ലേഖനം: മനസാന്തരത്തിന് യോഗ്യമായ ഫലം കായിപ്പിൻ | ടോജോ തോമസ്, ദുബായ്

മനുഷ്യന്റെ ആത്മീയ യാത്രയിൽ ഏറ്റവും നിർണായകമായ തിരിഞ്ഞുനിൽപ്പ് മനസാന്തരമാണ്. എന്നാൽ ബൈബിൾ നമ്മെ പഠിപ്പിക്കുന്നത്, മനസാന്തരം ഒരു ആരംഭം മാത്രമാണെന്നും അതിന്റെ യഥാർത്ഥ തെളിവ് “ഫലം” ആണെന്നും ആണ്. അതുകൊണ്ടാണ് യോഹന്നാൻ സ്നാപകൻ ശക്തമായി വിളിച്ചുപറഞ്ഞത്: “മനസാന്തരത്തിന് യോഗ്യമായ ഫലം കായിപ്പിൻ” (മത്തായി 3:8). ഈ വചനം ഇന്നത്തെ ആത്മീയ സാഹചര്യത്തിൽ അത്യന്തം പ്രസക്തമായ ദൈവിക ആഹ്വാനമാണ്.

മനുഷ്യജീവിതത്തിന്റെ ആഴങ്ങളിലേക്ക് ദൈവത്തിന്റെ വെളിച്ചം പതിയുമ്പോൾ, അവിടെ ഉയരുന്ന ആദ്യപ്രതികരണം മനസാന്തരമാണ്. പക്ഷേ, മനസാന്തരം ഒരു നിമിഷാന്തര വികാരമല്ല; അത് ജീവിതത്തിന്റെ ദിശ തന്നെ മാറ്റുന്ന ദൈവിക ഇടപെടലാണ്. അതുകൊണ്ടുതന്നെ, “മനസാന്തരത്തിന് യോഗ്യമായ ഫലം കായിപ്പിൻ” എന്ന വചനം ഓരോ വിശ്വാസിയുടെയും ഹൃദയത്തിൽ മുഴങ്ങുന്ന ദൈവത്തിന്റെ ശക്തമായ വിളിയാണ്.

“ദുഷ്ടൻ തന്റെ വഴി ഉപേക്ഷിക്കയും അധർമ്മി തന്റെ ചിന്തകൾ ഉപേക്ഷിക്കയും ചെയ്തു യഹോവയിലേക്കു മടങ്ങട്ടെ” (യെശയ്യാവ് 55:7) എന്ന വചനത്തിൽ കാണുന്നതുപോലെ, മനസാന്തരം ജീവിതത്തിന്റെ എല്ലാ മേഖലകളിലും മാറ്റം വരുത്തുന്ന ഒരു ആത്മീയ പ്രവൃത്തിയാണ്

മനസാന്തരം പലപ്പോഴും കണ്ണുനീരും വികാരങ്ങളും കൊണ്ട് അളക്കപ്പെടുന്നു. എന്നാൽ ദൈവം അന്വേഷിക്കുന്നത് കണ്ണുനീരല്ല, ജീവിതമാറ്റമാണ്. ഹൃദയം മാറ്റപ്പെടുമ്പോൾ അതിന്റെ തെളിവ് പ്രവൃത്തികളിൽ പ്രകടമാകണം. വേരിൽ മാറ്റമുണ്ടെങ്കിൽ, അതിന്റെ ഫലം കൊമ്പുകളിലും ഇലകളിലും പ്രതിഫലിക്കും. അതുപോലെ, സത്യമായ മനസാന്തരം മനുഷ്യന്റെ ചിന്തകളിലും വാക്കുകളിലും പ്രവൃത്തികളിലും ദൃശ്യമായ ഫലമായി കായിക്കണം.

ഇന്നത്തെ കാലഘട്ടത്തിൽ, ആത്മീയ മൂല്യച്യുതി മനുഷ്യജീവിതത്തിന്റെ എല്ലാ മേഖലകളിലും വ്യക്തമായി കാണാം. വിശ്വാസം പലപ്പോഴും ഒരു ആചാരമായി ചുരുങ്ങിപ്പോയിരിക്കുന്നു; ആരാധന ഒരു പതിവായി മാറിയിരിക്കുന്നു; ദൈവബന്ധം ഒരു ഔപചാരികതയായി താഴ്ന്നിരിക്കുന്നു. ഈ സാഹചര്യത്തിൽ, മനസാന്തരം പോലും പലപ്പോഴും ഉപരിപ്ലവമായ ഒരു അനുഭവമായി മാത്രം നിലനിൽക്കുന്നു. ജീവിതത്തിൽ യാതൊരു മാറ്റവും ഉണ്ടാകാതെ, “ഞാൻ മനസാന്തരപ്പെട്ടു” എന്ന് പറയുന്ന ഒരു വ്യാമോഹം വളരുന്നു.

