വാൻകൂവറിൽ ജെനസിസ് ഫാമിലി കോൺഫറൻസ് ഒക്ടോബർ 30 മുതൽ നവംബർ 1 വരെ

വാൻകൂവർ (കാനഡ): ജെനസിസ് കാനഡ മിനിസ്ട്രീസിന്റെ ആഭിമുഖ്യത്തിൽ സംഘടിപ്പിക്കുന്ന ജെനസിസ് ഫാമിലി കോൺഫറൻസ് ഒക്ടോബർ 30 മുതൽ നവംബർ 1 വരെ ബ്രിട്ടീഷ് കൊളംബിയയിലെ സറേ ഈസ്റ്റ്–ക്ലോവർഡെയ്ൽ ഹോളിഡേ ഇന്നിൽ നടക്കും.

മൂന്നു ദിവസം നീണ്ടുനിൽക്കുന്ന സമ്മേളനത്തിൽ പാസ്റ്റർ ടി.ജി. ജോർജ്, ഇവാഞ്ചലിസ്റ്റ് ചാർളി സാം ബാബു, പാസ്റ്റർ ഷിബു തോമസ് എന്നിവർ മുഖ്യപ്രഭാഷകരായിരിക്കും. ആരാധന, ദൈവവചന ശുശ്രൂഷകൾ, ആത്മീയ കൂട്ടായ്മകൾ എന്നിവയിലൂടെ ക്രിസ്തീയ കുടുംബങ്ങളുടെ വിശ്വാസജീവിതം ശക്തിപ്പെടുത്തുകയാണ് സമ്മേളനത്തിന്റെ പ്രധാന ലക്ഷ്യം.

ജെനസിസ് കാനഡ മിനിസ്ട്രീസിന്റെ സ്ഥാപകനും പ്രസിഡന്റുമായ ഇവാഞ്ചലിസ്റ്റ് ചാർളി സാം ബാബുവിന്റെ നേതൃത്വത്തിലാണ് സമ്മേളനം സംഘടിപ്പിക്കുന്നത്. ക്രിസ്തീയ കുടുംബങ്ങളുടെ ആത്മീയ വളർച്ച, കുടുംബബന്ധങ്ങളുടെ ദൃഢീകരണം, വിശ്വാസികൾക്കിടയിലെ ഐക്യവും പരസ്പരസ്നേഹവും വർധിപ്പിക്കൽ എന്നിവയ്ക്കു പ്രാധാന്യം നൽകിയാണ് മിനിസ്ട്രീസ് പ്രവർത്തിക്കുന്നത്. കുടുംബങ്ങളെയും സമൂഹങ്ങളെയും ആത്മീയമായി ശക്തിപ്പെടുത്തുന്നതിനൊപ്പം സംഘടനയുടെ പ്രവർത്തനങ്ങൾ കൂടുതൽ മേഖലകളിലേക്ക് വ്യാപിപ്പിക്കാനും ലക്ഷ്യമിടുന്നു.

മിനിസ്ട്രീസ് ഡയറക്ടർമാരായ ഷെറി വർമ്മ, ജെഫിൻ തോമസ്, ലിംസൺ സീമോൻ, അനീഷ് തങ്കച്ചൻ എന്നിവർ സമ്മേളനത്തിന്റെ ഒരുക്കങ്ങൾക്ക് നേതൃത്വം നൽകുന്നു. ഫിന്നി രാജു ഹ്യൂസ്റ്റൺ മീഡിയ കോഓർഡിനേറ്ററായി പ്രവർത്തിക്കുന്നു.

വ്യക്തികളുടെയും കുടുംബങ്ങളുടെയും ആത്മീയ ഉന്നമനത്തിനും ക്രിസ്തീയ മൂല്യങ്ങളുടെ പരിപോഷണത്തിനും ഊന്നൽ നൽകുന്ന സമ്മേളനം വിശ്വാസികൾക്ക് ആത്മീയ നവീകരണത്തിനും പരസ്പരസഹകരണത്തിനുമുള്ള അവസരമാകുമെന്ന് സംഘാടകർ അറിയിച്ചു.

സമ്മേളനത്തിലേക്കുള്ള രജിസ്ട്രേഷൻ അവസാനിച്ചു. മൂന്നു ദിവസത്തെ ആത്മീയ സംഗമത്തിനായുള്ള അവസാനഘട്ട ഒരുക്കങ്ങൾ പുരോഗമിക്കുകയാണ്.

വാർത്ത: ഫിന്നി രാജു, ഹ്യൂസ്റ്റൺ

- Advertisement -