ആത്മനിറവിന്റെ അഞ്ചു ദിനങ്ങൾക്ക് നാളെ (06/03/19) ഇരുമ്പല്ലിയൂരിൽ തുടക്കമാകും

ചെന്നൈ: വിശ്വാസി സഹസ്രങ്ങൾക്കായി ചെന്നൈ ഇരുമ്പല്ലിയൂർ ഒരുങ്ങി. ആത്മീയസംഗമത്തിന്റെ അഞ്ചു നാളുകൾ റ്റിപിഎം സഭ ആസ്ഥാനത്തെ സ്തോത്ര മുഖരിതമാക്കുന്ന ചെന്നൈ സാർവ്വദേശീയ കണ്‍വൻഷനും ദൈവിക രോഗശാന്തി ശുശ്രൂഷക്കും നാളെ തുടക്കം. കൺവൻഷന് മുന്നോടിയായി സഭ ആസ്ഥാനത്ത് നിന്നും ശുഭ്രവസ്ത്രധാരികളായ പതിനായിരക്കണക്കിന് വിശ്വാസികളും ശുശ്രൂഷകരും പങ്കെടുത്ത സുവിശേഷ വിളംബര റാലി നടന്നു.
നാളെ മുതൽ ശനിയാഴ്‌ച വരെ വൈകിട്ട് 6 ന് സുവിശേഷ പ്രസംഗവും വ്യാഴാഴ്‌ച മുതൽ ശനിയാഴ്‌ച രാവിലെ വരെ 4 ന് സ്തോത്ര പ്രാർത്ഥന, 7 ന് വിശ്വാസികൾക്കും ശുശ്രൂഷകർക്കും പ്രത്യേക ബൈബിൾ ക്ലാസ്, 9.30 ന് പൊതുയോഗം, വൈകിട്ട് 3 നും രാത്രി 10 നും യുവജന മീറ്റിങ്ങും കാത്തിരിപ്പ് യോഗവും ഉണ്ടായിരിക്കും. കുട്ടികൾക്കായി ചിൽഡ്രൻസ് ഷെഡിൽ വിവിധ യോഗങ്ങൾ ക്രമീകരിച്ചിട്ടുണ്ട്. ഞായറാഴ്ച സ്നാന ശുശ്രൂഷയും രാവിലെ 9 ന് സംയുക്ത വിശുദ്ധ സഭായോഗവും തുടർന്ന് ശിശു പ്രതിഷ്ഠ ശുശ്രൂഷയും വൈകിട്ട് 6 ന് പ്രത്യേക ദൈവീക രോഗശാന്തി ശുശ്രൂഷയും ഉണ്ടായിരിക്കും.
കൺവൻഷനിൽ സഭയുടെ സുവിശേഷ പ്രവർത്തകർ വിവിധ ഭാഷകളിൽ ഗാനങ്ങൾ ആലപിക്കും. ചീഫ് പാസ്റ്റർമ്മാരും സെന്റർ പാസ്റ്റർമ്മാരും വിവിധ യോഗങ്ങളിൽ പ്രസംഗിക്കും. പ്രസംഗം തത്സമയം ഇംഗ്ലീഷ്, തമിഴ്, മലയാളം, തെലുങ്ക്, കന്നഡ, ഹിന്ദി, പഞ്ചാബി, സിംഹള, നേപ്പാളി, നാഗാമിസ് തുടങ്ങിയ ഭാഷകളിലേക്ക് പരിഭാഷപ്പെടുത്തും.
മാർച്ച്‌ 5 ചൊവ്വാഴ്‌ച രാവിലെ മുതൽ 6 ബുധനാഴ്ച ഉച്ച വരെ ശുശ്രൂഷക സമ്മേളനവും മാർച്ച്‌ 11 തിങ്കളാഴ്‌ച രാവിലെ സഭയുടെ വാർഷിക ജനറൽബോഡി യോഗവും വൈകിട്ട് പുതിയ ശുശ്രൂഷകരെ തിരഞ്ഞെടുക്കുന്ന ശുശ്രൂഷയും നടക്കും.
കണ്‍വൻഷന്റെയും രോഗശാന്തി ശുശ്രൂഷയുടെയും അനുഗ്രഹത്തിനായി മുഴു ലോകത്തിലും ഉള്ള റ്റിപിഎം സഭകളിൽ മാർച്ച്‌ 2 ന് പ്രത്യേക ഉപവാസ പ്രാർത്ഥന നടന്നു.
വിദേശ രാജൃങ്ങളിൽ നിന്നും ഇന്ത്യയുടെ വിവിധ ഭാഗങ്ങളിൽ നിന്നും ശുശ്രൂഷകരും വിശ്വാസികളും കൺവൻഷനിൽ പങ്കെടുക്കും. ചീഫ് പാസ്റ്റർ എബ്രഹാം മാത്യു, ഡെപൃൂട്ടി ചീഫ് പാസ്റ്റർ എം റ്റി തോമസ്, അസോസിയറ്റ് ഡെപൃൂട്ടി ചീഫ് പാസ്റ്റർ ജി.ജെയം എന്നിവരും മറ്റു പ്രധാന ശുശ്രൂഷകരും കൺവൻഷനു നേതൃത്വം നൽകും.
കണ്‍വൻഷന്റെയും രോഗശാന്തി ശുശ്രൂഷയുടെയും അനുഗ്രഹത്തിനായി ചെന്നൈയിലെ സഭ ആസ്ഥാനത്ത് ‘ഗ്രേസ് ഹാളില്‍’ കണ്‍വൻഷന്റെ ആരംഭ ദിവസം മുതൽ സമാപന ദിവസം വരെ 24 മണിക്കൂര്‍ പ്രയർ ചെയിനും ഉപവാസ പ്രാർത്ഥനയും നടക്കും. താമ്പരം, ചെന്നൈ റെയിൽവേ സ്റ്റേഷനിൽ നിന്നും ചെന്നൈ എയർപോർട്ടിൽ നിന്നും പ്രത്യേക ബസ്‌ സർവീസുകൾ തമിഴ്നാട്‌ സർക്കാര്‍ ക്രമീകരിച്ചു. ബസ്‌, എയർ ടിക്കറ്റ്‌ എടുക്കുവാൻ ഉള്ള ക്രമീകരണങ്ങളും റെയിൽവേയുടെ പ്രത്യേക കൗണ്ടറും സഭ ആസ്ഥാനത്ത് ഒരുക്കിയിട്ടുണ്ട്. ഭക്ഷണം, താമസം സൗജനൃമായി ഒരുക്കിയിട്ടുണ്ട്. കൺവൻഷന്റെ എൻക്വയറി കൗണ്ടറുകൾ താമ്പരം, ചെന്നൈ റെയിൽവേ സ്റ്റേഷനിലും ചെന്നൈ എയർപോർട്ടിലും കൺവൻഷൻ ദിവസങ്ങളിൽ തുറന്നു പ്രവർത്തിക്കും. ആയിരത്തോളം വിശ്വാസികളും ശുശ്രൂഷകരും ഉള്‍പ്പെട്ട വോളന്റയേഴ്സ് കണ്‍വൻഷനു വേണ്ട ക്രമീകരണങ്ങള്‍ ഒരുക്കി.
1924 ൽ ശ്രീലങ്കയിൽ മലയാളിയായ പാസ്റ്റർ പോൾ സ്ഥാപിച്ച സിലോൺ പെന്തെക്കൊസ്ത് മിഷൻ ഇന്ത്യയിൽ റ്റിപിഎം എന്ന ചുരുക്ക പേരിൽ അറിയപ്പെടുന്നു. 65 ൽ അധികം രാജ്യങ്ങളിൽ സുവിശേഷ പ്രവർത്തനം നടത്തുന്ന ദി പെന്തെക്കൊസ്ത് മിഷൻ സഭ ഓരോ രാജ്യത്തും പ്രാദേശിക പേരുകളിലാണ് അറിയപ്പെടുന്നത്.

