തണുത്തുവിറച്ച് ഉത്തരേന്ത്യ

ന്യൂഡൽഹി: അതിശൈത്യത്തിന്റെ പിടിയിൽ ഉത്തരേന്ത്യയും. പല നഗരങ്ങളിലും കൂടിയ താപനില 15 ഡിഗ്രിയായി താഴ്ന്നു. തലസ്ഥാന നഗരമടക്കം പലയിടത്തും കനത്ത മൂടൽമഞ്ഞു പടർന്നു. ഡൽഹിയിൽ ക്രിസ്മസ് ദിനത്തിൽ കുറഞ്ഞ താപനില 5.3 ഡിഗ്രിയായിരുന്നു. ഇന്നലെ അത് 3 ഡിഗ്രിയായി. കൂടിയ താപനില 16 ഡിഗ്രി. സാധാരണ ഈ കാലത്തുണ്ടാകുന്നതിലും 5 ഡിഗ്രിയോളം കുറവാണിത്. കാഴ്ചപരിധി 50 മീറ്ററിലും കുറയുന്ന വിധമുള്ള മൂടൽമഞ്ഞ് റോഡ് ഗതാഗതത്തെ ബാധിച്ചു. പത്തോളം ട്രെയിനുകളും വൈകി.

പഞ്ചാബിലും ഹരിയാനയിലും കശ്മീരിലും രാജസ്ഥാൻ, യുപി ​എന്നീ സംസ്ഥാനങ്ങളുടെ ഭാഗങ്ങളിലും കൊടും തണുപ്പാണ്. ഡൽഹിയിൽ ചില സ്കൂളുകൾ അവധി നേരത്തേയാക്കി. കശ്മീരിൽ തണുപ്പു കാരണം വെള്ളം കട്ടപിടിച്ച് ജലവിതരണം തടസ്സപ്പെട്ടതായി റിപ്പോർട്ടുണ്ട്. ദാൽ തടാകത്തിൽ മഞ്ഞുറഞ്ഞത് പമ്പിങ്ങിനെ ബാധിച്ചു.

അടുത്ത 2 ദിവസം കൂടി ഇതേ അവസ്ഥ തുടരുമെന്നാണ് കാലാവസ്ഥാ മുന്നറിയിപ്പ്. മുംബൈയിലും ശൈത്യം പിടിമുറുക്കുകയാണ്. ക്രിസ്മസ് ദിനത്തിൽ നഗരത്തിലെ കുറഞ്ഞ താപനില 15 ഡിഗ്രി വരെ താഴ്ന്നിരുന്നു.

- Advertisement -