ഈ വ്യാമോഹത്തിന്റെ പശ്ചാത്തലത്തിൽ, യോഹന്നാൻ സ്നാപകന്റെ ആഹ്വാനം ഇന്നും ശക്തമായി മുഴങ്ങുന്നു—മനസാന്തരത്തിന് യോഗ്യമായ ഫലം കായിപ്പിൻ. അതായത്, പാപത്തെ വെറുക്കുന്ന ഒരു ഹൃദയം, നീതിയെ സ്നേഹിക്കുന്ന ഒരു ജീവിതം, ദൈവത്തെ ഭയപ്പെടുന്ന ഒരു ആത്മാവ്. ഈ ഫലങ്ങൾ ഇല്ലാത്തിടത്ത്, മനസാന്തരം വെറും വാക്കായി മാത്രം അവശേഷിക്കുന്നു.

ഇന്നത്തെ സമൂഹത്തിൽ നാം കാണുന്നത് ഒരു ആത്മീയ വൈരുദ്ധ്യമാണ്. വാക്കുകളിൽ വിശ്വാസം, പക്ഷേ പ്രവൃത്തികളിൽ ലോകീയത. ദൈവത്തെ സ്നേഹിക്കുന്നു എന്ന് പറയുമ്പോഴും, ജീവിതത്തിൽ സ്വാർത്ഥതയും അഹങ്കാരവും മുൻപന്തിയിൽ നിൽക്കുന്നു. സത്യസന്ധതയുടെ പകരം അനായാസമായ വഴികൾ തിരഞ്ഞടുക്കപ്പെടുന്നു. പരിശുദ്ധിയുടെ പകരം സൗകര്യം മുൻഗണന നേടുന്നു. ഇതെല്ലാം മനസാന്തരത്തിന്റെ അഭാവത്തിന്റെ അടയാളങ്ങളാണ്.

മനസാന്തരത്തിന് യോഗ്യമായ ഫലം കായിക്കുക എന്നത് ഒരു തുടർച്ചയായ പ്രക്രിയയാണ്. അത് ഒരു ദിവസത്തിൽ പൂർത്തിയാകുന്നില്ല; അത് ജീവിതകാലം മുഴുവൻ തുടരുന്ന ഒരു ആത്മീയ യാത്രയാണ്. ഓരോ ദിവസവും നമ്മുടെ ഹൃദയം പരിശോധിക്കപ്പെടണം. ദൈവത്തിന്റെ സന്നിധിയിൽ നിൽക്കുമ്പോൾ, നമ്മുടെ ഉള്ളിലെ അശുദ്ധികൾ വെളിവാകണം. അവയെ ഉപേക്ഷിച്ച്, പുതുവഴിയിൽ നടക്കാനുള്ള ധൈര്യം നമ്മിൽ ഉണ്ടായിരിക്കണം.

യേശുക്രിസ്തു തന്നെ പഠിപ്പിച്ചു: “നല്ല വൃക്ഷം നല്ല ഫലം കായിക്കും; ദോഷമുള്ള വൃക്ഷം ദോഷമുള്ള ഫലം കായിക്കും” (മത്തായി 7:17). അതായത്, ഉള്ളിലെ മാറ്റം പുറത്തുള്ള ജീവിതത്തിൽ പ്രതിഫലിക്കണം. അപ്പോസ്തലൻ പൗലോസ് ഗലാത്യർ 5:22-23ൽ ആത്മാവിന്റെ ഫലങ്ങളെ വ്യക്തമാക്കുന്നു: സ്നേഹം, സന്തോഷം, സമാധാനം, ദീർഘക്ഷമ, ദയ, നന്മ, വിശ്വാസം, സൗമ്യത, ആത്മനിയന്ത്രണം—ഇവയാണ് മനസാന്തരത്തിന്റെ യഥാർത്ഥ ഫലങ്ങൾ

ഈ ഫലങ്ങളിൽ പ്രധാനപ്പെട്ടത് സ്നേഹമാണ്—സ്വാർത്ഥതയില്ലാത്ത, ത്യാഗപൂർണ്ണമായ സ്നേഹം. അതോടൊപ്പം, വിനയം, ക്ഷമ, ദയ, കരുണ, സത്യസന്ധത—ഇവയെല്ലാം മനസാന്തരത്തിന്റെ സ്വാഭാവിക ഫലങ്ങളാണ്. ഒരു വൃക്ഷം നല്ലതാണെങ്കിൽ, അതിന്റെ ഫലം നല്ലതായിരിക്കും; അതുപോലെ, ഹൃദയം ദൈവത്തിൽ നന്നായി നട്ടുപിടിപ്പിച്ചാൽ, ജീവിതം ദൈവിക ഗുണങ്ങളാൽ നിറയും.

