കാനഡയിലുള്ളവർ ഹൈക്കമ്മീഷനിൽ റജിസ്റ്റർ ചെയ്യണം; നിർദ്ദേശവുമായി വിദേശകാര്യ മന്ത്രാലയം
ന്യൂഡല്ഹി: കാനഡയുമായി നയതന്ത്ര ബന്ധം വഷളായതിന് പിന്നാലെ അവിടുത്തെ ഇന്ത്യന് പൗരന്മാരോടും വിദ്യാര്ഥികളോടും അതീവ ജാഗ്രത പുലര്ത്താന് നിര്ദേശിച്ച് ഇന്ത്യൻ വിദേശകാര്യ മന്ത്രാലയം. കാനഡയില് വര്ധിച്ചുവരുന്ന ഇന്ത്യാ വിരുദ്ധ പ്രവര്ത്തനങ്ങൾ കണക്കിലെടുത്ത്, അവിടെയുള്ള ഇന്ത്യന് പൗരൻമാരും അവിടേക്കു യാത്ര ചെയ്യാന് ഉദ്ദേശിക്കുന്നവരും അതീവ ജാഗ്രത പുലർത്തണമെന്നാണ് വിദേശകാര്യ മന്ത്രാലയത്തിന്റെ മുന്നറിയിപ്പ്.
ഇന്ത്യാ വിരുദ്ധ അജൻഡയെ എതിര്ക്കുന്ന ഇന്ത്യന് നയതന്ത്രജ്ഞരെയും ഇന്ത്യന് സമൂഹത്തിലെ വിഭാഗങ്ങളെയും പ്രത്യേകമായി ലക്ഷ്യമിട്ട് ഭീഷണി ഉയരുന്നുണ്ട്. ഇത്തരം സംഭവങ്ങള് റിപ്പോര്ട്ട് ചെയ്യപ്പെട്ട കാനഡയിലെ പ്രദേശങ്ങളിലേക്കു യാത്ര ചെയ്യുന്നത് ഇന്ത്യന് പൗരന്മാര് ഒഴിവാക്കണം.
കാനഡയിലെ ഇന്ത്യന് പൗരന്മാരും വിദ്യാര്ഥികളും ഒട്ടാവയിലെ ഇന്ത്യന് ഹൈക്കമ്മീഷനിലോ ടൊറന്റോയിലെ കോണ്സുലേറ്റിലോ നിര്ബന്ധമായും റജിസ്റ്റര് ചെയ്യണം. madad.gov.in. എന്ന വെബ്സൈറ്റ് വഴിയും റജിസ്റ്റർ ചെയ്യാമെന്ന് വിദേശകാര്യ മന്ത്രാലയം അറിയിച്ചു.
ഖലിസ്ഥാന് വിഘടനവാദി നേതാവ് ഹര്ദീപ് സിങ് നിജ്ജാറിന്റെ കൊലപാതകത്തില് ഇന്ത്യയ്ക്ക് പങ്കുണ്ടെന്ന കനേഡിയന് പ്രധാനമന്ത്രി ജസ്റ്റിന് ട്രൂഡോയുടെ ആരോപണത്തിന് പിന്നാലെയാണ് ഇരുരാജ്യങ്ങളും തമ്മിലുള്ള നയതന്ത്ര ബന്ധം വഷളായത്. ഇരുരാജ്യങ്ങളും നയതന്ത്ര പ്രതിനിധികളെ പുറത്താക്കിയിരുന്നു. ഇതിന് പിന്നാലെ ഇന്ത്യയിലേക്കുള്ള യാത്രയ്ക്ക് കാനഡ, പൗരന്മാര്ക്ക് മുന്നറിയിപ്പ് നല്കിയിരുന്നു.
- Advertisement -
Comments are closed.