ലേഖനം: കർത്താവ് ഭവനം പണിയുന്നില്ലെങ്കിൽ…? | റോജി തോമസ്, ചെറുപുഴ

“യഹോവ വീടു പണിയാതിരുന്നാൽ പണിയുന്നവർ വൃഥാ അദ്ധ്വാനിക്കുന്നു; യഹോവ പട്ടണം കാക്കാതിരുന്നാൽ കാവൽക്കാരൻ വൃഥാ ജാഗരിക്കുന്നു” (സങ്കീർത്തനങ്ങൾ 127:1). കർത്താവ് പ്രവർത്തിക്കുന്നില്ലെങ്കിൽ, അധ്വാനിക്കുന്നവരുടെ അധ്വാന പ്രവർത്തികൾ വ്യർത്ഥമാണ്. ദൈവിക മാർഗനിർദേശമില്ലാത്ത മാനുഷിക ശ്രമങ്ങൾ ഫലശൂന്യതയിലേക്ക് നയിക്കുന്നു. ജീവിതം, കുടുംബം, തൊഴിൽ, സ്വപ്നങ്ങൾ, ഭാവി എന്നിങ്ങനെ നിരവധി കാര്യങ്ങൾ കെട്ടിപ്പടുക്കാൻ നാം കഠിനമായി പരിശ്രമിക്കുന്നവരാണ്. നാം ശ്രദ്ധാപൂർവ്വം ആസൂത്രണം ചെയ്യുകയും അതിനായി നമ്മുടെ ഊർജ്ജവും വിഭവങ്ങളും നിക്ഷേപിക്കുകയും ചെയ്യുന്നു. എന്നിരുന്നാലും; വിജയവും ശാശ്വതമായ സ്ഥിരതയും മനുഷ്യശക്തിയിൽ നിന്ന് മാത്രം വരുന്നതല്ലെന്ന് ഈ വാക്യം നമ്മെ ഒാർമ്മിപ്പിക്കുന്നു.

ഓരോ വ്യക്തിയും ജീവിത വഴിത്താരകളിൽ എന്തെങ്കിലും പടുത്തുയർത്തലുകളിൽ, രൂപപ്പെടുത്തലുകളിൽ, ക്രമപ്പെടുത്തലുകളിൽ വ്യാപൃതരാണ്. ചിലർ ബിസിനസുകൾ കെട്ടിപ്പടുക്കുന്നു, മറ്റുള്ളവർ ബന്ധങ്ങൾ കെട്ടിപ്പടുക്കുന്നു, മറ്റു പലരും ഭാവിയെക്കുറിച്ച് പ്രതീക്ഷകൾ വളർത്തുന്നു. എന്നാൽ നമ്മൾ എന്താണ് നിർമ്മിക്കുന്നത് എന്നത് മാത്രമല്ല; ആരാണ് നമ്മോടൊപ്പം നിർമ്മിതിയിൽ പങ്കാളി, സഹകാരി എന്നതാണ് ചിന്തനീയം.

ദൈവം നമ്മുടെ ജീവിതത്തിന്റെ, പ്രവർത്തന മേഖലകളിൽ ശില്പിയല്ലാത്തപ്പോൾ, നമ്മുടെ പ്രവർത്തികളും പ്രതീക്ഷകളും പ്രയത്നങ്ങളും ക്ഷീണിപ്പിക്കുന്നതും അനിശ്ചിതത്വം നിറഞ്ഞതും ആയിത്തീർന്നേക്കാം. നാം താൽക്കാലിക വിജയം നേടിയേക്കാം, പക്ഷേ അടിത്തറ നിലനിൽക്കണമെന്നില്ല. എന്നിരുന്നാലും, ദൈവം ഇടപെടുമ്പോൾ, നമ്മുടെ നിർമ്മിതികളെ, വിഭാവനകളെ പിന്തുണയ്ക്കുന്നത് നമ്മുടേതിനേക്കാൾ വളരെ വലിയ ദൈവിക ജ്ഞാനമാണ്.