ഇന്നത്തെ ആത്മീയ മൂല്യച്യുതികളുടെ ഇടയിൽ, ഈ ഫലങ്ങൾ കായിക്കുക എന്നത് എളുപ്പമല്ല. ലോകത്തിന്റെ സ്വാധീനം ശക്തമാണ്; പാപത്തിന്റെ ആകർഷണം ശക്തമാണ്. എന്നാൽ ദൈവകൃപ അതിനേക്കാൾ ശക്തമാണ്. പരിശുദ്ധാത്മാവിന്റെ സഹായത്തോടെ, ഒരു വിശ്വാസിക്ക് ഈ ലോകത്തിൽ വിശുദ്ധമായി ജീവിക്കാനാകും. അതിന് ആവശ്യമായത് ഒരു സമർപ്പിത ഹൃദയവും ദൈവത്തിൽ ഉറച്ച വിശ്വാസവുമാണ്.

യേശു പരീശന്മാരെക്കുറിച്ച് പറഞ്ഞത് ഇന്നും നമ്മെ ബാധിക്കുന്നു:“ഈ ജനങ്ങൾ അധരങ്ങളാൽ എന്നെ ബഹുമാനിക്കുന്നു; അവരുടെ ഹൃദയം എങ്കിലും എനിക്ക് ദൂരെയാകുന്നു” (മത്തായി 15:8). ഇന്നത്തെ ക്രിസ്തീയ ലോകത്തിൽ പലപ്പോഴും കാണുന്നത് ഇതുതന്നെയാണ്— പുറത്ത് ആത്മീയതയുടെ രൂപം, എന്നാൽ ഉള്ളിൽ ദൈവഭയത്തിന്റെ അഭാവം. സഭയിൽ സജീവം, പക്ഷേ ജീവിതത്തിൽ മാറ്റമില്ല പ്രാർത്ഥനയുണ്ട്, പക്ഷേ പരിശുദ്ധിയില്ല വചനജ്ഞാനം ഉണ്ട്, പക്ഷേ അനുസരണം ഇല്ല ഇത് യഥാർത്ഥ മനസാന്തരത്തിന്റെ അഭാവം സൂചിപ്പിക്കുന്നു.

ബൈബിളിൽ നമുക്ക് യഥാർത്ഥ മനസാന്തരത്തിന്റെ ഉദാഹരണങ്ങൾ കാണാം: സക്കായി (ലൂക്കാ 19:8): അവൻ തന്റെ പാപങ്ങൾ സമ്മതിച്ചു, അന്യായമായി എടുത്തത് തിരികെ കൊടുക്കാൻ തയ്യാറായി. ഇത് ഫലം കായിക്കുന്ന മനസാന്തരമാണ്. ദാവീദ് (സങ്കീർത്തനം 51): അവന്റെ ഹൃദയം തകർന്നു, ദൈവത്തിനു മുമ്പിൽ വിനീതമായി. “ശുദ്ധമായ ഹൃദയം എന്നിൽ സൃഷ്ടിക്കേണമേ” എന്ന പ്രാർത്ഥന യഥാർത്ഥ മനസാന്തരത്തിന്റെ അടയാളമാണ്. നിനവേ പട്ടണം (യോനാ 3): രാജാവിൽ നിന്ന് സാധാരണ ജനങ്ങളുവരെ ഉപവാസവും പാപവിമോചനവും നടത്തി. സമൂഹമൊട്ടാകെ ഫലം കായിച്ചു.

യോഹന്നാൻ സ്നാപകൻ മുന്നറിയിപ്പ് നൽകുന്നു:“നല്ല ഫലം കായിക്കാത്ത എല്ലാ വൃക്ഷവും വെട്ടി തീയിൽ ഇട്ടുകളയും” (മത്തായി 3:10). അതുപോലെ, യേശു പറഞ്ഞ ഉപമ: ഫലം കായിക്കാത്ത അത്തിവൃക്ഷം വെട്ടിക്കളയപ്പെട്ടു (ലൂക്കാ 13:6-9). ഇത് നമ്മെ ഓർമ്മിപ്പിക്കുന്നത് ദൈവം നമ്മുടെ വാക്കുകളെക്കാൾ നമ്മുടെ ഫലങ്ങളെയാണ് നോക്കുന്നത്.

“എന്നിൽ നിലനിൽക്കുവിൻ… നിങ്ങൾ എന്നിൽ നിലനിൽക്കുന്നു എങ്കിൽ വളരെ ഫലം കായിക്കും” (യോഹന്നാൻ 15:4-5).

 

ടോജോ തോമസ്, ദുബായ്