ഈ വർഷത്തെ ചെന്നൈയിലെ പ്രധാന യോഗങ്ങൾ

– നാളെ (06/03/19) മുതൽ ശനിയാഴ്‌ച വരെ വൈകിട്ട് 6 ന് സുവിശേഷ പ്രസംഗം.
ദിവസവും രാവിലെ 4 ന് സ്തോത്ര പ്രാർത്ഥന, 7 ന് വിശ്വാസികൾക്കും ശുശ്രൂഷകർക്കും പ്രത്യേക ബൈബിൾ ക്ലാസ്, 9.30 ന് പൊതുയോഗം, വൈകിട്ട് 3 നും രാത്രി 10 നും യുവജന മീറ്റിംഗ്, കാത്തിരിപ്പ് യോഗം. കുട്ടികൾക്കായി ചിൽഡ്രൻസ് ഷെഡിൽ വിവിധ യോഗങ്ങൾ.

post watermark60x60

– ഞായറാഴ്ച സ്നാന ശുശ്രൂഷ, രാവിലെ 9 ന് സംയുക്ത വിശുദ്ധ സഭായോഗം, ശിശു പ്രതിഷ്ഠ ശുശ്രൂഷ, വൈകിട്ട് 6 ന് പ്രത്യേക ദൈവീക രോഗശാന്തി ശുശ്രൂഷ.

– തിങ്കളാഴ്‌ച രാവിലെ സഭയുടെ വാർഷിക ജനറൽബോഡി യോഗവും വൈകിട്ട് പുതിയ ശുശ്രൂഷകരെ തിരഞ്ഞെടുക്കുന്ന ശുശ്രൂഷയും നടക്കും.

ചെന്നൈ സാർവ്വദേശീയ കൺവൻഷനു മുന്നോടിയായി നടന്ന സുവിശേഷ വിളംബര ജാഥ

-ADVERTISEMENT-

-ADVERTISEMENT-

You might also like