കർത്താവ് ആലയം പണിയുമ്പോൾ നിർമ്മാതാവ് ദൈവമാണ്. അവിടുന്ന് വ്യക്തവും പരിപൂർണ്ണവുമായ ഉദ്ദേശ്യത്തോടെ നിർമ്മിക്കുന്നു. അവിടുത്തെ പദ്ധതികൾ നമുക്ക് കാണാൻ കഴിയുന്നതിന് അപ്പുറത്തേക്ക് വ്യാപ്തമാണ്. നമുക്ക് മന്ദഗതിയിലെന്നോ, ആശയക്കുഴപ്പമെന്നോ തോന്നുന്നത് പലപ്പോഴും ഒരു വലിയ ദൈവിക രൂപകൽപ്പനയുടെ ഭാഗമാണ്. ദൈവം ക്ഷമയോടെ നിർമ്മിക്കുകയും നമ്മുടെ ജീവിതത്തെയും സ്വഭാവത്തെയും പാതകളെയും ശ്രദ്ധാപൂർവ്വം രൂപപ്പെടുത്തുകയും ചെയ്യുന്നു. “യഹോവയായ ഞാൻ തക്ക സമയത്തു അതിനെ ശീഘ്രമായി നിവർത്തിക്കും” (യെശയ്യാ 60:22). “അവൻ സകലവും അതതിന്റെ സമയത്തു ഭംഗിയായി ചെയ്തു നിത്യതയും മനുഷ്യരുടെ ഹൃദയത്തിൽ വെച്ചിരിക്കുന്നു. എങ്കിലും ദൈവം ആദിയോടന്തം ചെയ്യുന്ന പ്രവൃത്തിയെ ഗ്രഹിപ്പാൻ അവർക്കു കഴിവില്ല” (സഭാപ്രസംഗി 3:11). ദൈവം നമ്മുടെ സംരക്ഷകനാണ്. സമ്പത്ത്, അധികാരം, തയ്യാറെടുപ്പ്, നിരന്തരമായ ജാഗ്രത എന്നിവയിലൂടെ ആളുകൾ തങ്ങളുടെ ജീവിതം സുരക്ഷിതമാക്കാൻ ശ്രമിക്കുന്നു. എന്നാലും, യഥാർത്ഥ സുരക്ഷ മനുഷ്യശക്തിയിൽ മാത്രം കണ്ടെത്താനാവില്ല. ഏറ്റവും ശ്രദ്ധയുള്ള കാവൽക്കാരന് പോലും ദൈവം സൂക്ഷിക്കാത്ത കാര്യങ്ങൾ സംരക്ഷിക്കാൻ കഴിയില്ല.

ദൈവമാണ് കാവൽക്കാരനും സംരക്ഷകനും; ഇതിനുപുറമെ, ദൈവം നമ്മുടെ ദാതാവുമാണ്. നമുക്ക് ലഭിക്കുന്ന ഒാരോ അവസരവും ഓരോ അനുഗ്രഹവും എല്ലാ ശക്തിയും ആത്യന്തികമായി തന്നിൽ നിന്നാണ് വരുന്നത്. നമ്മുടെ ജോലി പ്രധാനമാണ്, പക്ഷേ ഉയർച്ചയും ഉന്നമനവും നൽകുന്നത് ദൈവമാണ്. നാം നടുന്നു, നാം വെള്ളം കൊടുക്കുന്നു, നാം അധ്വാനിക്കുന്നു; എന്നാൽ ദൈവം പരിപാലിക്കുന്നു, വളർത്തുന്നു.

