിക്കാൻ എല്ലാ ആഴ്ചയും ഇവിടെ ഒത്തുകൂടുന്നു.

LA EMC- യുടെ ലക്ഷ്യം കേവലം ഇന്ത്യൻ സമൂഹത്തിന് മാത്രം ആരാധനയ്ക്കുള്ള സൗകര്യം ഒരുക്കുന്നതിൽ ഒതുങ്ങുന്നില്ല. നെതർലൻഡ്‌സിലെ വിവിധ ഇന്ത്യൻ പ്രവാസി സമൂഹങ്ങളെയും വിവിധ രാജ്യക്കാരെയും യേശു ക്രിസ്തുവിന്റെ സുവിശേഷവുമായി സന്ധിക്കാൻ സഭ പ്രതിജ്ഞാബന്ധമാണ്. സഭ ആരംഭിച്ചത് ദൈവിക നിയോഗപ്രകാരമാണെന്നും ആംസ്റ്റർഡാമിനും അതിന്റെ പരിധികൾക്ക് അപ്പുറത്തും സഭയ്ക്ക് വലിയ സ്വാധീനം ചെലുത്താനാകുമെന്നും സഭാ നേതൃത്വം വിശ്വസിക്കുന്നു.
കൂട്ടായ്മയും ആഴമേറിയ ആത്മീയബന്ധവും ആഗ്രഹിക്കുന്ന എല്ലാവരെയും LA EMC സഭ സ്വാഗതം ചെയ്യുന്നു. സ്വന്തം ഭാഷയിലും സംസ്കാരത്തിലും ദൈവത്തെ ആരാധിക്കാൻ സഭ എല്ലാവർക്കും അവസരം ഒരുക്കുന്നു.
ജോലിയോടോപ്പമോ പഠനത്തിനായോ എത്തുന്നവർക്ക്
കൂട്ടായ്മയ്ക്കും ആഴമേറിയ ആത്മീയബന്ധവും ആഗ്രഹിക്കുന്നവർക്ക് സഭ ശുശ്രൂഷകൻ പാസ്റ്റർ.ഷിനോജ് ജോസഫുമായി ബന്ധപ്പെടാവുന്നതാണ്
കൂടുതൽ വിവരങ്ങൾക്ക് : Pr. Shinoj Joseph
Phone : +31 686 117893
Email : lifeaccessmalchurch@gmail.com
Website : https://lifeaccess.nl/malayalam/

-ADVERTISEMENT-