താഴ്മയോടും വിശ്വാസത്തോടും കൂടി ജീവിക്കാൻ ഈ സത്യം നമ്മെ ഓർമ്മിപ്പിക്കുന്നു. ജീവിതത്തിന്റെ എല്ലാ തലങ്ങളും നിയന്ത്രിക്കാൻ നാം അത്യുല്ത്സാഹപൂർവ്വം, ആകാംക്ഷയോടെ കഠിനാധ്വാനം ചെയ്യുന്നതിനു പകരം, നമ്മുടെ പദ്ധതികൾ ദൈവത്തിന്റെ കൈകളിൽ നൽകാൻ, കർത്താവിൽ ആശ്രയം വയ്ക്കാൻ നമ്മെ ഉദ്്ബോധിപ്പിക്കുന്നു. നമ്മുടെ ഭവനത്തെയും ഭാവിയെയും ജോലിയെയും തീരുമാനങ്ങളെയും നയിക്കാൻ നാം അവനെ ക്ഷണിക്കുക; വിട്ടുകൊടുക്കുക. കർത്താവ് പണിതുയർത്തുമ്പോൾ നമ്മുടെ അധ്വാനം വെറുതെയാകില്ല. അവന്റെ ഉദ്ദേശ്യവുമായി യോജിക്കുന്നതിനാൽ നമ്മുടെ പ്രവർത്തികൾ അർത്ഥവത്തായിത്തീരുന്നു. നമ്മൾ ഒറ്റയ്ക്കല്ലെന്ന് മനസ്സിലാക്കുമ്പോഴാണ് ഏറ്റവും വലിയ സമാധാനം വരുന്നത്. ഉയർച്ചയും സംരക്ഷയും നൽകുന്നവനുമാണ് ദൈവം. നമ്മുടെ ജീവിതം അവിടുത്തെ കൈകളിൽ വിശ്രമിക്കുമ്പോൾ, നാം നിർമ്മിക്കുന്ന ഭവനം ശക്തമായി നിലകൊള്ളുന്നു. “യഹോവ വീടു പണിയാതിരുന്നാൽ പണിയുന്നവർ വൃഥാ അദ്ധ്വാനിക്കുന്നു’ ഈ വാക്കുകൾ ലളിതമാണ്, പക്ഷേ അവ നമ്മുടെ ജീവിതരീതിയെ മാറ്റാൻ കഴിയുന്ന ഒരു സന്ദേശം വഹിക്കുന്നു.

നമ്മൾ ഒാരോരുത്തരും എന്തെങ്കിലും നിർമ്മിക്കുകയാണ്. കരിയറുകൾ കെട്ടിപ്പടുക്കുകയാണ്. കുടുംബങ്ങൾ കെട്ടിപ്പടുക്കുകയാണ്. സ്വപ്നങ്ങളും ബിസിനസ്സുകളും ഭാവിയും കെട്ടിപ്പടുക്കുകയാണ്. നമ്മൾ നേരത്തെ ഉണരും. ദീർഘനേരം ജോലി ചെയ്യുന്നു. നിശ്ചയദാർഢ്യത്തോടെ നാം നമ്മെത്തന്നെ മുന്നോട്ട് നയിക്കുന്നു. എന്നാൽ ഈ വാക്യം നമ്മോട് വളരെ പ്രധാനപ്പെട്ട ഒരു ചോദ്യം ചോദിക്കുന്നു: ആരാണ് വീട് പണിയുന്നത്? ആരാണ് ഫലം തരുന്നത്? ആരാണ് നിലനിർത്തുന്നത്? നമ്മുടെ സ്വന്തം ശക്തിയാൽ മാത്രമാണോ നമ്മൾ നിർമ്മിക്കുന്നത്? അതോ അടിത്തറയിടാൻ നാം ദൈവത്തെ അനുവദിക്കുകയാണോ? കാരണം, സത്യം ഇതാണ് മനുഷ്യന്റെ ശ്രമം മാത്രം പോരാ. ബുദ്ധി ഉണ്ടായിരിക്കാം വിഭവങ്ങൾ ഉണ്ടായിരിക്കാം നമുക്ക് കഴിവും അഭിലാഷവും ഉണ്ടായിരിക്കാം. എന്നാൽ ദൈവം അടിസ്ഥാനമല്ലെങ്കിൽ, ആശ്രയമല്ലെങ്കിൽ ആ ഘടന എന്നെന്നേക്കുമായി നിലനിൽക്കില്ല.

ദൈവം നമ്മുടെ ജീവിതം രൂപപ്പെടുത്തുമ്പോൾ, നിർമ്മിക്കുമ്പോൾ, അവൻ നമ്മുടേതിനേക്കാൾ വലിയ ജ്ഞാനം കൊണ്ട് നിർമ്മിക്കുന്നു. നമ്മുക്ക് കാണാൻ കഴിയാത്ത അവസരങ്ങൾ അവൻ കാണുന്നു. മറ്റാർക്കും തുറക്കാൻ കഴിയാത്ത വാതിലുകൾ താൻ തുറക്കുന്നു. നമ്മൾ ഉദ്ദേശിക്കുന്ന തലങ്ങൾക്കുമപ്പുറം നമ്മെ രൂപപ്പെടുത്തുന്ന വെല്ലുവിളികളിലൂടെ അവിടുന്നു നമ്മെ നയിക്കുന്നു. ഇതിനർത്ഥം ദൈവം നിർമ്മാതാവ് മാത്രമല്ല; അവനാണ് സംരക്ഷകൻ. അനിശ്ചിതത്വം നിറഞ്ഞ ഒരു ലോകത്താണ് നാം ജീവിക്കുന്നത്. ജനങ്ങൾ നാളെയെക്കുറിച്ച് ആശങ്കാകുലരാണ്. സുരക്ഷ, വിജയം, സ്ഥിരത എന്നിവയെക്കുറിച്ച് അവർ ആശങ്കാകുലരാണ്. എന്നാൽ യഥാർത്ഥ സുരക്ഷ നിയന്ത്രണത്തിലല്ല; ഭക്തർക്ക് അത് ദൈവ വിശ്വാസത്തിൽ, ആശ്രയത്തിൽ കാണപ്പെടുന്നു; രൂപപ്പെടുന്നു.

ദൈവം നമ്മുടെ ജീവിതത്തെ നിരീക്ഷിക്കുമ്പോൾ നമ്മുക്ക് ആത്മവിശ്വാസത്തോടെ മുന്നോട്ട് പോകാം. മാത്രമല്ല; ദൈവം ദാതാവ് കൂടിയാണ്. ലഭിച്ച ഓരോ അനുഗ്രഹവും, നമ്മുടെ വഴിയിൽ വന്ന ഓരോ അവസരവും, ദുഷ്കരമായ സമയങ്ങളിലൂടെ നമ്മെ നയിച്ച എല്ലാ ശക്തിയും അവന്റെ സന്നിധേ നിന്നാണ്; കൈയിൽ നിന്നാണ്. അതിനാൽ ഇത് ഓർക്കുക; ഒരിക്കലും നമ്മുടെ ജീവിതം ഒറ്റയ്ക്ക് കെട്ടിപ്പടുക്കാൻ ഉദ്ദേശിച്ചുള്ളതല്ല. നമ്മുടെ പദ്ധതികളിൽ ദൈവത്തെ ക്ഷണിക്കുക; സ്വപ്നങ്ങളിലേക്കും ജോലിയിലേക്കും തന്നെ ക്ഷണിക്കുക. അവിടുത്തെ പാദാന്തികെ നമ്മെ തന്നെ സമർപ്പിക്കുക. കാരണം ദൈവം പണിയുമ്പോൾ അടിത്തറ ശക്തമാകും. ദൈവം കാത്തുസൂക്ഷിക്കുമ്പോൾ, ഭയാകുലതകൾ മാറി സമാധാനം വ്യാപരിക്കുന്നു. ദൈവം നമ്മുടെ ജീവിതം നയിക്കുമ്പോൾ അധ്വാനം ഒരിക്കലും പാഴാകില്ല. അതിനാൽ ജോലി തുടരുക; കെട്ടിപ്പടുക്കുന്നത് തുടരുക; മുന്നോട്ട് നീങ്ങുക. എന്നാൽ ഏറ്റവും പ്രധാനമായി ദൈവം പണിയട്ടെ; നയിക്കട്ടെ. ഭൂവിൽ ആശ്രയം നമുക്ക് അവനിലല്ലോ.

റോജി തോമസ്, ചെറുപുഴ

- Advertisement -